ନୂଆଦିଲ୍ଲୀ: ୭୧ତମ ମିସ୍ ୱାର୍ଲ୍ଡ ହେଲେ କ୍ରିଷ୍ଟିନା ପାଇସ୍କୋଭା । ୨୭ ବର୍ଷ ପରେ ଭାରତରେ ଆୟୋଜିତ ମିସ୍ ୱାର୍ଲ୍ଡ ପ୍ରତିଯୋଗିତାରେ ସମସ୍ତଙ୍କୁ ପଛରେ ପକାଇ ଦେଇଛନ୍ତି ଏହି ୨୪ ବର୍ଷୀୟ ସୁନ୍ଦରୀ ।
ମୁମ୍ୱାଇରେ ଆୟୋଜିତ ମିସ୍ ୱାର୍ଲ୍ଡ ପ୍ରତିଯୋଗିତାର ଗ୍ରାଣ୍ଡ ଫାଇନାଲ ଉପରେ ସମସ୍ତଙ୍କ ନଜର ଥିଲା । ଏଥର ମିସ୍ ୱାର୍ଲ୍ଡ ପ୍ରତିଯୋଗିତାରେ
୧୧୫ଟି ଦେଶର ପ୍ରତିଯୋଗୀ ଅଂଶ ଗ୍ରହଣ କରିଥିଲେ । ତେବେ ନିଜର ସୌନ୍ଦର୍ଯ୍ୟ ଓ ବୁଦ୍ଧିମତାରେ ସମସ୍ତ ଦେଶର ସୁନ୍ଦରୀ ପ୍ରତିଯୋଗୀଙ୍କୁ ପଛରେ ପକାଇ ମିସ୍ ଚେକ୍ ରିପବ୍ଲିକ୍ କ୍ରିଷ୍ଟିନା ପାଇସ୍କୋଭା ଏହି ମୁକୁଟ ପିନ୍ଧିଛନ୍ତି ।
ଏହି ମିସ୍ ୱାର୍ଲ୍ଡ ବିୟୁଟି ଉତ୍ସବରେ ଭାରତର ବହୁ ସେଲିବ୍ରେଟି ସାମିଲ ହୋଇଥିଲେ । ନୀତା ଅମ୍ୱାନୀ, କରଣ ଜୋହର ଓ କ୍ରିକେଟର ହରଭଜନ ସିଂଙ୍କୁ ଦେଖିବାକୁ ମିଳିଥିଲା ।
ଏଥିସହ ଜୁରି ସଦସ୍ୟମାନଙ୍କ ମଧ୍ୟରେ ଲୋକପ୍ରିୟ ନ୍ୟୁଜ ଆଙ୍କର ରଜତ ଶର୍ମା, ଫିଲ୍ମ ନିର୍ମାତା ସାଜିଦ୍ ନାଦିଆଡୱାଲା, ଅଭିନେତ୍ରୀ କ୍ରିତି ସାନନ୍, ଓ ବ୍ୟବସାୟୀ ଭିନୀତ ଜୈନ ଥିଲେ ।