ଅନୁବାଦ କବିତା : ବୁଢ଼ା ମଣିଷ

ଋଷିଆର ପ୍ରଖ୍ୟାତ କବି ଓ ନାଟ୍ୟକାର ଆଲେକଜାଣ୍ଡାର ବ୍ଲକଙ୍କର ସୃଜନାତ୍ମକ କାର୍ଯ୍ୟକାଳ ଓ ଉନବିଂଶ ଶତାବ୍ଦୀରୁ ବିଂଶ ଶତାବ୍ଦୀକୁ ରୂପାନ୍ତର ପ୍ରାୟ ସମାନ ସମୟରେ ଘଟିଥିଲା। ତାଙ୍କର କାବ୍ୟ ସମଗ୍ରକୁ ତିନୋଟି ପର୍ଯ୍ୟାୟରେ ବିଭକ୍ତ କରାଯାଇଥାଏ। ପ୍ରଥମ ପର୍ଯ୍ୟାୟରେ ସେ କାଳ୍ପନିକ , ରହସ୍ୟବାଦୀ ଓ ଅତନ୍ଦ୍ରିୟତାରେ ବିଶ୍ୱାସ କରୁଥିବା ବେଳେ ପଛକୁ ସେ ରୁଷ ବିପ୍ଳବର ଏକ ଦୃଢ଼ ସମର୍ଥକ ପାଲଟି ଯାଇଥିଲେ। ରୁଷିୟ କବିତାରେ ପ୍ରତୀକର ପ୍ରୟୋଗ କରିବାରେ ଏକ ଅଗ୍ରଣୀ କବି ଭାବେ ମାନ୍ୟତା ପ୍ରାପ୍ତ ବ୍ଲକଙ୍କୁ ଅନ୍ୟ ଏକ ରୁଷିୟ କବି ପାଭେଲ ଆନ୍ତୋକୋଲସ୍କି ରୁଷିୟ କବିତାର ବିବେକ ବୋଲି କହିଛନ୍ତି। ପ୍ରଦତ୍ତ କବିତାଟି ବ୍ଲକଙ୍କର ପ୍ରଥମ ପର୍ଯ୍ୟାୟ ଲେଖାରୁ ମନୋନୀତ।

ମୂଳ ରୁଷିୟାନ : ଆଲେକଜାଣ୍ଡାର ବ୍ଲକ 

ମୋର ଯାହା ଇଚ୍ଛା ଥିଲା ଯାହା ଚାହିଁଥିଲି
ଅଧାଠାରୁ ବେଶୀ ତା’ର
ଗଲିଣିତ ଭୁଲି
ବଞ୍ଚିଛି ମୁଁ ଖାଲି
ଶୀତଳ ଶୁଖିଲା ଏକ
ବୁଦ୍ଧିବାଦ ନେଇ
ଯଦିଓ ଏକାଠି ଆମେ ଥିଲେ
ଦୁହେଁ ସାଥି ହୋଇ
କେବଳ ସ୍ୱପ୍ନରେ ।

ହେମନ୍ତର ଦୁର୍ବଳ ଓ ରୁଗ୍ଣ ଆଲୋକରେ
ଅତୀତର ସ୍ମୃତି ଆଜି ହୁଏ ଆଲୋଡ଼ିତ
ସେହିପରି ଲାଗୁଛି ଅନ୍ତତଃ ,
କିନ୍ତୁ ମୁଁ କେମିତି କୁହ କରିବି ବିଶ୍ୱାସ
ସେ ଛାଇକୁ , ଯାହା ଏକ ଯୁବକର
ସପନରେ ଭାସି ଆସି ଥିଲା ତ ସୀମିତ ?

ପ୍ରକୃତରେ ତାହା କଣ ଥିଲା ସତ
ଅବା ଥିଲା କେବଳ କଳ୍ପନା
କ୍ଷଣକ ପାଇଁ ବି ହେଲେ
ଭୁଲିଯାଏ ପୁରାତନ କ୍ଷତ
ପୁଣି ଦେଖେ ଛବି ଏକ
କଳ୍ପିତ ଦୃଶ୍ୟର
ଯାହା ପୁଣି ଧୀରେ ଧୀରେ
କୁହୁଡ଼ିରେ ହୁଏ  ଅନ୍ତର୍ହିତ।

ବିଶ୍ୱାସ ମୁଁ କରେ ନାହିଁ
ପରୀ ରାଇଜରେ ଅବା ଯାଦୁର ମାୟାରେ
ଦେହ ଓ ମନର ଏଇ
ପରିଣତ ଶେଷ ସୋପାନରେ
କେହି ହେଲେ ଖୋଜି ପାଉ ସେଇ ପଥ
ମୁଁ ଯାହା ପାଇଲି ନାହିଁ
ଏଇ ଜୀବନରେ।

ଅନୁବାଦ : ମନୋରଞ୍ଜନ ହୋତା