ରାମ ମନ୍ଦିର ଚନ୍ଦା ବିବାଦ: ଯିଏ ବି ଦୋଷୀ, ତାକୁ ମିଳୁ କଠୋରରୁ କଠୋର ଦଣ୍ଡ; ବିରୋଧୀଙ୍କୁ ଭିଏଚପି ମୁଖ୍ୟଙ୍କ ଚେତାବନୀ

ନୂଆଦିଲ୍ଲୀ: ଅଯୋଧ୍ୟା ଶ୍ରୀରାମ ଜନ୍ମଭୂମି ମନ୍ଦିରର ଚାନ୍ଦା ଓ ଦାନ ଅର୍ଥରେ ହେରଫେର ଅଭିଯୋଗକୁ ନେଇ ସୃଷ୍ଟି ହୋଇଥିବା ବିବାଦ ଭିତରେ ବିଶ୍ୱ ହିନ୍ଦୁ ପରିଷଦ (ଭିଏଚପି) ପକ୍ଷରୁ ଏକ ବଡ଼ ବୟାନ ସାମ୍ନାକୁ ଆସିଛି। ଭିଏଚପିର ଆନ୍ତର୍ଜାତୀୟ ସଭାପତି ଆଲୋକ କୁମାର ରବିବାର ଏହି ଘଟଣାରେ ଏକ ନିରପେକ୍ଷ ତଦନ୍ତ ଦାବି କରିଛନ୍ତି।

ସେ ସ୍ପଷ୍ଟ କରିଛନ୍ତି ଯେ, ଶ୍ରୀରାମ ମନ୍ଦିର ପାଇଁ କୋଟି କୋଟି ପରିବାର ପବିତ୍ର ମନରେ ଦାନ କରିଛନ୍ତି। ତେଣୁ ଏହି ଦାନ ଅର୍ଥରେ ଯଦି କୌଣସି ପ୍ରକାରର ଅବହେଳା ବା ବିଶ୍ୱାସଘାତକତା ହୋଇଛି, ତେବେ ଅପରାଧୀ ଯିଏ ହୋଇଥାନ୍ତୁ ନା କାହିଁକି, ତାଙ୍କୁ ଆଇନ ଅନୁଯାୟୀ କଠୋରରୁ କଠୋରତମ ଦଣ୍ଡ ମିଳିବା ଉଚିତ।

ମିଡିଆକୁ ପ୍ରତିକ୍ରିୟା ଦେଲା ବେଳେ ଆଲୋକ କୁମାର କହିଛନ୍ତି ଯେ, ଅଭିଯୋଗ ଆସିବା ମାତ୍ରେ ହିଁ ଶ୍ରୀରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟ ପକ୍ଷରୁ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଏସଆଇଟି ଗଠନ ପାଇଁ ଅନୁରୋଧ କରାଯାଇଥିଲା। ବର୍ତ୍ତମାନ ୩ ଜଣିଆ ସ୍ୱତନ୍ତ୍ର ତଦନ୍ତକାରୀ ଟିମ୍ ଅଯୋଧ୍ୟାରେ ପହଞ୍ଚି ତଦନ୍ତ ଆରମ୍ଭ କରିସାରିଛନ୍ତି। ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟ ନିଜେ ଏସଆଇଟି ସମ୍ମୁଖରେ ହାଜର ହୋଇ ତଥ୍ୟ ରଖିଛନ୍ତି। ଏଭଳି ସ୍ଥିତିରେ ତଦନ୍ତର ଚୂଡ଼ାନ୍ତ ରିପୋର୍ଟ ଆସିବା ପୂର୍ବରୁ କୌଣସି ପ୍ରମାଣ ବିନା ମନ୍ଦିର ପ୍ରଶାସନ ତଥା ଅଯୋଧ୍ୟା ଧାମର ଭାବମୂର୍ତ୍ତିକୁ କ୍ଷତି ପହଞ୍ଚାଇବା ପାଇଁ ହେଉଥିବା ଅପପ୍ରଚାରକୁ ସେ ତୀବ୍ର ନିନ୍ଦା କରିଛନ୍ତି।

ସେ ଆହୁରି କହିଛନ୍ତି, “ଆମେ ଏହି ମାମଲାରେ କାହାରି ପ୍ରତି ଦୟାଭାବ ଚାହୁଁନାହୁଁ। ଯଦି କେହି ବିଶ୍ୱାସଘାତକତା କରିଛନ୍ତି, ତେବେ ତାଙ୍କୁ ଚିହ୍ନଟ କରାଯାଉ। ମାତ୍ର ତଦନ୍ତ ଚାଲିଥିବା ବେଳେ ଏହାକୁ ନେଇ କାଦୁଅ ଫିଙ୍ଗା ରାଜନୀତି କରିବା ଏବଂ ରାମଭକ୍ତଙ୍କ ଆସ୍ଥାକୁ ଆଘାତ ପହଞ୍ଚାଇବା ସମ୍ପୂର୍ଣ୍ଣ ଅନୁଚିତ।”

ବିରୋଧୀ ଦଳଗୁଡ଼ିକ ଏହି ପ୍ରସଙ୍ଗରେ ସର୍ବଦଳୀୟ କମିଟି ଦ୍ୱାରା ତଦନ୍ତ କରାଇବାକୁ ଦେଇଥିବା ପ୍ରସ୍ତାବ ଉପରେ ପଲଟା ଆକ୍ରମଣ କରିଛନ୍ତି ଭିଏଚପି ମୁଖ୍ୟ। ସେ କହିଛନ୍ତି ଯେ, କୌଣସି ଅପରାଧିକ ମାମଲାର ତଦନ୍ତ କରିବାର ଅଧିକାର ରାଜନୈତିକ ଦଳଗୁଡ଼ିକୁ ଆଇନ ଦେଇନାହିଁ। କେବଳ ଉଚ୍ଚ ପଦସ୍ଥ ନିରପେକ୍ଷ ଅଧିକାରୀଙ୍କ ଦ୍ୱାରା ହିଁ ସତ ସାମ୍ନାକୁ ଆସିପାରିବ। ସେ ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବ ଓ କଂଗ୍ରେସକୁ ଟାର୍ଗେଟ୍ କରି କହିଛନ୍ତି ଯେ, ଏହି ଦଳଗୁଡ଼ିକର ଭଗବାନ ରାମଙ୍କ ପ୍ରତି କୌଣସି ଭକ୍ତି ନାହିଁ। ଏମାନେ ହେଉଛନ୍ତି ସେହି ଲୋକ ଯେଉଁମାନେ କର୍ ସେବକଙ୍କ ଉପରକୁ ଗୁଳି ଚଳାଇଥିଲେ ଏବଂ ଶ୍ରୀରାମଙ୍କ ଅସ୍ତିତ୍ୱ ଉପରେ ପ୍ରଶ୍ନ ଉଠାଇଥିଲେ। ୨୦୨୭ ଉତ୍ତର ପ୍ରଦେଶ ବିଧାନସଭା ନିର୍ବାଚନକୁ ଆଖିରେ ରଖି ଏହି ସମ୍ବେଦନଶୀଳ ପ୍ରସଙ୍ଗକୁ ସେମାନେ ରାଜନୈତିକ ହତିଆର ଭାବେ ବ୍ୟବହାର କରୁଛନ୍ତି।

ଅନ୍ୟପଟେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ଏହି ପ୍ରସଙ୍ଗରେ ରାମଭକ୍ତମାନଙ୍କୁ ଆଶ୍ୱାସନା ଦେଇଛନ୍ତି। ସେ କହିଛନ୍ତି ଯେ, ଏସଆଇଟି ତଦନ୍ତ ଦ୍ୱାରା କ୍ଷୀରରୁ କ୍ଷୀର ଓ ପାଣିରୁ ପାଣି ଅଲଗା ହୋଇଯିବ, ଅର୍ଥାତ ସତ ସାମ୍ନାକୁ ଆସିବ। ଯଦି କାହା ପାଖରେ କୌଣସି ଦସ୍ତାବିଜ ବା ପ୍ରମାଣ ଅଛି, ତେବେ ସେ ସିଧାସଳଖ ଏସଆଇଟି ନିକଟରେ ଦାଖଲ କରନ୍ତୁ। ହିନ୍ଦୁ ସମାଜ ରାମ ମନ୍ଦିର ପାଇଁ ୫୦୦ ବର୍ଷ ଅପେକ୍ଷା କରିଛି, ତେଣୁ ଗୁଜବରେ ନଭାସି ଆଉ ୧୫ ଦିନ ଅପେକ୍ଷା କରନ୍ତୁ, ସବୁ ସତ୍ୟ ଜଣାପଡ଼ିଯିବ ବୋଲି ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି।