କଂଗ୍ରେସ ନେତା ସାମ୍ ପିଟ୍ରୋଡାଙ୍କ ବୟାନକୁ ନେଇ ବିବାଦ: କହିଲେ’ଦକ୍ଷିଣ ଭାରତର ଲୋକେ ଆଫ୍ରିକୀୟ ପରି ଦିଶନ୍ତି’

ନୂଆଦିଲ୍ଲୀ: ଦେଶରେ ଚାଲିଛି ନିର୍ବାଚନ ପର୍ବ। ଲୋକସଭା ନିର୍ବାଚନ ମଧ୍ୟରେ ଭାରତୀୟ ବିଦେଶ କଂଗ୍ରେସ ଅଧ୍ୟକ୍ଷ ସାମ୍ ପିଟ୍ରୋଡା ପୁଣି ଥରେ ଏକ ବିବାଦୀୟ ବୟାନ ଦେଇଛନ୍ତି। ସାମ୍ ପିଟ୍ରୋଡା ତାଙ୍କ ବୟାନରେ ଭାରତର ବିବିଧ ସଂସ୍କୃତି ବିଷୟରେ କହିଛନ୍ତି। ଏହି ବିବିଧତାକୁ ଅନ୍ୟ ଦେଶ ସହ ତୁଳନା କରିଛନ୍ତି। ସେ କହିଛନ୍ତି ଯେ ଭାରତ ଏପରି ଏକ ବିବିଧ ଦେଶ ଯେଉଁଠାରେ ପୂର୍ବର ଲୋକମାନେ ଚାଇନିଜ୍, ପାଶ୍ଚାତ୍ୟର ଲୋକମାନେ ଆରବ ଭଳି ଦେଖାଯାଉଛନ୍ତି, ଉତ୍ତରରେ ଲୋକମାନେ ବୋଧହୁଏ ଗୋରା ଏବଂ ଦକ୍ଷିଣରେ ଲୋକମାନେ ଆଫ୍ରିକୀୟ ପରି ଦେଖାଯାଉଛନ୍ତି। ଏହି ବିବିଧତା ହେଉଛି ଭାରତର ପରିଚୟ। ସମସ୍ତେ ଏଥିରେ ବିଶ୍ୱାସ କରନ୍ତି।

ଏକ ସାକ୍ଷାତ ବେଳେ ସାମ୍ ପିଟ୍ରୋଡା ଏହା ମଧ୍ୟ କହିଛନ୍ତି ଯେ ଏହି ପାର୍ଥକ୍ୟର କିଛି ମହତ୍ତ୍ୱ ନାହିଁ, ଏଠାରେ ଆମେ ସମସ୍ତେ ଭାଇ ଓ ଭଉଣୀ, ଆମେ ସମସ୍ତଙ୍କ ଭାଷା ଏବଂ ସଂସ୍କୃତିକୁ ସମ୍ମାନ କରୁ। ରୂପରେ କୌଣସି ପାର୍ଥକ୍ୟ ନାହିଁ, ଆମେ ସମସ୍ତଙ୍କୁ ସମ୍ମାନ କରୁ। ସେ ଏହା ମଧ୍ୟ କହିଛନ୍ତି ଯେ ଲୋକମାନେ ଭାରତର ବିଭିନ୍ନ ସ୍ଥାନରେ ବିଭିନ୍ନ ପ୍ରକାରର ଖାଦ୍ୟ ଖାଆନ୍ତି। ଏହା ସେମାନଙ୍କର ପସନ୍ଦ ଏବଂ ସଂସ୍କୃତିର ଏକ ଅଂଶ। ଗୁଜୁରାଟୀ ହୋଇଥିବାରୁ ମୁଁ ଡୋସା ଏବଂ ଇଡଲି ମଧ୍ୟ ପସନ୍ଦ କରେ।

ସାମ୍ ପିଟ୍ରୋଡା ଆହୁରି ମଧ୍ୟ କହିଛନ୍ତି ଯେ ବିଭିନ୍ନ ଧର୍ମର ଲୋକମାନେ ଭାରତରେ ରୁହନ୍ତି, ସେମାନଙ୍କର ବିଭିନ୍ନ ପ୍ରକାରର ପୋଷାକ ଅଛି, ସେମାନଙ୍କର ଜୀବନଶୈଳୀ ଅଲଗା, ଏହା ହେଉଛି ଭାରତ। ଏହା ହେଉଛି ବିଶ୍ୱରେ ଭାରତର ପରିଚୟ। ସମସ୍ତଙ୍କ ପାଇଁ ଏଠାରେ ରହିବାକୁ ଏକ ସ୍ଥାନ ଅଛି। ସମସ୍ତେ ଆପୋଷ ବୁଝମଣା କରି ରୁହନ୍ତି। ଯେତେବେଳେ ମୁଁ ତାମିଲନାଡୁ ଯାଏ, ମୋତେ ସ୍ଥାନୀୟ ଭାଷାର ସାମ୍ନା କରିବାକୁ ପଡେ କିନ୍ତୁ ଆମେ କୌଣସି ସମସ୍ୟାର ସମ୍ମୁଖୀନ ହେଉନାହୁଁ। ହୋଟେଲ ଏବଂ ବଜାରରେ ଆମେ ଆମର କାର୍ଯ୍ୟ ସହଜରେ କରିଥାଉ।

ସାମ ପିଟ୍ରୋଡା କିଛି ସମୟ ପୂର୍ବରୁ ତାଙ୍କର ଉତ୍ତରାଧିକାର ଟିକସ ବୟାନ ନେଇ ବିବାଦ ଭିତରକୁ ଆସିଥିଲେ। ସେ କହିଥିଲେ ଯେ ଆମେରିକାରେ ଉତ୍ତରାଧିକାର ଟ୍ୟାକ୍ସ ଅଛି। ଏହା ପରେ ଭାରତର ରାଜନୈତିକ ଦଳ ବିଶେଷ କରି ବିଜେପି ନେତାମାନେ ଏହାକୁ ଦୃଢ ବିରୋଧ କରିଥିଲେ। ସାମଙ୍କ ବୟାନ ଆଧାରରେ ବିଜେପି କଂଗ୍ରେସ ଉପରେ ଆକ୍ରମଣ କରି ରାହୁଲ ଗାନ୍ଧୀଙ୍କୁ ମନିଫେଷ୍ଟୋରେ ଥିବା ଧନ ସର୍ବେକ୍ଷଣ ସହ ଯୋଡି ଆକ୍ରମଣ କରିଥିଲା। ତେବେ ପରେ ସାମ ପିଟ୍ରୋଡା ପୁଣିଥରେ କହିଥିଲେ ଯେ ତାଙ୍କ ବୟାନକୁ ଭୁଲ ବ୍ୟାଖ୍ୟା କରାଯାଇଛି। ଲୋକମାନେ ଏହାର ଅର୍ଥ ଅନ୍ୟ ଆକାରରେ ବ୍ୟାଖ୍ୟା କରିଛନ୍ତି ସେ ଖରାପ ଭାବେ କହି ନାହାଁନ୍ତି।