ଶ୍ରୀନଗର: ଧାରା ୩୭୦ ହଟିବା ପରେ ପ୍ରଥମଥର ପାଇଁ ଶ୍ରୀନଗର ଗସ୍ତରେ ଅଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଜାମ୍ମୁ କାଶ୍ମୀରର ଶ୍ରୀନଗରରେ ଆୟୋଜିତ ଏକ ଜନ ସମାବେଶକୁ ସମ୍ବୋଧିତ କରିବେ ମୋଦୀ । ତେବେ ମୋଦୀଙ୍କ ପହଞ୍ଚିବା ପୂର୍ବରୁ ସେଠାରେ ଥିବା ବକ୍ସି ଷ୍ଟାଡିୟମକୁ ରାଷ୍ଟ୍ରୀୟ ଧ୍ଵଚାର ରଙ୍ଗରେ ରଙ୍ଗାୟିତ କରାଯାଇଛି । ଏହାସହ ଡ୍ରୋନ୍ ଉପରେ ପ୍ରତିବନ୍ଧକ ଲଗାଯାଇଛି । କଡା ସୁରକ୍ଷା ବଳୟ ଭିତରେ ରହିଛି ଶ୍ରୀନଗର । ଷ୍ଟାଡିୟମରେ ଆୟୋଜିତ ‘ବିକଶିତ ଭାରତ, ବିକଶିତ ଜାମ୍ମୁ କାଶ୍ମୀର’ କାର୍ଯ୍ୟକ୍ରମରେ ପିଏମ ମୋଦୀ ଅଂଶଗ୍ରହଣ କରିବେ ।
ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ଜାମ୍ମୁ କାଶ୍ମୀରରେ କଡା ସୁରକ୍ଷା ବ୍ୟବସ୍ଥା କରାଯାଇଛି ବୋଲି କହିଛନ୍ତି ପୋଲିସ ଅଧିକାରୀମାନେ । ରାଜ୍ୟକୁ ସ୍ଵତନ୍ତ୍ର ମାନ୍ୟତା ଦେଇଥିବା ଧାରା ୩୭୦ ରଦ୍ଦ ହେବା ପରେ ପ୍ରଧାନମନ୍ତ୍ରୀ ପ୍ରଥମ ଥର ପାଇଁ ରାଜ୍ୟ ଗସ୍ତ କରୁଛନ୍ତି। ଅଧିକାରୀ କହିଛନ୍ତି ଯେ, ଶ୍ରୀନଗର ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦୀ ଯେଉଁ ରାସ୍ତାରେ ଯିବେ ସେହି ରାସ୍ତାରେ ବହୁ ସଂଖ୍ୟକ ସୁରକ୍ଷା ବାହିନୀ ନିୟୋଜିତ ହୋଇଥିବାବେଳେ ଭିଭିଆଇପି ଗସ୍ତ ସମୟରେ ଲୋକଙ୍କ ଗତିବିଧି ରୋକିବା ପାଇଁ ଅନେକ ସ୍ଥାନରେ ବ୍ୟାରିକେଡ୍ ଲଗାଯାଇଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ବିକଶିତ ଭାରତ, ବିକଶିତ ଜାମ୍ମୁ କାଶ୍ମୀର’ କାର୍ଯ୍ୟକ୍ରମରେ ଭାଗ ନେବାକୁ ଲୋକଙ୍କୁ ଅନୁରୋଧ କରୁଥିବାବେଳେ ବିଜେପି ନେତା କବିନ୍ଦ୍ର ଗୁପ୍ତା କହିଛନ୍ତି ଯେ, ଆଜି ଜାମ୍ମୁ କାଶ୍ମୀରରେ ପରିବର୍ତ୍ତନ ଆସିଛି, ସମସ୍ତେ ଶାନ୍ତ ପରିବେଶରେ ଖୁସିରେ ଅଛନ୍ତି। ଏହା ସତ୍ୟ ଯେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାମ୍ମୁ କାଶ୍ମୀରକୁ କିଛି ଉପହାର ଦେବେ। ଆମେ ଦେଖିଛୁ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସ୍ୱାଗତ କରିବାକୁ ଲୋକମାନେ କେତେ ଉତ୍ସାହିତ ଅଛନ୍ତି। ଧାରା ୩୭୦ ଅପସାରଣ ପରେ, ଆଜି ଲୋକମାନେ ବିନା ଭୟରେ ବାହାରେ ବୁଲିପାରୁଛନ୍ତି |
ଅନ୍ୟପଟେ ପ୍ରଧାନମନ୍ତ୍ରୀଙ୍କ ଗସ୍ତକୁ ନେଇ ଏକ ସୁନ୍ଦର ଗୀତ ରଚନା କରିଛନ୍ତି ଅନନ୍ତନାଗର କାଶ୍ମୀର ଗାୟକ ଇମ୍ରାନ ଅଜିଜ । ଇମ୍ରାନ ଅଜିଜ କହିଛନ୍ତି ଯେ ମୋଦୀ ସର୍ବଭାରତୀୟ ସ୍ତରରେ ପ୍ରଶଂସିତ ନେତା । ତାଙ୍କର ଅସାଧାରଣ ନେତୃତ୍ୱ ମୋତେ ମୋ ଗୀତ ମାଧ୍ୟମରେ ପ୍ରଧାନମନ୍ତ୍ରୀଙ୍କ ପ୍ରତି ନିଜର ଭଲପାଇବା ପ୍ରକାଶ କରିବାକୁ ବାଧ୍ୟ କରିଛି।