ନିଟ୍ ୨୦୨୬ ପ୍ରସ୍ତୁତି: ଫିଜିକ୍ସ , କେମେଷ୍ଟ୍ରି, ଵାୟୋଲୋଜି … କେଉଁ ବିଷୟ ଆପଣଙ୍କୁ ଦେବ ସର୍ବୋତ୍ତମ ରାଙ୍କ୍?
ଦେଶର ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ସ୍ୱପ୍ନ ଥାଏ ଭବିଷ୍ୟତରେ ଜଣେ ସଫଳ ଡାକ୍ତର ହେବା। ଏହି ସ୍ୱପ୍ନକୁ ସାକାର କରିବା ପାଇଁ ସେମାନେ ଦିନରାତି ଏକ କରି ଦେଶର ସବୁଠାରୁ କଠିନ ପ୍ରବେଶିକା ପରୀକ୍ଷା ‘ନିଟ୍’ (NEET) ପାଇଁ ପ୍ରସ୍ତୁତି କରିଥାନ୍ତି। ପ୍ରତିବର୍ଷ ଏହି ପରୀକ୍ଷା ମାଧ୍ୟମରେ ଏମବିବିଏସ (MBBS), ବିଡିଏସ୍ (BDS) ସମେତ ବିଭିନ୍ନ ମେଡିକାଲ ପାଠ୍ୟକ୍ରମରେ ନାମଲେଖା ହୋଇଥାଏ। ତେବେ ଏକ ସରକାରୀ ତଥା ଶ୍ରେଷ୍ଠ ମେଡିକାଲ କଲେଜରେ ନିଜ ପାଇଁ ସିଟ୍ଟିଏ ପକ୍କା କରିବାକୁ ହେଲେ କେବଳ ପରୀକ୍ଷାରେ ପାସ୍ ହେବା ଯଥେଷ୍ଟ ନୁହେଁ, ବରଂ ଟପ୍ ରାଙ୍କ୍ ରଖିବା ନିହାତି ଜରୁରୀ।
ଆଗାମୀ ଦିନରେ ‘ନିଟ୍ ୨୦୨୬’ ପାଇଁ ପ୍ରସ୍ତୁତ ହେଉଥିବା ଆଶାୟୀଙ୍କ ମନରେ ଏବେଠାରୁ ଏକ ବଡ଼ ପ୍ରଶ୍ନ ଉଙ୍କି ମାରୁଛି — ପଦାର୍ଥ ବିଜ୍ଞାନ (Physics), ରସାୟନ ବିଜ୍ଞାନ (Chemistry) ଏବଂ ଜୀବ ବିଜ୍ଞାନ (Biology) ମଧ୍ୟରୁ କେଉଁ ବିଷୟ ଉପରେ ଅଧିକ ଧ୍ୟାନ ଦେଲେ ରାଙ୍କ୍ ଭଲ ଆସିବ? ଆସନ୍ତୁ ବିଶେଷଜ୍ଞଙ୍କ ମତ ଓ ପରୀକ୍ଷାର ସମୀକରଣକୁ ଟିକିନିଖି ବୁଝିବା।
ପ୍ରଥମେ ବୁଝନ୍ତୁ ପରୀକ୍ଷାର ଢାଞ୍ଚା
ସମ୍ପୂର୍ଣ୍ଣ ନିଟ୍ ପରୀକ୍ଷା ମୋଟ ୭୨୦ ନମ୍ବର ବିଶିଷ୍ଟ ହୋଇଥାଏ।
ଫିଜିକ୍ସ ଓ କେମେଷ୍ଟ୍ରି: ଉଭୟ ବିଷୟରୁ ୪୫ଟି ଲେଖାଏଁ ପ୍ରଶ୍ନ ଆସିଥାଏ। ପ୍ରତ୍ୟେକ ବିଷୟ ପାଇଁ ୧୮୦ ନମ୍ବର ଲେଖାଏଁ ମୋଟ ୩୬୦ ନମ୍ବର ରହିଛି।
ବାୟୋଲୋଜି: ଏଥିରେ ବଟାନୀ ଏବଂ ଜୁଲୋଜିକୁ ମିଶାଇ ସର୍ବାଧିକ ୯୦ଟି ପ୍ରଶ୍ନ ଆସିଥାଏ, ଯାହାର ମୂଲ୍ୟ ହେଉଛି ୩୬୦ ନମ୍ବର।
ବାୟୋଲୋଜି ଦେବ ମୂଳଦୁଆ, କାରଣ ୱେଟେଜ୍ ସର୍ବାଧିକ
ପରୀକ୍ଷାର ମୋଟ ନମ୍ବରରୁ ଠିକ୍ ଅଧା ଅର୍ଥାତ୍ ୫୦ ପ୍ରତିଶତ କେବଳ ବାୟୋଲୋଜି ଉପରେ ନିର୍ଭରଶୀଳ। ତେଣୁ ଏହି ବିଷୟରେ ଦୁର୍ବଳ ଥିବା ଛାତ୍ରଛାତ୍ରୀଙ୍କ ପାଇଁ ନିଟ୍ ସ୍ୱପ୍ନ ପୂରଣ କରିବା ଏକପ୍ରକାର ଅସମ୍ଭବ। ଭଲ ସ୍କୋର୍ କରିବାକୁ ହେଲେ ବାୟୋଲୋଜିରେ ସର୍ବୋଚ୍ଚ ନମ୍ବର ଆଣିବାକୁ ହିଁ ପଡ଼ିବ। ଏହା ହିଁ ଆପଣଙ୍କ ରାଙ୍କ୍ର ଏକ ମଜବୁତ୍ ମୂଳଦୁଆ ପକାଇଥାଏ।
ଫିଜିକ୍ସ ସାଜିପାରେ ‘ଗେମ୍ ଚେଞ୍ଜର’
ଯଦିଓ ବାୟୋଲୋଜିର ୱେଟେଜ୍ ସବୁଠାରୁ ଅଧିକ, ତଥାପି ଅଧିକାଂଶ ମେଡିକାଲ୍ ଛାତ୍ରଛାତ୍ରୀଙ୍କ ପାଇଁ ଫିଜିକ୍ସ ସବୁଠାରୁ କଠିନ ବିଷୟ ହୋଇଥାଏ। ଏଥିରେ ଥିବା କନସେପ୍ଟ, ନ୍ୟୁମେରିକାଲ୍ ଏବଂ ସମୟ ପରିଚାଳନା ଅନେକଙ୍କୁ ଅସୁବିଧାରେ ପକାଇଥାଏ। ପୂର୍ବ ବର୍ଷର ନିଟ୍ ଟପ୍ପରମାନଙ୍କ ମତରେ, ଫିଜିକ୍ସ ହିଁ ପ୍ରକୃତ ଗେମ୍ ଚେଞ୍ଜର। କାରଣ ଅଧିକାଂଶ ପିଲା ବାୟୋଲୋଜିରେ ଭଲ ନମ୍ବର ରଖୁଥିବା ବେଳେ, ଫିଜିକ୍ସରେ ହିଁ ସେମାନେ ପଛେଇ ଯାଆନ୍ତି। ତେଣୁ ଯେଉଁ ବିଦ୍ୟାର୍ଥୀମାନେ ଫିଜିକ୍ସରେ ନିଜର ଦକ୍ଷତା ପ୍ରମାଣିତ କରନ୍ତି, ସେମାନେ ସ୍ୱୟଂଚାଳିତ ଭାବେ ଲକ୍ଷ ଲକ୍ଷ ପିଲାଙ୍କୁ ପଛରେ ପକାଇ ଟପ୍ ରାଙ୍କ୍ ହାସଲ କରିଥାନ୍ତି।
ରସାୟନ ବିଜ୍ଞାନ ବା କେମେଷ୍ଟ୍ରିକୁ ପରୀକ୍ଷାର ସବୁଠାରୁ ‘ସ୍କୋରିଂ’ ଏବଂ ସନ୍ତୁଳିତ ବିଷୟ ଭାବେ ବିବେଚନା କରାଯାଏ। ଏଥିରେ ଫିଜିକାଲ୍, ଅର୍ଗାନିକ୍ ଏବଂ ଇନଅର୍ଗାନିକ୍ ବିଭାଗ ରହିଥାଏ। ଯଦି ଜଣେ ଛାତ୍ର ନିୟମିତ ଅଭ୍ୟାସ କରନ୍ତି ଏବଂ ଧାରଣା (concepts) ଗୁଡ଼ିକୁ ସ୍ପଷ୍ଟ ରଖନ୍ତି, ତେବେ କେମେଷ୍ଟ୍ରି ତାଙ୍କର ଓଭରଅଲ୍ ସ୍କୋରକୁ ଏକ ସୁରକ୍ଷିତ ଏବଂ ସ୍ଥିର ସ୍ଥିତିରେ ପହଞ୍ଚାଇପାରିବ।
ଟାଇ-ବ୍ରେକିଂ ନିୟମ: ନମ୍ବର ସମାନ ଥିଲେ କେମିତି ହୁଏ ରାଙ୍କ୍ ନିର୍ଦ୍ଧାରଣ?
ଅନେକ ସମୟରେ ଏକାଧିକ ଛାତ୍ରଛାତ୍ରୀଙ୍କ ସମୁଦାୟ ନମ୍ବର ସମାନ ହୋଇଯାଏ। ଏଭଳି ସ୍ଥିତିରେ ରାଙ୍କ୍ ନିର୍ଦ୍ଧାରଣ କରିବା ପାଇଁ ଏକ ସ୍ୱତନ୍ତ୍ର ନିୟମ ରହିଛି:
ପ୍ରଥମେ ବାୟୋଲୋଜିରେ ଅଧିକ ନମ୍ବର ରଖିଥିବା ପିଲାଙ୍କୁ ଉପର ରାଙ୍କ୍ ଦିଆଯାଏ।
ଯଦି ବାୟୋଲୋଜି ନମ୍ବର ବି ସମାନ ଥାଏ, ତେବେ କେମେଷ୍ଟ୍ରିର ନମ୍ବରକୁ ପ୍ରାଥମିକତା ମିଳେ।
ଏହା ପରେ ଫିଜିକ୍ସର ନମ୍ବରକୁ ବିଚାରକୁ ନିଆଯାଏ।
ଯଦି ଏସବୁ ସତ୍ତ୍ୱେ ସମାନତା ରହେ, ତେବେ ପରୀକ୍ଷାରେ କମ୍ ଭୁଲ୍ ଉତ୍ତର ଦେଇଥିବା ବିଦ୍ୟାର୍ଥୀଙ୍କୁ ଉଚ୍ଚ ରାଙ୍କ୍ ପ୍ରଦାନ କରାଯାଏ।
ନିଟ୍ ପରି ଏକ ପ୍ରତିଦ୍ୱନ୍ଦ୍ୱିତାମୂଳକ ପରୀକ୍ଷାରେ କେବଳ ଗୋଟିଏ ବିଷୟ ଉପରେ ନିର୍ଭର କରି ସଫଳତା ପାଇବା ଅସମ୍ଭବ। ବାୟୋଲୋଜି ଆପଣଙ୍କୁ ଏକ ବଡ଼ ସ୍କୋର୍ ଆଡ଼କୁ ନେଇଯିବ ସତ, କିନ୍ତୁ ଆପଣଙ୍କ ମନପସନ୍ଦର ଶ୍ରେଷ୍ଠ ମେଡିକାଲ୍ କଲେଜରେ ପହଞ୍ଚିବା ପାଇଁ ଫିଜିକ୍ସ ଓ କେମେଷ୍ଟ୍ରି ହିଁ ଆପଣଙ୍କର ପ୍ରକୃତ ସାଥୀ ହେବେ। ତେଣୁ ତିନୋଟି ଯାକ ବିଷୟ ପାଇଁ ଏକ ସନ୍ତୁଳିତ ରଣନୀତି ପ୍ରସ୍ତୁତି କରିବା ଆବଶ୍ୟକ ।
