ନୂଆଦିଲ୍ଲୀ: ଆଉ ଦିନ କେଇଟା ପରେ ବିହାର ବିଧାନସଭା ନିର୍ବାଚନ । ଏଥିପାଇଁ ସବୁ ଦଳର ପ୍ରାର୍ଥୀ ଆରମ୍ଭ କରିଦେଲେଣି ଜୋରସୋର ପ୍ରଚାର। ନେତା ମନ୍ତ୍ରୀମାନେ ନିଜ ନିଜ ଆଶାୟୀ ପ୍ରାର୍ଥୀଙ୍କ ସମର୍ଥନରେ ଓହ୍ଲାଇ ପ୍ରଚାର କରୁଛନ୍ତି । ବିହାର ମୁଖ୍ୟମନ୍ତ୍ରୀ ନୀତିଶ କୁମାର ମଧ୍ୟ ଜେଡିୟୁ ଆଶାୟୀଙ୍କ ସମର୍ଥନରେ ଜନସଭା କରିବାକୁ ବାହାରିଥିଲେ । ମୁଙ୍ଗେର ଜିଲ୍ଳାରେ ଥିଲା ତାଙ୍କର ଜନସଭା । ହେଲେ ନୀତିଶଙ୍କ ହେଲିକପ୍ଟର ଲ୍ୟାଣ୍ଡିଂ ସମୟରେ ହଇଚଇ ସୃଷ୍ଟି ହୋଇଥିଲା ।
ଜନସଭା ପୂର୍ବରୁ ହେଲିକପ୍ଟର ଲ୍ୟାଣ୍ଡିଂ ବେଳେ ପ୍ରବଳ ପବନ ଯୋଗୁଁ ଉଡି ଯାଇଥିଲା ପେଣ୍ଡାଲ । ସବୁକିଛି ଛିନ୍ଛତ୍ର ହୋଇଯାଇଥିଲା । ଫଳରେ ଜନସଭା ପାଇଁ ଏକାଠି ହୋଇଥିବା ଲୋକେ ଭୟରେ ଏପଟ ସେପଟ ଦୌଡିଥିଲେ । ପରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଘଟଣାସ୍ଥଳରେ ଉପସ୍ଥିତ ପୋଲିସ୍ କର୍ମଚାରୀ ଯେକୌଣସି ମତେ ଏହି ପରିସ୍ଥିତିକୁ କାବୁ କରିଥିଲେ ।
୨୦୨୦ ବିହାର ନିର୍ବାଚନକୁ ନେଇ ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ନିର୍ବାଚନୀ ସଭା ଆରମ୍ଭ ହୋଇ ସାରିଛି। ବୁଧବାର ମୁଖ୍ୟମନ୍ତ୍ରୀ ନୀତିଶ କୁମାର ମୁଙ୍ଗେର ଜିଲ୍ଲାର ତାରାପୁର ବିଧାନସଭା ଆସନରୁ ଜେଡିୟୁ ଆଶାୟୀ ମେୱାଲାଲ ଚୌଧୁରୀଙ୍କ ସପକ୍ଷରେ ନିର୍ବାଚନୀ ଜନସଭା କରିବାକୁ ପହଞ୍ଚିଥିଲେ।