ରକ୍ତରଞ୍ଜିତ ହେଲା ରାଜଧାନୀ: ଯୁବକଙ୍କୁ ବାଟରେ ଅଟକାଇ ଦୁଇ ହାତ ଓ ଦୁଇ ଗୋଡ଼କୁ କାଟିଦେଲେ ଦୁର୍ବୃତ୍ତ
ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଆଇନ ଶୃଙ୍ଖଳା ପରିସ୍ଥିତିକୁ ଚ୍ୟାଲେଞ୍ଜ କରି ପୁଣି ଏକ ସାଂଘାତିକ ତଥା ଲୋମହର୍ଷକ କାଣ୍ଡ ଘଟିଛି। ଗତକାଲି ବିଳମ୍ବିତ ରାତିରେ ସହରର ବ୍ୟସ୍ତବହୁଳ ଅଞ୍ଚଳରେ ଜଣେ ଯୁବକଙ୍କୁ ଅତି ନିର୍ମମ ଭାବେ ଗୋଡ଼େଇ ଗୋଡ଼େଇ ହାଣିଛନ୍ତି ସଶସ୍ତ୍ର ଦୁର୍ବୃତ୍ତ। ଆକ୍ରମଣର ବୀଭତ୍ସତା ଏତେ ଭୟଙ୍କର ଥିଲା ଯେ, ଦୁର୍ବୃତ୍ତଙ୍କ ଧାରୁଆ ଅସ୍ତ୍ର ଚୋଟରେ ଯୁବକଙ୍କର ଦୁଇ ହାତ ଏବଂ ଦୁଇ ଗୋଡ଼ ସମ୍ପୂର୍ଣ୍ଣ ରକ୍ତାକ୍ତ ହୋଇ ଛିନ୍ନଭିନ୍ନ ହୋଇଯାଇଛି।
ମିଳିଥିବା ସୂଚନା ମୁତାବକ, ଗୁରୁତର ଆହତ ଯୁବକ ଜଣକ ହେଲେ ସନ୍ଦୀପ ସମର୍ଥ। ରବିବାର ବିଳମ୍ବିତ ରାତିରେ ସେ ଲିଙ୍ଗରାଜ ଥାନା ଅନ୍ତର୍ଗତ ମୂଳାପଡ଼ିଆ ଅଞ୍ଚଳ ଦେଇ ଯାଉଥିବା ବେଳେ ପୂର୍ବରୁ ଛକି ରହିଥିବା କିଛି ଦୁର୍ବୃତ୍ତ ହଠାତ୍ ତାଙ୍କ ରାସ୍ତା ଓଗାଳିଥିଲେ। କିଛି ବୁଝିବା ସୁଝିବା ପୂର୍ବରୁ ସେମାନେ ନିଜ ପାଖରେ ଥିବା ମାରଣାସ୍ତ୍ର କାଢ଼ି ସନ୍ଦୀପଙ୍କ ଉପରକୁ ଆକ୍ରମଣ କରିଥିଲେ। ସନ୍ଦୀପ ନିଜକୁ ରକ୍ଷା କରିବାକୁ ଚେଷ୍ଟା କରିଥିଲେ ମଧ୍ୟ ବିଫଳ ହୋଇଥିଲେ। ଦୁର୍ବୃତ୍ତମାନେ ତାଙ୍କ ହାତ ଓ ଗୋଡ଼କୁ ଲକ୍ଷ୍ୟ କରି ଘନ ଘନ ଛୁରୀ ଓ ଭୁଜାଲି ଚୋଟ ପକାଇଥିଲେ।
ଆକ୍ରମଣ ପରେ ସନ୍ଦୀପ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ସେଠାରେ ପଡ଼ି ରହି ଚିତ୍କାର କରୁଥିଲେ। ଚିତ୍କାର ଶୁଣି ସ୍ଥାନୀୟ ଲୋକେ ଦୌଡ଼ି ଆସିବାରୁ ଦୁର୍ବୃତ୍ତମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ସ୍ଥାନୀୟ ବାସିନ୍ଦା ସଙ୍ଗେ ସଙ୍ଗେ ତାଙ୍କୁ ଉଦ୍ଧାର କରି ଭୁବନେଶ୍ୱରର ଏକ ପ୍ରତିଷ୍ଠିତ ଘରୋଇ ହସ୍ପିଟାଲରେ ଭର୍ତ୍ତି କରିଛନ୍ତି। ବର୍ତ୍ତମାନ ସେଠାରେ ଆଇସିୟୁରେ ତାଙ୍କର ଚିକିତ୍ସା ଚାଲିଥିବା ବେଳେ ଅତ୍ୟଧିକ ରକ୍ତସ୍ରାବ ଯୋଗୁଁ ତାଙ୍କ ସ୍ୱାସ୍ଥ୍ୟାବସ୍ଥା ସଂକଟାପନ୍ନ ଥିବା ଜଣାପଡ଼ିଛି।
ଘଟଣାର ସୂଚନା ପାଇ ଲିଙ୍ଗରାଜ ଥାନା ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଛାନଭିନ୍ନ ଆରମ୍ଭ କରିଛି। ପ୍ରାଥମିକ ତଦନ୍ତରୁ ଏହା କୌଣସି ପୂର୍ବ ଶତ୍ରୁତା କିମ୍ବା ଗୋଷ୍ଠୀଗତ ବିବାଦର କରୁଣ ପରିଣତି ବୋଲି ପୋଲିସ ସନ୍ଦେହ କରୁଛି। ଦୁର୍ବୃତ୍ତମାନେ ସନ୍ଦୀପଙ୍କୁ ଜୀବନରୁ ମାରିଦେବା କିମ୍ବା ସବୁଦିନ ପାଇଁ ପଙ୍ଗୁ କରିଦେବା ଉଦ୍ଦେଶ୍ୟରେ ହିଁ ଏଭଳି ବୀଭତ୍ସ କାଣ୍ଡ ଭିଆଇଛନ୍ତି। ଅଞ୍ଚଳରେ ଲାଗିଥିବା ସିସିଟିଭି କ୍ୟାମେରା ଫୁଟେଜ୍କୁ ଆଧାର କରି ଅଭିଯୁକ୍ତମାନଙ୍କୁ ଚିହ୍ନଟ କରିବା ସହ ସେମାନଙ୍କୁ ଗିରଫ କରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।
