ଭଞ୍ଜନଗର: ଦୂରଦର୍ଶନର ଦଶଟି ସ୍ୱଳ୍ପ ଶକ୍ତି ପରିବହନ କେନ୍ଦ୍ର ଛଅ ସପ୍ତାହ ମଧ୍ୟରେ ବନ୍ଦ ହେବ। ଗତ ଫେବୃଆରୀ ୨୪ରେ କେନ୍ଦ୍ର ସରକାରଙ୍କ ପକ୍ଷରୁ ଏନେଇ ଏକ ନିର୍ଦ୍ଦେଶନାମା ଜାରି କରାଯାଇଥିଲା।
ଏହି କେନ୍ଦ୍ରଗୁଡ଼ିକ ମଧ୍ୟରେ ରହିଛି ଭଞ୍ଜନଗର, ଆନନ୍ଦପୁର, ବ୍ରଜରାଜନଗର, ଦଶରଥପୁର, ଢେଙ୍କାନାଳ, ଯୋଡା, କରଞ୍ଜିଆ, ଖଣ୍ଡପଡା, ମୋହନ ଏବଂ ରାଜରଣପୁର।
ସାରା ଦେଶରେ ଥିବା ୧୨୫ ଟି ସ୍ୱଳ୍ପ ଶକ୍ତି ପରିବହନ କେନ୍ଦ୍ର ମଧ୍ୟରେ ଏହି ୧୦ଟି କେନ୍ଦ୍ର ରହିଛି, ଯାହା ବନ୍ଦ ହେବ।
ଗଞ୍ଜାମ ଜିଲ୍ଲା ଭଞ୍ଜନଗରର ଟ୍ରାନ୍ସମିସନ ସେଣ୍ଟରକୁ ନିକଟ ଅତୀତରେ ବିପୁଳ ପରିମାଣର ଅର୍ଥ ଖର୍ଚ୍ଚ କରି ଆଧୁନିକୀକରଣ କରାଯାଇଥିଲା।
୧୯୮୯ରେ ବି-ଇଡ କଲେଜ ପରିସରରେ ସ୍ଥାପିତ ହୋଇଥିବା ୧୦୦ ୱାଟର ଟ୍ରାନ୍ସମିସନ ସେଣ୍ଟରକୁ ତତ୍କାଳୀନ ସାଂସଦ ସୋମନାଥ ରଥଙ୍କ ଉଦ୍ୟମରେ ପ୍ରାୟ ପାଞ୍ଚ ବର୍ଷ ପୂର୍ବେ ୫୦୦ ୱାଟକୁ ଉନ୍ନୀତ କରାଯାଇଥିଲା। ତେବେ ଭିତ୍ତିଭୂମି ସମ୍ବନ୍ଧୀୟ ସମସ୍ୟା ହେତୁ ନୂତନ ଟ୍ରାନ୍ସମିସନ ସମ୍ପୂର୍ଣ୍ଣ ରୂପେ କାର୍ୟ୍ୟକ୍ଷମ ହୋଇପାରିଲା ନାହିଁ।
ଗତ ବର୍ଷ ବଜ୍ରପାତ ସମୟରେ ଏହାର ଟାୱାର କ୍ଷତିଗ୍ରସ୍ତ ହୋଇଥିଲା ଏବଂ ପ୍ରାୟ ୬ ମାସ ପୂର୍ବରୁ ଏକ ନୂତନ ପ୍ରତିଷ୍ଠା କରାଯାଇଥିଲା। ଯାହାର କେତେକ ଆଧୁନିକୀକରଣ କାର୍ୟ୍ୟ ମଧ୍ୟ କରାଯାଇଥିଲା।
ଉଲ୍ଲେଖଯୋଗ୍ୟ ଗତବର୍ଷ ଚିକିଟି, କବିସୂର୍ଯ୍ୟନଗର ଏବଂ ଜି ଉଦୟଗିରି ରିଲେ କେନ୍ଦ୍ର ବନ୍ଦ କରାଯାଇଥିଲା।