ନୂଆଦିଲ୍ଲୀ: ତାଲିବାନକୁ ଆଇଏମ୍ଏଫ୍ର ବଡ ଝଟ୍କା। ଆଫଗାନିସ୍ତାନକୁ ନିୟନ୍ତ୍ରଣ କରିଥିବା ତାଲିବାନକୁ ଆନ୍ତର୍ଜାତୀୟ ମୁଦ୍ରା ପାଣ୍ଠି ବଡ ଝଟ୍କା ଦେଇଛି। ଆଇଏମ୍ଏଫ୍ ବର୍ତ୍ତମାନ ପର୍ଯ୍ୟନ୍ତ ଆଫଗାନିସ୍ତାନ ସହ ସମ୍ପର୍କ ବିଚ୍ଛିନ୍ନ କରି ଦେଇଛି। ତାଲିବାନ ନେତୃତ୍ୱାଧୀନ ସରକାରକୁ ସ୍ୱୀକୃତି ଦେବାରେ ଅନ୍ତର୍ଜାତୀୟ ସମୁଦାୟରେ ସ୍ପଷ୍ଟତା ନହେବା ପର୍ଯ୍ୟନ୍ତ ଆଫଗାନିସ୍ତାନ ସହ ଏହାର ଯୋଗାଯୋଗ ସ୍ଥଗିତ ରହିବ ବୋଲି ଆଇଏମ୍ଏଫ୍ କହିଛି।
ଆଫଗାନିସ୍ତାନର ଅର୍ଥନୈତିକ ପରିସ୍ଥିତିକୁ ନେଇ ଏହା ଗଭୀର ଚିନ୍ତାର ବିଷୟ ବୈଶ୍ବକ ସଂସ୍ଥା କହିଛି। ଦେଶରେ କୌଣସି ମାନବିକ ସଙ୍କଟ ରୋକିବା ପାଇଁ ତୁରନ୍ତ ପଦକ୍ଷେପ ନେବାକୁ ଆନ୍ତର୍ଜାତୀୟ ସମୁଦାୟକୁ ଅନୁରୋଧ କରିଛି।
ଆଇଏମ୍ଏଫ୍ ମୁଖପାତ୍ର ଗେରି ରାଇସ୍ ଗୁରୁବାର ଗଣମାଧ୍ୟମକୁ କହିଛନ୍ତି ଯେ ଆଫଗାନିସ୍ତାନ ସହ ଆମର ଯୋଗଦାନକୁ ଅନ୍ତର୍ଜାତୀୟ ସମ୍ପ୍ରଦାୟ ମଧ୍ୟରେ ସ୍ପଷ୍ଟତା ନହେବା ପର୍ଯ୍ୟନ୍ତ ସ୍ଥଗିତ ରଖାଯାଇଛି। ସେ କହିଛନ୍ତି, ଆଫଗାନିସ୍ତାନରେ ସରକାରଙ୍କ ସ୍ୱୀକୃତି ସମ୍ପର୍କରେ ଆମେ ଅନ୍ତର୍ଜାତୀୟ ସମୁଦାୟ ଦ୍ୱାରା ମାର୍ଗଦର୍ଶନ କରୁଛୁ ଏବଂ ବର୍ତ୍ତମାନ ଆମର କୌଣସି ସ୍ପଷ୍ଟତା ନାହିଁ। ତେଣୁ, ସେଠାରେ ଆଇଏମ୍ଏଫ୍ କାର୍ଯ୍ୟକ୍ରମ ବନ୍ଦ ରଖାଯାଇଛି।
ତାଲିବାନ ୧୫ ଅଗଷ୍ଟରେ ଆଫଗାନିସ୍ତାନକୁ କାବୁ କରିଥିଲା। ସେବେଠାରୁ ଦେଶର ଅବସ୍ଥା ଦିନକୁ ଦିନ ବିଗିଡିବାରେ ଲାଗିଛି। ଅନ୍ୟପକ୍ଷରେ, ରୁଷ୍, ଚୀନ୍, ପାକିସ୍ତାନ, ଇରାନ ଏବଂ ତୁର୍କୀ ଭଳି ଦେଶ ତାଲିବାନକୁ ସୁଯୋଗ ଦେବା କଥା କହିଛନ୍ତି, କିନ୍ତୁ ଏପର୍ଯ୍ୟନ୍ତ କୌଣସି ଦେଶ ତାଲିବାନ ସରକାରଙ୍କୁ ଆନୁଷ୍ଠାନିକ ଭାବେ ସ୍ୱୀକାର କରିନାହାଁନ୍ତି।