ରାୟଗଡା: ରାୟଗଡା ଭିଡ଼ ଆକ୍ରମଣ ଘଟଣାର ଗୁରୁତ୍ୱ ଏବଂ ସମ୍ବେଦନଶୀଳତାକୁ ଦୃଷ୍ଟିରେ ରଖି ମାମଲାକୁ ‘ରେଡ୍ ଫ୍ଲାଗ୍’ ବର୍ଗରେ ଅନ୍ତର୍ଭୁକ୍ତ କରିବାକୁ ନିର୍ଦ୍ଦେଶ ଦେଇଛି ଓଡ଼ିଶା ପୋଲିସ।
ପୋଲିସ ମହାନିର୍ଦ୍ଦେଶକ (ଡିଜିପି) ୱାଇ ବି ଖୁରାନିଆ ଏହ ନିର୍ଦ୍ଦେଶ ଦେଇଛନ୍ତି। ଏଥିସହ ଏହାର ମନିଟରିଂ ଦାୟିତ୍ୱ ‘କ୍ରାଇମ୍ ଆଗେନ୍ଷ୍ଟ୍ ଉଇମେନ୍’ (CAW) ଶାଖାକୁ ପ୍ରଦାନ କରିଛନ୍ତି। ସେହିପରି ମାମଲାକୁ ସର୍ବୋଚ୍ଚ ପ୍ରାଥମିକତା ସହିତ ପରିଚାଳନା କରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏଡିଜି ସିଏଡବ୍ଲ୍ୟୁ (CAW) ଏସ୍. ସାଇନିଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ରାୟଗଡ଼ା ଗସ୍ତ କରିବେ। ଆବଶ୍ୟକ ପଡ଼ିଲେ ତଦନ୍ତ ପାଇଁ ଏହି ଟିମ୍ ଦିଲ୍ଲୀ ମଧ୍ୟ ଯାଇପାରେ ବୋଲି ସୂଚନା ମିଳିଛି।
ରାୟଗଡା ଜିଲ୍ଲା ପୋଲିସ ପୂର୍ବରୁ କଲ୍ୟାଣସିଂହପୁରରେ ଘଟିଥିବା ଭିଡ଼ ହିଂସା ପାଇଁ ‘ରେଡ୍ ଫ୍ଲାଗ୍’ ବର୍ଗୀକରଣ କରିବାକୁ ରାଜ୍ୟ ପୋଲିସ ମୁଖ୍ୟାଳୟକୁ ଅନୁରୋଧ କରିଥିଲା।
ଏହି ଘଟଣା ସହିତ ଜଡିତ ୨୩ ଜଣଙ୍କୁ ଏପର୍ଯ୍ୟନ୍ତ ଗିରଫ କରାଯାଇଛି, ଯେତେବେଳେ ଅନ୍ୟ ଅନେକଙ୍କୁ ଅଟକ ରଖାଯାଇ ପଚରାଉଚରା କରାଯାଉଛି। ଅନେକ ଅଭିଯୁକ୍ତ ଏବେ ବି ଫେରାର ଅଛନ୍ତି। ଅନ୍ୟ ଅଭିଯୁକ୍ତମାନଙ୍କୁ ଖୋଜି ଏବଂ ଗିରଫ କରିବା ପାଇଁ ଏକାଧିକ ସ୍ୱତନ୍ତ୍ର ଦଳ ଗଠନ କରାଯାଇଛି।