ମାତ୍ର ୧୫ କୋଟି ବଜେଟ୍, କମାଇଲା ୯୭୦ କୋଟି: ଚୀନ୍ ବକ୍ସ ଅଫିସରେ ଇତିହାସ ରଚିଥିଲା ଏହି ଭାରତୀୟ ସିନେମା

ମୁମ୍ବାଇ: ବଲିଉଡରେ ଏମିତି ଅନେକ ଫିଲ୍ମ ନିର୍ମାଣ ହୋଇଛି, ଯାହା ଖୁବ୍ କମ୍ ବଜେଟରେ ତିଆରି ହୋଇ ବକ୍ସ ଅଫିସରେ ଆୟର ନୂଆ ରେକର୍ଡ ସୃଷ୍ଟି କରିଛି। ସେଥିମଧ୍ୟରୁ ଆଜିଠାରୁ ପ୍ରାୟ ୯ ବର୍ଷ ପୂର୍ବେ ଅର୍ଥାତ୍ ୨୦୧୭ ମସିହାରେ ମୁକ୍ତିଲାଭ କରିଥିବା ଆମିର ଖାନଙ୍କ ପ୍ରଯୋଜିତ ଫିଲ୍ମ ‘ସିକ୍ରେଟ୍ ସୁପରଷ୍ଟାର୍’ ଅନ୍ୟତମ। ଏହି ଫିଲ୍ମଟି କେବଳ ଭାରତରେ ନୁହେଁ, ବରଂ ପଡ଼ୋଶୀ ଦେଶ ଚୀନରେ ମଧ୍ୟ ବକ୍ସ ଅଫିସରେ ଇତିହାସ ରଚିଥିଲା। ମାତ୍ର ୧୫ କୋଟି ଟଙ୍କାର ସୀମିତ ବ୍ୟୟରେ ନିର୍ମିତ ଏହି ଫିଲ୍ମଟି ସାରା ବିଶ୍ୱରେ ପ୍ରାୟ ୯୭୦ କୋଟି ଟଙ୍କା ଆୟ କରି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା ।

ଅଦ୍ୱୈତ ଚନ୍ଦନଙ୍କ ଦ୍ୱାରା ନିର୍ଦ୍ଦେଶିତ ଏହି ଫିଲ୍ମରେ ମୁଖ୍ୟ ଭୂମିକାରେ ଅଭିନୟ କରିଥିଲେ ‘ଦଙ୍ଗଲ’ ଫେମ୍ କିଶୋରୀ ଅଭିନେତ୍ରୀ ଜାଇରା ୱାସିମ୍। ତାଙ୍କ ସହ ମେହେର ବିଜ୍ ତାଙ୍କ ମା’ ଭୂମିକାରେ ଥିବା ବେଳେ ବଲିଉଡ୍ ସୁପରଷ୍ଟାର ଆମିର ଖାନ ଏକ ସ୍ୱତନ୍ତ୍ର ତଥା ମଜାଳିଆ ଚରିତ୍ର ‘ଶକ୍ତି କୁମାର’ ରୂପେ ନଜର ଆସିଥିଲେ । ଫିଲ୍ମର କାହାଣୀ ଇନସିଆ ନାମକ ଏକ ୧୪ ବର୍ଷର ମୁସଲମାନ ଝିଅ ଉପରେ ପର୍ଯ୍ୟବେସିତ ଥିଲା। ଜଣେ ଲୋକପ୍ରିୟ ଗାୟିକା ହେବାର ସ୍ୱପ୍ନ ଦେଖୁଥିବା ଇନସିଆଙ୍କ ପାଇଁ ତାଙ୍କ ରକ୍ଷଣଶୀଳ ତଥା କଠୋର ପିତା ଥିଲେ ସବୁଠାରୁ ବଡ଼ ପ୍ରତିବନ୍ଧକ। ତେଣୁ ସେ ନିଜର ପରିଚୟ ଲୁଚାଇବା ପାଇଁ ବୁର୍ଖା ପିନ୍ଧି ୟୁଟ୍ୟୁବରେ ନିଜର ଗୀତ ଅପଲୋଡ୍ କରୁଥିଲେ ଏବଂ ଖୁବ୍ କମ୍ ଦିନରେ ଏକ ଇଣ୍ଟରନେଟ୍ ସେନସେସନ୍ ପାଲଟିଯାଇଥିଲେ ।

ଭାରତୀୟ ବକ୍ସ ଅଫିସରେ ସଫଳ ହେବା ସହ ‘ସିକ୍ରେଟ୍ ସୁପରଷ୍ଟାର୍’ ଚୀନରେ ଟିକେଟ୍ ଘରର ସବୁ ରେକର୍ଡ ଭାଙ୍ଗିଥିଲା। ଚୀନରେ ଆମିର ଖାନଙ୍କ ବିପୁଳ ଲୋକପ୍ରିୟତା ଏବଂ ଫିଲ୍ମରେ ଥିବା ଏକ ଭାବପ୍ରବଣ କାହାଣୀ— ବିଶେଷକରି ମା’ ଓ ଝିଅର ସ୍ନେହଭରା ସମ୍ପର୍କ ତଥା ପିତୃସତ୍ତାକ ସମାଜ ବିରୋଧରେ ସ୍ୱର ଉତ୍ତୋଳନ, ଚୀନ୍ ଦର୍ଶକଙ୍କ ହୃଦୟ ଜିଣିବାରେ ବେଶ୍ ସଫଳ ହୋଇଥିଲା। ରିପୋର୍ଟ ଅନୁଯାୟୀ, କେବଳ ଚୀନ୍ ବକ୍ସ ଅଫିସରୁ ହିଁ ଏହି ଫିଲ୍ମଟି ପ୍ରାୟ ୭୦୦ କୋଟିରୁ ଅଧିକ ଟଙ୍କା ଆୟ କରିଥିଲା, ଯାହାକି ଫିଲ୍ମର ମୋଟ ଆୟର ଏକ ବହୁତ ବଡ଼ ଅଂଶ ଥିଲା ।

ଆଜି ବି ବଲିଉଡର ସବୁଠାରୁ ଅଧିକ ଲାଭଦାୟକ ସିନେମା ତାଲିକାରେ ଏହି ଫିଲ୍ମର ସ୍ଥାନ ସ୍ୱତନ୍ତ୍ର ରହିଛି । ବିନା କୌଣସି ବଡ଼ ଆକ୍ସନ୍ ଦୃଶ୍ୟ କିମ୍ବା ବ୍ୟୟବହୁଳ ଭିଏଫଏକ୍ସ ରେ କେବଳ ଏକ ଶକ୍ତିଶାଳୀ କାହାଣୀ ବଳରେ କିପରି ଏକ ବିଶ୍ୱସ୍ତରୀୟ ବ୍ଲକବଷ୍ଟର ତିଆରି କରାଯାଇପାରିବ, ତାହା ଏହି ସିନେମା ପ୍ରମାଣିତ କରିଥିଲା। ଦୀର୍ଘ ୯ ବର୍ଷ ପରେ ମଧ୍ୟ ‘ସିକ୍ରେଟ୍ ସୁପରଷ୍ଟାର୍’ର ଏହି ଐତିହାସିକ ବ୍ୟବସାୟିକ ସଫଳତା ଭାରତୀୟ ସିନେମା ଜଗତ ପାଇଁ ଏକ ବଡ଼ ଉଦାହରଣ ହୋଇ ରହିଛି ।