ଘରର ଏହି ନିର୍ଦ୍ଦିଷ୍ଟ କୋଣରେ ଯୋତା ରଖୁଛନ୍ତି କି? ସାବଧାନ! ଏମିତି ଭୁଲ୍ ଆଣିପାରେ କାଙ୍ଗାଳପଣ ଓ ଅଶାନ୍ତି

ଭୁବନେଶ୍ୱର: ଆମେ ସମସ୍ତେ ଘରକୁ ସୁନ୍ଦର ଭାବେ ସଜାଇବା ସହ ସୁଖ-ସମୃଦ୍ଧି ପାଇଁ ବାସ୍ତୁ ଶାସ୍ତ୍ରର ଅନେକ ନିୟମ ପାଳନ କରିଥାଉ। କିନ୍ତୁ ଅନେକ ସମୟରେ ଘରର ଏକ ଅତି ସାଧାରଣ ଜିନିଷ ପ୍ରତି ଆମେ ନଜରଅନ୍ଦାଜ କରିଦେଉ, ଯାହା ହେଉଛି ଆମର ଯୋତା-ଚପଲ ଏବଂ ଏହାକୁ ରଖିବା ପାଇଁ ବ୍ୟବହୃତ ହେଉଥିବା ଯୋତା ଷ୍ଟାଣ୍ଡ।

ବାସ୍ତୁ ଶାସ୍ତ୍ର ଅନୁଯାୟୀ, ଯୋତା-ଚପଲ ବାହାରର ଧୂଳିମଳି ସହ ନକାରାତ୍ମକ ଶକ୍ତି ବହନ କରିଥାଏ। ତେଣୁ ଘର ଭିତରେ ଏହାକୁ ଭୁଲ୍ ଦିଗରେ ରଖିଲେ ତାହା ସିଧାସଳଖ ପରିବାରର ଆର୍ଥିକ ସ୍ଥିତି, ସ୍ୱାସ୍ଥ୍ୟ ଏବଂ ସୁଖଶାନ୍ତି ଉପରେ ଗୁରୁତର ପ୍ରଭାବ ପକାଇଥାଏ। ଏହି ସମସ୍ୟାରୁ ରକ୍ଷା ପାଇବା ପାଇଁ ବାସ୍ତୁ ବିଜ୍ଞାନରେ କେତେକ ସହଜ ତଥା ଗୁରୁତ୍ୱପୂର୍ଣ୍ଣ ନିୟମ ବିଷୟରେ କୁହାଯାଇଛି।

ନିୟମ ଅନୁଯାୟୀ, ଘରର ପଶ୍ଚିମ ଏବଂ ଦକ୍ଷିଣ-ପଶ୍ଚିମ କୋଣକୁ ଯୋତା ଷ୍ଟାଣ୍ଡ ରଖିବା ପାଇଁ ସବୁଠାରୁ ଉତ୍ତମ ସ୍ଥାନ ଭାବେ ବିବେଚନା କରାଯାଏ। ଏହି ଦିଗଗୁଡ଼ିକ ପ୍ରକୃତିଗତ ଭାବେ ବାହାରୁ ଆସୁଥିବା ଭାରି ବା ନକାରାତ୍ମକ ପ୍ରଭାବକୁ ନିୟନ୍ତ୍ରଣ କରିବାରେ ସକ୍ଷମ ହୋଇଥାନ୍ତି। ଯଦି ଆପଣ ଘରର ମୁଖ୍ୟ ଦ୍ୱାର ନିକଟରେ ଯୋତା ରଖୁଛନ୍ତି, ତେବେ ତାହାକୁ କେବେ ହେଲେ ପ୍ରବେଶ ଦ୍ୱାରର ସିଧା ସମ୍ମୁଖରେ ନରଖି, କାନ୍ଥର ଗୋଟିଏ ପାର୍ଶ୍ୱରେ ଲୁଚାଇ ରଖିବା ଉଚିତ୍।

ଅପରପକ୍ଷରେ, କେଉଁ କେଉଁ ସ୍ଥାନରେ ଯୋତା ଆଦୌ ରଖିବା କଥା ନୁହେଁ, ତାହା ଜାଣିବା ମଧ୍ୟ ଅତ୍ୟନ୍ତ ଜରୁରୀ। ଘରର ଉତ୍ତର ଏବଂ ଉତ୍ତର-ପୂର୍ବ ବା ଐଶାଣ୍ୟ କୋଣକୁ ସବୁଠାରୁ ପବିତ୍ର ଓ ଦେବତାଙ୍କ ସ୍ଥାନ ବୋଲି ଧରାଯାଏ। ଏହି ଦିଗରେ ଭୁଲ୍‌ରେ ମଧ୍ୟ ଜୁତା କିମ୍ବା ମଇଳା ଜିନିଷ ରଖିଲେ ଘରକୁ ଆସୁଥିବା ସକାରାତ୍ମକ ଶକ୍ତି ବାଧାପ୍ରାପ୍ତ ହୁଏ ଏବଂ ବ୍ୟବସାୟରେ ବଡ଼ ଧରଣର ଆର୍ଥିକ କ୍ଷତି ସହ ପରିବାର ସଦସ୍ୟଙ୍କ ମାନସିକ ଚିନ୍ତା ବଢ଼ିଥାଏ।

ଏହା ବ୍ୟତୀତ ଘରର ରୋଷେଇ ଘର, ପୂଜା ଘର କିମ୍ବା ଶୋଇବା ଘର ଭିତରେ ଯୋତା ଷ୍ଟାଣ୍ଡ ରଖିଲେ ଦାମ୍ପତ୍ୟ ଜୀବନରେ କଳହ ସୃଷ୍ଟି ହେବାର ଆଶଙ୍କା ଥାଏ। ଦିଗ ବ୍ୟତୀତ ଯୋତା ଷ୍ଟାଣ୍ଡର ଡିଜାଇନ୍ ଏବଂ ସେଗୁଡ଼ିକର ସଫାସୁତୁରା ଉପରେ ଧ୍ୟାନ ଦେବା ଆବଶ୍ୟକ।