କ୍ୱେଟା: ପାକିସ୍ତାନର ବେଲୁଚିସ୍ତାନ ପ୍ରଦେଶରେ ଏକ ବଡ଼ ଧରଣର ଆତଙ୍କବାଦୀ ଆକ୍ରମଣ ଦେଖିବାକୁ ମିଳିଛି। ଶନିବାର ସକାଳେ କ୍ୱେଟା ରେଳ ଷ୍ଟେସନରେ ଏକ ଭୟାବହ ବୋମା ବିସ୍ଫୋରଣ ଘଟିଛି। ଏହି ଲୋମହର୍ଷଣକାରୀ ଘଟଣାରେ ଏଯାବତ୍ ୨୫ ଜଣଙ୍କର ମୃତ୍ୟୁ ହୋଇଥିବା ବେଳେ ୫୦ରୁ ଅଧିକ ଲୋକ ଗୁରୁତର ଭାବେ ଆହତ ହୋଇଛନ୍ତି। ମୃତ୍ୟୁସଂଖ୍ୟା ଆଗକୁ ଆହୁରି ବଢ଼ିବାର ଆଶଙ୍କା ରହିଛି ବୋଲି ସ୍ଥାନୀୟ ପ୍ରଶାସନ ପକ୍ଷରୁ ସୂଚନା ମିଳିଛି।
ମିଳିଥିବା ସୂଚନା ଅନୁଯାୟୀ, ଘଟଣା ସମୟରେ ଷ୍ଟେସନ ପରିସରରେ ପ୍ରବଳ ଭିଡ଼ ଥିଲା। ଯାତ୍ରୀବାହୀ ଟ୍ରେନ୍ ‘ଜାଫର ଏକ୍ସପ୍ରେସ୍’ ପେଶାୱର ଅଭିମୁଖେ ବାହାରିବାକୁ ପ୍ରସ୍ତୁତ ହେଉଥିଲା। ଠିକ୍ ସେତିକି ବେଳେ ପ୍ଲାଟଫର୍ମରେ ଟିକେଟ୍ କାଉଣ୍ଟର ନିକଟରେ ଏକ ଶକ୍ତିଶାଳୀ ଧମାକା ହୋଇଥିଲା। ବିସ୍ଫୋରଣର ଶବ୍ଦ ଏତେ ଭୟଙ୍କର ଥିଲା ଯେ, ଷ୍ଟେସନର ଛାତର କିଛି ଅଂଶ ଭୁଶୁଡ଼ି ପଡ଼ିଥିଲା ଏବଂ ଚାରିଆଡ଼େ ଧୂଆଁମୟ ହୋଇଯାଇଥିଲା। ଏହା ପରେ ଷ୍ଟେସନରେ ହାହାକାର ଖେଳିଯାଇଥିଲା। ଲୋକେ ଜୀବନ ବଞ୍ଚାଇବା ପାଇଁ ଏଣେତେଣେ ଦୌଡ଼ିବାକୁ ଲାଗିଥିଲେ।
ଖବର ପାଇବା ମାତ୍ରେ ପୋଲିସ, ସେନା ଏବଂ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ସମସ୍ତ ଆହତମାନଙ୍କୁ କ୍ୱେଟାର ସିଭିଲ୍ ହସ୍ପିଟାଲ୍ ସମେତ ବିଭିନ୍ନ ଡାକ୍ତରଖାନାରେ ଭର୍ତ୍ତି କରାଯାଇଛି। ସ୍ଥିତିର ଗମ୍ଭୀରତାକୁ ଦୃଷ୍ଟିରେ ରଖି ସହରର ସମସ୍ତ ହସ୍ପିଟାଲରେ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଛି। ବୋମା ନିଷ୍କ୍ରିୟକାରୀ ଦଳ ମଧ୍ୟ ଘଟଣାସ୍ଥଳରେ ପହଞ୍ଚି ଅଧିକ ଯାଞ୍ଚ କରୁଛନ୍ତି ଏବଂ ପ୍ରମାଣ ସଂଗ୍ରହ କରୁଛନ୍ତି।
ବର୍ତ୍ତମାନ ସୁଦ୍ଧା କୌଣସି ଆତଙ୍କବାଦୀ ସଂଗଠନ ଏହି ଆକ୍ରମଣ ପାଇଁ ନିଜକୁ ଦାୟୀ କରିନାହାଁନ୍ତି। ତେବେ ବେଲୁଚିସ୍ତାନ ଅଞ୍ଚଳରେ ଦୀର୍ଘ ଦିନ ଧରି ଅଶାନ୍ତି ଲାଗିରହିଥିବା ବେଳେ, ପାକିସ୍ତାନ ସରକାର ଓ ସୁରକ୍ଷାକର୍ମୀଙ୍କ ପାଇଁ ଏହି ଘଟଣା ଏକ ବଡ଼ ଚେତାବନୀ ପାଲଟିଛି। ଏଭଳି ଏକ ଜନଗହଳିପୂର୍ଣ୍ଣ ସ୍ଥାନରେ ସୁରକ୍ଷା ବ୍ୟବସ୍ଥାରେ ଏତେ ବଡ଼ ତ୍ରୁଟିକୁ ନେଇ ସାଧାରଣରେ ପ୍ରଶ୍ନ ଉଠିଛି।
