ଓଡ଼ିଶା ସମ୍ବାଦ ବ୍ୟୁରୋ: ବିଶ୍ୱରେ ମୃତ୍ୟୁର ମୁଖ୍ୟ କାରଣ ମଧ୍ୟରୁ ଫୁସଫୁସ କର୍କଟ ଅନ୍ୟତମ। ଅନୁସନ୍ଧାନକାରୀମାନେ ଜାଣିବାକୁ ପାଇଲେ ଯେ ବିଶ୍ୱର ୧୬ ଜଣଙ୍କ ମଧ୍ୟରୁ ଜଣଙ୍କର ଫୁସଫୁସ କର୍କଟ ହେବାର ଆଶଙ୍କା ରହିଛି। ଆମେରିକୀୟ ଫୁସଫୁସ ଆସୋସିଏସନ ରିପୋର୍ଟ ଅନୁଯାୟୀ, ୟୁଏସରେ ପ୍ରତ୍ୟେକ ଅଢେଇ ମିନିଟରେ କୌଣସି ନା କୌଣସି ବ୍ୟକ୍ତିଙ୍କୁ ଫୁସଫୁସ କର୍କଟ ଥିବା ଚିହ୍ନଟ ହେଉଛନ୍ତି। ପ୍ରତିଦିନ ପ୍ରାୟ ୩୫୦ ଲୋକ ଫୁସଫୁସ କର୍କଟ ରୋଗରେ ଆକ୍ରାନ୍ତ ହେଉଛନ୍ତି। ଯଦିଓ ଗତ ପାଞ୍ଚ ବର୍ଷ ମଧ୍ୟରେ ଫୁସଫୁସ କର୍କଟରେ ରୋଗୀଙ୍କ ମୃତ୍ୟୁର ମୁଖ୍ୟ କାରଣ ପାଲଟିଛି।
ଫୁସଫୁସ କର୍କଟ ଏବଂ ଏହାର ମୃତ୍ୟୁକୁ ରୋକିବା ପାଇଁ ଅଧ୍ୟୟନ କରୁଥିବା ବୈଜ୍ଞାନିକ ଦଳ ଏକ ବଡ଼ ସଫଳତା ପାଇଛନ୍ତି। ରିପୋର୍ଟ ଅନୁଯାୟୀ, ଗବେଷକମାନେ ଏକ ଔଷଧ ଆବିଷ୍କାର କରିଛନ୍ତି ଯାହା ଫୁସଫୁସ କର୍କଟ ହେବାର ଆଶଙ୍କାକୁ ଯଥେଷ୍ଟ କମ କରିପାରେ। ଡ୍ରଗ୍ ନିର୍ମାତା କମ୍ପାନୀ ଆଷ୍ଟ୍ରାଜେନେକା ଏକ ଔଷଧକୁ କ୍ଲିନିକାଲ୍ ପରୀକ୍ଷଣରେ ସଫଳତା ପାଇବାର ଦାବି କରିଛନ୍ତି। ଯାହା ଫୁସଫୁସ କର୍କଟ ମୃତ୍ୟୁକୁ ୫୦% ପର୍ଯ୍ୟନ୍ତ ହ୍ରାସ କରିପାରେ। ଚିକାଗୋରେ ଆମେରିକୀୟ ସୋସାଇଟି ଅଫ୍ କ୍ଲିନିକାଲ୍ ଅଙ୍କୋଲୋଜିର ବାର୍ଷିକ ବୈଠକରେ ପରୀକ୍ଷା ଫଳାଫଳ ଉପସ୍ଥାପିତ କରାଯାଇଛି।
ନ୍ୟୁ ଇଂଲଣ୍ଡ ଜର୍ଣ୍ଣାଲ ଅଫ୍ ମେଡିସିନରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଏହି ଔଷଧର ଦୈନନ୍ଦିନ ବ୍ୟବହାର ଫୁସଫୁସ କର୍କଟ ରୋଗୀଙ୍କ ପାଇଁ ଅସ୍ତ୍ରୋପଚାର ପରେ ମୃତ୍ୟୁ ଆଶଙ୍କାକୁ ଯଥେଷ୍ଟ ମାତ୍ରାରେ ହ୍ରାସ କରିଥିଲା। ଫୁସଫୁସ କର୍କଟ ରୋଗରେ ଆକ୍ରାନ୍ତ ୬୮୨ ରୋଗୀଙ୍କ ଉପରେ ଏହି ଔଷଧ ପ୍ରୟୋଗ କରି ଅଧ୍ୟୟନ କରାଯାଇଥିଲା। ଅଂଶଗ୍ରହଣକାରୀଙ୍କ ପ୍ରାୟ ଅର୍ଦ୍ଧେକଙ୍କୁ ତିନି ବର୍ଷ ପାଇଁ ପ୍ରତିଦିନ ବଟିକା ଦିଆଯାଉଥିବା ବେଳେ ଅନ୍ୟ ଅର୍ଦ୍ଧେକଙ୍କୁ ପ୍ଲେସିବୋ ଦିଆଯାଇଥିଲା। ସେମାନଙ୍କର କର୍କଟ ରୋଗ ଚିହ୍ନଟ ହେବାର ପାଞ୍ଚ ବର୍ଷ ପରେ, ପ୍ଲେସିବୋ ଗୋଷ୍ଠୀର ୭୮% ତୁଳନାରେ ଏହି ଔଷଧ ସେବନ କରିଥିବା ୮୮% ରୋଗୀ ଜୀବିତ ଥିଲେ। ଅନୁସନ୍ଧାନକାରୀମାନେ ଜାଣିବାକୁ ପାଇଲେ ଯେ ଏହି ଔଷଧ ଫୁସଫୁସ କର୍କଟରୁ ମୃତ୍ୟୁ ହେବାର ଆଶଙ୍କା ୫୧% ହ୍ରାସ କରିପାରିବ।
ଆଗାମୀ ପରୀକ୍ଷଣ ଆଧାରରେ ଏହି ଔଷଧକୁ ବିଶ୍ୱର ଅନୁମୋଦନ ମିଳିବ ଏବଂ ସାରା ବିଶ୍ୱରେ ଦ୍ରୁତ ଗତିରେ ବଢୁଥିବା ଫୁସଫୁସ କର୍କଟକୁ ରୋକିବାରେ ଆମେ ବିଶେଷ ସଫଳତା ହାସଲ କରିପାରିବା। ହର୍ବଷ୍ଟର ଅନୁସନ୍ଧାନକାରୀ ଦଳ ମଧ୍ୟ ତିନି ବର୍ଷ ପୂର୍ବେ ଏହି ଔଷଧ ଉପରେ ହୋଇଥିବା ଏକ ଅଧ୍ୟୟନରେ ଜଣାଇଥିଲେ ଯେ ଏହି ଔଷଧ ଟ୍ୟୁମରକୁ ରୋକିବା ଏବଂ କର୍କଟ ମସ୍ତିଷ୍କ, ଯକୃତ, ହାଡକୁ ବ୍ୟାପିବାରେ ରୋକିବାରେ ପ୍ରଭାବଶାଳୀ ହୋଇପାରେ।