ପ୍ରଫୁଲ୍ଲ କୁମାର ତ୍ରିପାଠୀଙ୍କ ନିୟମିତ ବିଭାଗ : ୧୧୯
ସୁଲଭ ଥିଲା ବେଳେ ବହି
କେହି ତାହା ପଢ଼ଂତିନାହିଁ
ହୋଇଲେ ଦୁର୍ଲଭ ପ୍ରାଚୀନ
ବହି ଆଡ଼କୁ ଯାଏ ଧ୍ୟାନ
ଜୀବିତ ଲେଖକର ମାନ
ପୁରସ୍କାର ଓ ଉପାୟନ
ବ୍ୟତୀତ ଆଦୌ ବଢ଼େନାହିଁ
ଦିଶୁଛି ଅତି ସ୍ପଷ୍ଟ ହୋଇ
ଲେଖକ ହୋଇଲେ ସ୍ବୈଚ୍ଛିକ
ତାଂକର ହାବଭାବ ତକ
ହୋଇପାରେନି ସ୍ବାଭାବିକ
ଏ କଥା ବୁଝଂତି ପାଠକ
ପାଠକେ ନ ପଢ଼ିଲେ ସୁଦ୍ଧା
ସମ୍ମାନପ୍ରାପ୍ତି ପାଇଁ ବାଧା
କେହି ବି ଦେଇପାରେନାହିଁ
ଅଯଥା ବିତର୍କ କିପାଇଁ ?
ଅସଂଖ୍ୟ ପୁରସ୍କୃତ ବହି
କାହିଁ ଖୋଜିଲେ ମିଳେନାହିଁ
ଏକଦା ସମ୍ମାନିତ କବି
କାଳ ଜଳରେ ଗଲେ ଡୁବି
ଭାଷାରେ ଏପରି ଚଳଣି
ନେଲେଣି ଲୋକମାନେ ମାନି
ଲେଖକକୁଳ ଭିନ୍ନ ଜାତି
କେ କାହା ସହ ନ ପଟଂତି
ଖେଳୁଥାଆଂତି ଶବ୍ଦଖେଳ
ଭାବନା ହୁଏନି ପାକଳ
ଲେଖିଲେ ସହଜ ସରଳ
ସାହିତ୍ୟ ପାଇଥାଏ ବଳ
ଯେ ଯେତେ ବେଶି ଯୋଗାଡ଼ିଆ
ଅନେକେ ତାହାର ଆଡ଼ିଆ
ହୋଇ ସୁଖରେ ଚଳୁଥାଂତି
ସ୍ବାଧୀନ ଚିଂତକ କାହାଂତି ?
