ପୁରୀ: ଆଜିଠାରୁ ପୁଣି ଥରେ ଆରମ୍ଭ ହୋଇଛି ଶ୍ରୀଜିଉଙ୍କ ଦର୍ଶନ । ଗତକାଲି ଶ୍ରୀମନ୍ଦିରକୁ ସାନିଟାଇଜ୍ କରାଯାଇଥିଲା । ଆଜି ସକାଳୁ ସୁରୁଖୁରରେ ମହାପ୍ରଭୁଙ୍କ ଦର୍ଶ କରୁଛନ୍ତି ଶ୍ରଦ୍ଧାଳୁ । କୋଭିଡ୍ ନେଗେଟିଭ୍ ସାର୍ଟିଫିକେଟ ଦରକାର ହେଉ ନଥିବା ବେଳେ ଆଜିଠାରୁ ମହାପ୍ରଭୁଙ୍କୁ ଦର୍ଶନ ପାଇଁ ଭକ୍ତଙ୍କୁ ଆଉ ବେଶୀ ସମୟ ଅପେକ୍ଷା କରିବାକୁ ପଡ଼ିବ ନାହିଁ । ବ୍ୟାରିକେଡକୁ ପାଖାପାଖି ୧ କିଲୋମିଟର କମାଇ ଦେଇଛି ପ୍ରଶାସନ । ଫଳରେ ସର୍ବସାଧାରଣ ଦର୍ଶନ ଆଉ ଟିକେ ସହଜ ହୋଇଛି । ଭକ୍ତଙ୍କୁ ଆଉ ବେଶୀ ସମୟ ଲାଇନରେ ଠିଆ ହେବାକୁ ପଡ଼ିବ ନାହିଁ ।
ଆଜିଠାରୁ ମରିଚିକୋଟ ଛକଠାରୁ ବ୍ୟାରିକେଡ ଦେଇ ଭକ୍ତ ଶ୍ରୀମନ୍ଦିର ଭିତରେ ପ୍ରବେଶ କରୁଛନ୍ତି । ପୂର୍ବରୁ ଭକ୍ତଙ୍କ ସମ୍ଭାବ୍ୟ ଭିଡ଼କୁ ଦୃଷ୍ଟିରେ ରଖି ପ୍ରଶାସନ ସିଂହଦ୍ୱାରଠାରୁ ମାର୍କେଟ ଛକ ଯାଏ ବ୍ୟାରିକେଡ କରିଥିଲା । ଫଳରେ ବାହାରୁ ଆସୁଥିବା ଭକ୍ତ ହଇରାଣ ହେଉଥିଲେ । ପିଲା ଛୁଆଙ୍କୁ ଧରି ଲାଇନରେ ଠିଆ ହେବା କଷ୍ଟକର ଥିଲା । ଏନେଇ ଭକ୍ତଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା ।
ଦର୍ଶନ ବ୍ୟବସ୍ଥାର ସମୀକ୍ଷା କରିବା ପରେ ବ୍ୟାରିକେଡକୁ ଗୋଟିଏ କିଲୋମିଟର କମାଇ ଦେଇଛି ପ୍ରଶାସନ । ବ୍ୟାରିକେଡ ଛୋଟ ହେବା ଦ୍ୱାରା ଅଧିକ ସଂଖ୍ୟକ ଭକ୍ତ ମହାପ୍ରଭୁଙ୍କୁ ଦର୍ଶ କରି ପାରୁଛନ୍ତି । ଭିଡ଼ ନିୟନ୍ତ୍ରଣ ପାଇଁ ମନ୍ଦିର ବାହାରେ ଓ ଭିତରେ ମୁତୟନ ହୋଇଛନ୍ତି ବ୍ୟାପକ ପୋଲିସ । ସମସ୍ତେ କୋଭିଡ୍ ଗାଇଡଲାଇନ୍ ମାନିବା ସହ ମାସ୍କ ପିନ୍ଧି ଓ ସାନିଟାଇଜ୍ କରି ମନ୍ଦିର ଭିତରେ ପ୍ରବେଶ କରୁଛନ୍ତି ।
Comments are closed.