ରାଉରକେଲା: ଜେଏସପି ଫାଉଣ୍ଡେସନ ଏବଂ ଦିଲୀପ ତିର୍କି ସ୍ପୋର୍ଟସ ରିସର୍ଚ୍ଚ ଏବଂ ଡେଭେଲପମେଣ୍ଟ ଫାଉଣ୍ଡେସନ(ଡିଟିଏସଆରଡିଏଫ୍)ର ମିଳିତ ଆନୁକୂଲ୍ୟରେ ଗ୍ରାମାଞ୍ଚଳରେ ତୃଣମୂଳ ହକିକୁ ପ୍ରୋତ୍ସାହିତ କରିବା ପାଇଁ ରାଉରକେଲାର ବିଜୁ ପଟ୍ଟନାୟକ ହକି ଷ୍ଟାଡ଼ିୟମ୍ ଠାରେ ଆଜି ମେଗା କାର୍ଯ୍ୟକ୍ରମ ଶୁଭାରମ୍ଭ ହୋଇଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୁନ୍ଦରଗଡ ଜିଲ୍ଲାର ତୃଣମୂଳ ହକିର ବିକାଶ ତଥା ପ୍ରଚାର ପାଇଁ ଭର୍ଚୁଆଲ ମୋଡରେ ଏହି ମେଗା କାର୍ଯ୍ୟକ୍ରମ ‘ଗୋଟିଏ ପାଦ ଆଗକୁ’ ଶୁଭାରମ୍ଭ କରିଛନ୍ତି। ଦିଲୀପ ତିର୍କି ସ୍ପୋର୍ଟସ ରିସର୍ଚ୍ଚ ଆଣ୍ଡ ଡେଭଲପମେଣ୍ଟ ଫାଉଣ୍ଡେସନଙ୍କ ସହଯୋଗରେ ଜେଏସପି ଫାଉଣ୍ଡେସନ ଦ୍ବାରା ଆୟୋଜିତ ଏହି କାର୍ଯ୍ୟକ୍ରମରେ ଜିଲାର ବିଭିନ୍ନ ଗ୍ରାମାଞ୍ଚଳରେ ହକି ପ୍ରତିଭା ଅନ୍ବେଷଣ କରିବାକୁ ଲକ୍ଷ୍ୟ ରଖାଯାଇଛି।
ମୁଖ୍ୟମନ୍ତ୍ରୀ ତାଙ୍କ ଭିଡିଓ ବାର୍ତ୍ତାରେ ଜେଏସପି ଫାଉଣ୍ଡେସନ ଏବଂ ଡିଟିଏସଆରଡିଏଫର ଉଦ୍ୟମକୁ ପ୍ରଶଂସା କରିବା ସହ ଏହା ତୃଣମୂଳ ସ୍ତରରେ ହକିକୁ ଆହୁରି ମଜବୁତ କରିବ ବୋଲି କହିଛନ୍ତି।
ଆୟୋଜିତ କାର୍ଯ୍ୟକ୍ରମରେ ଶ୍ରମ ଓ କର୍ମଚାରୀ ରାଜ୍ୟ ବୀମା ମନ୍ତ୍ରୀ ସାରଦା ପ୍ରସାଦ ନାୟକ, ଦକ୍ଷତା ବିକାଶ ଏବଂ ବୈଷୟିକ ଶିକ୍ଷା ମନ୍ତ୍ରୀ ପ୍ରୀତି ରଂଜନ ଘଡାଇ ଏବଂ କ୍ରୀଡ଼ା ଓ ଯୁବ ସେବା ମନ୍ତ୍ରୀ ତୁଷାରକାନ୍ତି ବେହେରା ଏବଂ ଡିଟିଏସଆରଡିଏଫ୍ ପଦ୍ମଶ୍ରୀ ଅଧ୍ୟକ୍ଷ ଡକ୍ଟର ଦିଲିପ ତିର୍କୀ ରାଉରକେଲା ସ୍ଥିତ ବିଜୁ ପଟ୍ଟନାୟକ ହକି ଷ୍ଟାଡିୟମରେ ଖେଳାଳିଙ୍କୁ ଉତ୍ସାହିତ କରିଥିଲେ । ଜିନ୍ଦଲ ଷ୍ଟିଲ ଆଣ୍ଡ ପାୱାରର ଅଧ୍ୟକ୍ଷ ନବୀନ ଜିନ୍ଦଲ ଏବଂ ଜେଏସପି ଫାଉଣ୍ଡେସନର ଚେୟାରମ୍ୟାନ୍ ଶାଲୁ ଜିନ୍ଦଲ ତୃଣମୂଳ ହକିକୁ ସମର୍ଥନ କରିବା ଏବଂ ହକିର ଭବିଷ୍ୟତ ଗଠନ ପାଇଁ ଏହି ପଦକ୍ଷେପକୁ ରୂପାନ୍ତର କରିବା ପାଇଁ ସେମାନଙ୍କ ବାର୍ତ୍ତାରେ କହିଛନ୍ତି । ଏହି କାର୍ଯ୍ୟକ୍ରମରେ ୨୧୫ଟି ଗାଁରୁ ୧୫ ବର୍ଷରୁ କମ୍ ୫୦୦୦ ରୁ ଅଧିକ ଖେଳାଳି ଯୋଗ ଦେଇଥିଲେ ।
ତାଙ୍କ ବାର୍ତ୍ତାରେ ଶାଲୁ ଜିନ୍ଦଲ କହିଛନ୍ତି “ଯଦି ପିଲାମାନଙ୍କୁ ସଠିକ୍ ବୟସରେ ଖେଳିବା ପାଇଁ ଉପଯୁକ୍ତ ତାଲିମ ଏବଂ ଅନ୍ୟାନ୍ୟ ଆବଶ୍ୟକୀୟ ଶିକ୍ଷଣ ପରିବେଶ ଯୋଗାଇ ଦିଆଯାଏ ତେବେ ଓଡ଼ିଶା ହକି ବହୁତ ଦୂର ଯିବ । ଆମେ ଗାଁରେ ଯୁବ ହକି ପ୍ରତିଭା ପ୍ରତିପୋଷଣ ଏବଂ ପୋଷଣ ପାଇଁ ପ୍ରତିବଦ୍ଧ। ଜେଏସପି ଫାଉଣ୍ଡେସନ୍ ଏବଂ ଡିଟିଏସଆରଡିଏଫର ମିଳିତ ପ୍ରୟାସରେ ଆମେ ରାଜ୍ୟରେ ତୃଣମୂଳ ସ୍ତରର ହକିର ଗୁଣବତ୍ତା ପରିବର୍ତ୍ତନ କରିବୁ ବୋଲି ସେ କହିଛନ୍ତି । ସେ ଏହା ମଧ୍ୟ କହିଛନ୍ତି ଯେ ଏହା ମୋ ପାଇଁ ଏକ କାର୍ଯ୍ୟକ୍ରମ ନୁହେଁ, ଏହା ଏକ ଆନ୍ଦୋଳନ, ହକି କ୍ଷେତ୍ରରେ ଏକ ବୃହତ ପରିବର୍ତ୍ତନର ଆରମ୍ଭ। ମୁଁ ନିଶ୍ଚିତ ଯେ ଏହି ପଦକ୍ଷେପ ଗ୍ରାମୀଣ ଓଡିଶାରୁ ଜାତୀୟ ତଥା ଆନ୍ତର୍ଜାତୀୟ ଖେଳାଳି ସୃଷ୍ଟି କରିବ ।
ନବୀନ ଜିନ୍ଦଲ କେବଳ ଓଡ଼ିଶାରେ ନୁହେଁ ସମଗ୍ର ଦେଶରେ ହକିକୁ ପ୍ରୋତ୍ସାହିତ କରିବା ପାଇଁ ମୁଖ୍ୟମନ୍ତ୍ରୀଙ୍କ ହକି ପ୍ରତି ରହିଥିବା ପ୍ରତିବଦ୍ଧତାକୁ ଭୂୟସୀ ପ୍ରଶଂସା କରିଥିଲେ। ସେ ଆଶ୍ୱାସନା ଦେଇଛନ୍ତି ଯେ ଓଡ଼ିଶାର ସରକାରଙ୍କ ଉଦ୍ୟମ ସହିତ ଜେଏସପି ହକିର ପ୍ରୋତ୍ସାହନ ତଥା ଅଧିକ ଗ୍ରାମୀଣ ପ୍ରତିଭାର ବିକାଶ ତଥା ଭାରତରେ ହକିର ଭବିଷ୍ୟତ ଗଠନ ତଥା ବଞ୍ଚାଇ ରଖିବା ପାଇଁ ସମସ୍ତ ଆବଶ୍ୟକୀୟ ସହାୟତା ପ୍ରଦାନ କରିବ ବୋଲି ସେ କହିଥିଲେ ।
ଏହି ଅବସରରେ ପଦ୍ମଶ୍ରୀ ଡକ୍ଟର ଦିଲିପ ତିର୍କୀ କହିଲେ ତୃଣମୂଳ ସ୍ତରରେ ହକି ହେଉଛି ଭିତ୍ତିପ୍ରସ୍ତର, ଯଦି ଆମେ ଏହାକୁ ମଜବୁତ କରିବା, ତେବେ ଆମେ କେବେ ପଛକୁ ଫେରି ଚାହିଁବୁ ନାହିଁ । ଆମର ପ୍ରଥମ ଦାୟିତ୍ୱ ସଠିକ୍ ପ୍ରତିଭା ଖୋଜିବା ଏବଂ ସେମାନଙ୍କୁ ସଠିକ୍ ଭାବେ ତାଲିମ୍ ଦେବା, ଯାହାଦ୍ୱାରା କୌଣସି ଭଲ ଖେଳାଳିଙ୍କୁ ଛାଡ଼ି ଦିଆଯିବ ନାହିଁ ବୋଲି ସେ କହିଥିଲେ ।
ତୃଣମୂଳ ହକିକୁ ଉତ୍ସାହିତ କରିବା ପାଇଁ ଓଡ଼ିଶା ସରକାର ସୁନ୍ଦରଗଡର ପ୍ରତ୍ୟେକ ରାଜସ୍ୱ ବ୍ଲକରେ ଆଷ୍ଟ୍ରୋଟର୍ଫ୍ ନିର୍ମାଣ କରିଛନ୍ତି । ଡିଟିଏସଆରଡିଏଫ୍ ତୃଣମୂଳ ସ୍ତରରେ ପ୍ରତିଭାମାନଙ୍କୁ ଏକତ୍ର କରି ଚିହ୍ନଟ କରିଥିବା ବେଳେ ଜେଏସପି ଫାଉଣ୍ଡେସନ ଜିଲ୍ଲାର ୧୦ଂଟି ରାଜସ୍ୱ ବ୍ଲକରେ ୫୦୦୦ ଉଦୀୟମାନ ହକି ଖେଳାଳିଙ୍କୁ ହକି କିଟ୍, ହକି ଷ୍ଟିକ୍ସ, ବଲ୍ ଏବଂ ଜର୍ସି ପ୍ରଦାନ କରିଥିଲେ ।
ବିଧାୟକ ସୁବ୍ରତ ତରାଇ, ସୁନ୍ଦରଗଡ ଏସଡିସି ଚେୟାରମ୍ୟାନ୍ ବିନୟ ଟପ୍ପୋ, ପୂର୍ବତନ ମନ୍ତ୍ରୀ ମଙ୍ଗଳା କିସାନ, ଅଲିମ୍ପିଆନ ତଥା ହକି କିମ୍ବଦନ୍ତୀ ଧ୍ଯାନଚାନ୍ଦ ଅଶୋକ କୁମାର, ବିରେନ୍ଦ୍ର ଲାକ୍ରା, ଇଗ୍ନେଶ ତିର୍କି, ପୂର୍ବତନ ହକି ପ୍ରଶିକ୍ଷକ ଦ୍ରୋଣାଚାର୍ଯ୍ୟ ଅଜୟ ବଂଶଲ, ମହିଳା ହକି ତାରକା ସୁଭଦ୍ରା ପ୍ରଧାନ ପ୍ରମୁଖ ଯୋଗ ଦେଇଥିଲେ।
ଗ୍ରାମାଞ୍ଚଳର ଯୁବକମାନଙ୍କୁ ପ୍ରଶିକ୍ଷଣ ଦେବା ଏବଂ ୧୩ ଜଣ ଆନ୍ତର୍ଜାତୀୟ ହକି ଖେଳାଳି ସୃଷ୍ଚି କରିଥିବା ଡୋମିନିକ୍ ଟପ୍ପୋଙ୍କୁ ହକି ପ୍ରତି ତାଙ୍କର ଆଜୀବନ ଯୋଗଦାନ ପାଇଁ ଜେଏସପି ଫାଉଣ୍ଡେସନ ପକ୍ଷରୁ ୨୫ ହଜାର ଟଙ୍କା ଅର୍ଥ ରାଶି ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା ।
ଡିଟିଏସଆରଡିଏଫ୍ ପକ୍ଷରୁ ତାଲିମପ୍ରାପ୍ତ ଉଦୀୟମାନ ଖେଳାଳିଙ୍କୁ ଜେଏସପି ଫାଉଣ୍ଡେସନ୍ କ୍ରୀଡା କିଟ୍, ପୁଷ୍ଟିକର ସହାୟତା ଏବଂ ଅନ୍ୟାନ୍ୟ ଏକାଡେମିକ୍ ସହାୟତା ପ୍ରଦାନ କରିବାକୁ ଘୋଷଣା କରିଥିଲା । ଏତଦବ୍ୟତୀତ ଗ୍ରାମୀଣ ପ୍ରତିଭାର ବିକାଶ ପାଇଁ ଡିଟିଏସଆରଡିଏଫ୍ ବିଭିନ୍ନ କାର୍ଯ୍ୟକ୍ରମ ଏବଂ ଟୁର୍ଣ୍ଣାମେଣ୍ଟ ମଧ୍ୟ ଆୟୋଜନ କରିବ ବୋଲି ସୂଚନା ମିଳିଛି ।
ଜିନ୍ଦଲ ଷ୍ଟିଲ ଆଣ୍ଡ ପାୱାର (ଜେଏସପି)ର ସଭାପତି ତଥା ସିଏସଆର ଗ୍ରୁପ ହେଡ୍ ପ୍ରଶାନ୍ତ ହୋତା ଏହି କାର୍ଯ୍ୟକ୍ରମ ପରିଚାଳନା କରିବା ସହ ଉପସ୍ଥିତ ସମସ୍ତ ଅତିଥି ଏବଂ ଉଦୀୟମାନ କ୍ରୀଡା ପ୍ରତିଭାମାନଙ୍କୁ ଧନ୍ୟବାଦ ଜଣାଇଥିଲେ । ତାଙ୍କ ତତ୍ତ୍ଵାବଧାନରେ ଜେଏସପିର ଡିଜିଏମ ସିଏସଆର ଭର୍ଜିଲ କୁମାରୀ ଲାକ୍ରା, ଡିଟିଏସଆରଡିଏଫ୍ ରାକେଶ ମହାନ୍ତି ଏବଂ ରାଜୁ ମହାନ୍ତି ଏହି କାର୍ଯ୍ୟକ୍ରମକୁ ସଫଳତାର ସହିତ ପରିଚାଳନା କରିଥିଲେ ।