ନୂଆଦିଲ୍ଲୀ: ଲୋକସଭା ନିର୍ବାଚନ ପ୍ରଚାର କ୍ଷେତ୍ରରେ ବିଭିନ୍ନ ପ୍ରକାରର ବିବାଦୀୟ ଘଟଣା ସାମ୍ନାକୁ ଆସୁଛି। କେଉଁଠି ସମ୍ବିଧାନ ହଟାଇବା ଏବଂ ସଂରକ୍ଷଣକୁ ନେଇ ବିବାଦ ଦେଖାଦେଇଛି ତ ଆଉ କେଉଁଠି ସାମ୍ପ୍ରଦାୟିକ ପ୍ରସଙ୍ଗରେ ବିତର୍କ ହେଉଥିବା ଦେଖିବାକୁ ମିଳିଛି। ଏହି ସମୟରେ କର୍ଣ୍ଣାଟକର ଜଣେ କଂଗ୍ରେସ ବିଧାୟକ ଏପରି ଏକ ବିବାଦୀୟ ବୟାନ ଦେଇଛନ୍ତି, ଯାହାପରେ ସେ ଟାର୍ଗେଟରେ ଆସିଛନ୍ତି। କଂଗ୍ରେସ ବିଧାୟକ ରାଜୁ କାଗେଙ୍କ ବୟାନ ସୋସିଆଲ ମିଡିଆରେ ଭାଇରାଲ ହେଉଛି। ନିର୍ବାଚନ ରାଲିକୁ ସମ୍ବୋଧିତ କରିବାବେଳେ ରାଜୁ କାଗେ ସିଧାସଳଖ ଭୋଟରଙ୍କୁ ଚେତାବନୀ ଦେଇଛନ୍ତି ଯେ ଯଦି ଦଳ ବିପୁଳ ବ୍ୟବଧାନରେ ବିଜୟ ନହୁଏ ତେବେ ଲୋକଙ୍କର ଘରେ ବିଦ୍ୟୁତ କାଟ ହେବ। କଂଗ୍ରେସ ନେତା ସିଧାସଳଖ ଭୋଟର୍ସଙ୍କୁ ଧମକ ଦେଇଛନ୍ତି।
କଂଗ୍ରେସ ନେତା ରାଜୁ କାଗେଙ୍କ ଏହି ବିବାଦୀୟ ବୟାନ ପରେ ନିର୍ବାଚନ ଆୟୋଗ ଏହାର ଉତ୍ତର ମାଗିଛନ୍ତି। ମାଡବାଭି ଗ୍ରାମ ପଞ୍ଚାୟତରେ ଏକ ନିର୍ବାଚନ ପ୍ରଚାର ସମୟରେ ରାଜୁ କାଗେ ଏପ୍ରିଲ୍ ୩୦ ତାରିଖରେ ଏହି ବୟାନ ଦେଇଛନ୍ତି। ସେ ଖୋଲାଖୋଲି ଚେତାବନୀ ଦେଇଛନ୍ତି ଯେ ଯଦି ୨୦୨୪ ଲୋକସଭା ନିର୍ବାଚନରେ କଂଗ୍ରେସର ପ୍ରଦର୍ଶନ ଖରାପ ହୁଏ, ତେବେ ଲୋକଙ୍କ ବିଦ୍ୟୁତ କାଟ ହୋଇଯିବ।
ରାଜୁଙ୍କ ଏହି ବିବାଦୀୟ ବୟାନ କ୍ୟାମେରାରେ ମଧ୍ୟ କଏଦ ହୋଇଛି ଯାହା ସୋସିଆଲ ମିଡିଆ ପ୍ଲାଟଫର୍ମରେ ଭାଇରାଲ ହେଉଛି। ସେ କନ୍ନଡ଼ର ଲୋକଙ୍କୁ କହିଥିଲେ, ମୁଁ ୪୦୦ ଭୋଟ କମ୍ ପାଇଛି। ମୁଁ ଗତଥର ମଙ୍ଗଳାବାଟୀ, ଶୁଲୁରେ କମ୍ ଭୋଟ୍ ପାଇଥିଲି। ଚଳିତ ଥର ଯଦି ମୁଁ ଏହି ନିର୍ବାଚନରେ ଅଧିକ ଭୋଟ୍ ନ ପାଏ, ତେବେ ଆମେ ଆପଣଙ୍କ ବିଦ୍ୟୁତ୍ କାଟିଦେବୁ, ଯାହା ହେବା ଉଚିତ୍ ନୁହେଁ। ତେଣୁ ମୋତେ ଭୋଟ ଦେଇ ବିଜୟ କରାନ୍ତୁ, ବିଦ୍ୟୁତ କାଟ୍ରୁ ବଞ୍ଚିତ ରୁହନ୍ତୁ।
ରାଜୁଙ୍କ ଏହି ବିବାଦୀୟ ବୟାନକୁ ନେଇ ବିଜେପି କଂଗ୍ରେସ ଉପରେ ଆକ୍ରମଣ କରିଛି। ଏହି ବୟାନକୁ ରାହୁଲ ଗାନ୍ଧୀଙ୍କ ପ୍ରେମ ଦୋକାନ ସହିତ ଯୋଡି ବିଜେପି କଂଗ୍ରେସ ଉପରେ ଆକ୍ରମଣ କରିଛି। ବିଜେପି ନେତା ଶେହଜାଦ ପୁନାୱାଲା କହିଛନ୍ତି ଯେ ସେମାନେ ‘ପ୍ରେମର ଦୋକାନ’ କୁହନ୍ତି କିନ୍ତୁ ଏଗୁଡ଼ିକ ହେଉଛି ‘ଧମକର ଦୋକାନ’। ଏହା ପ୍ରଥମ ଘଟଣା ନୁହେଁ ଯେ କଂଗ୍ରେସ ବିଧାୟକ ରାଜୁ ଏକ ବିବାଦୀୟ ବୟାନ ଦେଇଛନ୍ତି। ଏହାପୂର୍ବରୁ ମଧ୍ୟ ସେ ଅନେକ ଥର ଏଭଳି ବୟାନ ଦେଇ ସମାଲୋଚନାର ଘେରକୁ ଆସିଛନ୍ତି। ଯାହା ସୋସିଆଲ ମିଡିଆରେ ଭାଇରାଲ ହୋଇଛି। ରାଜୁ କର୍ଣ୍ଣାଟକର ବେଲାଗାଭିର କାଗୱାଡ ବିଧାନସଭା ନିର୍ବାଚନମଣ୍ଡଳୀରୁ ବିଧାୟକ ରହିଛନ୍ତି।