ଝାଡ଼ଖଣ୍ଡ ଓ କର୍ଣ୍ଣାଟକରେ ପ୍ରଶ୍ନପତ୍ର ଲିକ୍: ରାହୁଲ ଗାନ୍ଧୀଙ୍କୁ ଟାର୍ଗେଟ କଲା ବିଜେପି
ନୂଆଦିଲ୍ଲୀ: ଝାଡ଼ଖଣ୍ଡ ଏବଂ କର୍ଣ୍ଣାଟକରେ ଘଟିଥିବା ପ୍ରଶ୍ନପତ୍ର ଲିକ୍ ବା ପେପର ଲିକ୍ ଘଟଣାକୁ ନେଇ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଉପରେ ପ୍ରବଳ ବର୍ଷିଛି ଭାରତୀୟ ଜନତା ପାର୍ଟି (ବିଜେପି)। ନୂଆଦିଲ୍ଲୀରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବିଜେପିର ବରିଷ୍ଠ ନେତା ତଥା ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର କଂଗ୍ରେସର ଦୋମୁଁହା ନୀତିକୁ କଡ଼ା ଭାଷାରେ ସମାଲୋଚନା କରିଛନ୍ତି।
ସମ୍ବିତ ପାତ୍ର ଅଭିଯୋଗ କରିଛନ୍ତି ଯେ, କଂଗ୍ରେସ ଓ ଏହାର ସହଯୋଗୀ ଦଳ ଶାସନ କରୁଥିବା ରାଜ୍ୟଗୁଡ଼ିକରେ ବାରମ୍ବାର ପରୀକ୍ଷା ପ୍ରଶ୍ନପତ୍ର ଲିକ୍ ହେଉଛି। ଝାଡ଼ଖଣ୍ଡରେ ଜେଏମ୍ଏମ୍ ଓ କଂଗ୍ରେସର ମେଣ୍ଟ ସରକାର ଥିବା ବେଳେ, ସେଠାରେ ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖୋଲାଖୋଲି ଖେଳ ଖେଳାଯାଉଛି। ସେହିପରି କର୍ଣ୍ଣାଟକରେ କଂଗ୍ରେସ ସରକାର ଅମଳରେ ମଧ୍ୟ ସମାନ ବିଶୃଙ୍ଖଳା ଓ ଦୁର୍ନୀତି ଦେଖିବାକୁ ମିଳିଛି। ନିଟ୍ ଭଳି ପରୀକ୍ଷାକୁ ନେଇ କେନ୍ଦ୍ର ସରକାରଙ୍କୁ ଘନଘନ ଘେରୁଥିବା ରାହୁଲ ଗାନ୍ଧୀ ଏବେ ନିଜ ଶାସିତ ଓ ମେଣ୍ଟ ରାଜ୍ୟରେ ହେଉଥିବା ପେପର ଲିକ୍ ଉପରେ କାହିଁକି ଚୁପ୍ ବସିଛନ୍ତି ବୋଲି ସେ ସିଧାସଳଖ ପ୍ରଶ୍ନ କରିଛନ୍ତି।
ଯୁବବର୍ଗଙ୍କ ଭବିଷ୍ୟତକୁ ନେଇ କେବଳ ରାଜନୀତି କରୁଥିବା ରାହୁଲଙ୍କର ଏହା ହେଉଛି ପ୍ରକୃତ ସ୍ୱରୂପ ବୋଲି ବିଜେପି ଆକ୍ଷେପ କରିଛି। ରାଜ୍ୟ ସରକାରଙ୍କ ଅପାରଗତା ତଥା ଦୁର୍ନୀତିଗ୍ରସ୍ତ ବ୍ୟବସ୍ଥା ଯୋଗୁଁ ଲକ୍ଷ ଲକ୍ଷ ମେଧାବୀ ଛାତ୍ରଛାତ୍ରୀ ଆଜି ନିରାଶ ହେଉଛନ୍ତି ବୋଲି ସମ୍ବିତ ପାତ୍ର କହିଛନ୍ତି। ଏହି ପ୍ରସଙ୍ଗରେ ରାଜ୍ୟ ସରକାରମାନଙ୍କ ବିଫଳତାକୁ ଟାର୍ଗେଟ୍ କରିବା ସହ ଘଟଣାରେ ସମ୍ପୃକ୍ତ ଥିବା ମାଫିଆ ଏବଂ ଦୋଷୀମାନଙ୍କ ବିରୋଧରେ ତୁରନ୍ତ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଜେପି ପକ୍ଷରୁ ଦାବି କରାଯାଇଛି।
