ରାଞ୍ଚି: ଝାରଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ଆରଜେଡ଼ି ମୁଖ୍ୟ ଲାଲୁ ପ୍ରସାଦ ଯାଦବଙ୍କୁ ଭେଟିଛନ୍ତି । ମିଳିତ ଭାବେ ବିହାର ନିର୍ବାଚନ ଲଢ଼ିବା ଲାଗି ଆଲୋଚନା କରିଛନ୍ତି ।
ଶନିବାର ସ୍ଥାନୀୟ ଆରଆଇଏମଏସ ରେ ଆରଜେଡି ସଭାପତି ଲାଲୁ ପ୍ରସାଦଙ୍କୁ ଭେଟି କହିଛନ୍ତି ଯେ ସେମାନେ ବିହାର ନିର୍ବାଚନରେ ଏକାଠି ଲଢ଼ିବେ । ସୋରେନ୍ ପ୍ରସାଦଙ୍କ ସହିତ ଆରଆଇଏମଏସ ନିର୍ଦ୍ଦେଶକଙ୍କ ବଙ୍ଗଳା ଠାରେ ଏକ ଘଣ୍ଟାରୁ ଅଧିକ ସମୟ ଅତିବାହିତ କରିଛନ୍ତି । ରାଜେନ୍ଦ୍ର ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (RIMS) ରୁ ବାହାରକୁ ଆସି ସୋରେନ ଗଣମାଧ୍ୟମକୁ କହିଛନ୍ତି ଯେ ଦୁଇ ଦଳ ବିହାର ନିର୍ବାଚନକୁ ଏକାଠି ଲଢ଼ିବେ ।
ଝାଡଖଣ୍ଡର ସୋରେନଙ୍କ ନେତୃତ୍ୱରେ ମିଳିତ ସରକାରରେ ଆରଜେଡି ଏକ ଅଂଶୀଦାର। ଜେଏମଏମ ବ୍ୟତୀତ କଂଗ୍ରେସ ମଧ୍ୟ ରାଜ୍ୟରେ ସରକାରଙ୍କ ଏକ ଅଂଶ। ଅକ୍ଟୋବର-ନଭେମ୍ବରରେ ମତଦାନ ହେବାର ସମ୍ଭାବନା ଥିବା ବିହାରରେ ଜେଏମ୍ଏମ୍ କେତେ ପ୍ରାର୍ଥୀ ଦେବେ ସେନେଇ ପଚରାଯାଇଥିବା ବେଳେ କିଛି ସମୟ ଅପେକ୍ଷା କରିବାକୁ ସୋରେନ୍ କହିଛନ୍ତି ।
ସୂଚନା ଥାଉ କି ଜେଏମଏମ ଗ୍ରାଣ୍ଡ ଆଲାଇନ୍ସ ଅଧୀନରେ ବିହାରରେ ୧୨ଟି ସିଟ୍ ଦାବି କରିଛି। କିନ୍ତୁ, ସେଠାରେ ବିରୋଧୀ ଦଳର ନେତୃତ୍ୱ ନେଉଥିବା ଆରଜେଡି ସୂଚାଇ ଦେଇଛି ଯେ ଝାଡଖଣ୍ଡ ଭିତ୍ତିକ ଆଞ୍ଚଳିକ ଦଳକୁ ଆରଜେଡ଼ି ୨-୩ରୁ ଅଧିକ ସିଟ୍ ଛାଡିବ ନାହିଁ।
ବିହାରରେ ଥିବା ମହାଗଠବନ୍ଧନ (ଗ୍ରାଣ୍ଡ ଆଲାଇନ୍ସ) ରେ ଆରଜେଡି, କଂଗ୍ରେସ, ପୂର୍ବତନ କେନ୍ଦ୍ର ମନ୍ତ୍ରୀ ଉପେନ୍ଦ୍ର କୁଶୱାହାଙ୍କ ଆରଏଲଏସପି ଏବଂ ବଲିଉଡର ସେଟ୍ ଡିଜାଇନର୍ ମୁକେଶ ସାହନି ଆଦି ଭିଆଇପି ରହିଛନ୍ତି।