ଭୁବନେଶ୍ବର: ରାଜଧାନୀରେ ଥମୁନି ନିଶା ମାଫିଆଙ୍କ ଦୌରାତ୍ମ୍ୟ । ଗୋଟିଏ ପଟେ ବ୍ଲକିଂ ଚେକିଂ ଜୋରଦାର ଚାଲିଥିବାବେଳେ ଅନ୍ୟପଟେ ନିଶା ମାଫିଆଙ୍କ ରାଜୁତି ବଢିବାରେ ଲାଗିଛି । ଶିଶୁପାଳଗଡ ରାସ୍ତାରେ ଚଢାଉ ବେଳେ ଧଉଳି ଥାନା ଏସଆଇଙ୍କୁ ନିଶା ମାଫିଆମାନେ ଆକ୍ରମଣ କରିଥିବା ସୂଚନା ମିଳିଛି । ଏସଆଇ ଜଣକ ରମେଶ ଭୋଳ ବୋଲି ଜଣାପଡିଛି । ଏହି ଆକ୍ରମଣରେ ରମେଶଙ୍କ ମୁଣ୍ଡ ଫାଟିଯାଇଥିବା ଦେଖିବାକୁ ମିଳିଛି । ପରେ କିଛି ସ୍ଥାନୀୟ ଲୋକେ ତାଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛନ୍ତି ।
ଗତକାଲି ରସୁଲଗଡଠାରୁ କଳ୍ପନା ଛକ ପର୍ଯ୍ୟନ୍ତ ପୋଲିସ ଚେକିଂ ଚାଲିଥିଲା । ଏହି ସମୟରେ ଧଉଳି ଥାନା ଏସଆଇ ରମେଶ ଭୋଳ ନିଶା ମାଫିଆଙ୍କୁ ଧରିବା ପାଇଁ ଶିଶୁପାଳଗଡ ରାସ୍ତାରେ ଚଢାଉ କରିଥିଲେ । ସାଙ୍ଗରେ ଅନ୍ୟ ଦୁଇ ଜଣ ପୋଲିସ କମର୍ଚାରୀ ମଧ୍ୟ ଉପସ୍ଥିତ ରହିଥିଲେ । ହଠାତ୍ ନିଶା ମାଫିଆ ମାନେ ରମେଶଙ୍କ ଉପରକୁ ଆକ୍ରମଣ କରିଥିଲେ । ଫଳରେ ତାଙ୍କର ମୁଣ୍ଡ ଫାଟିଯାଇଥିଲା । ପରେ ତାଙ୍କୁ ସ୍ଥାନୀୟ ଲୋକେ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ ।