ମୁମ୍ବାଇ: ଫିଲ୍ମ ‘ଦ କେରଲା ଷ୍ଟୋରି’ ଏବେ ଖୁବ୍ ଚର୍ଚ୍ଚାରେ । ଫିଲ୍ମଟି ଏତେ ବିରୋଧ ସତ୍ତ୍ୱେ ବକ୍ସ ଅଫିସରେ ଭଲ ବ୍ୟବସାୟ କରୁଛି । ଏହାକୁ ଲୋକେ ମଧ୍ୟ ଖୁବ୍ ପସନ୍ଦ କରିଛନ୍ତି । ଏହାର ଓପନିଂ ଖୁବ୍ ଭଲ ଥିଲା । ଆଉ ସେବେଠାରୁ ଏହାର କଲେକସନ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ଏହି ଫିଲ୍ମ ଗୋଟିଏ ସପ୍ତାହରେ ୫୦ କୋଟି କଲେକସନ କରିଛି । ଆଉ ୯ମ ଦିନରେ ଅର୍ଥାତ୍ ଶନିବାର ଏହି ଫିଲ୍ମ ୧୯.୫୦ କୋଟି ଟଙ୍କା ବ୍ୟବସାୟ କରି ଚର୍ଚ୍ଚାକୁ ଆସିଛି । ଏହା ସହିତ ଫିଲ୍ମର ମୋଟ ରୋଜଗାର ବର୍ତ୍ତମାନ ୧୧୨.୮୭କୋଟି ଟଙ୍କାକୁ ବୃଦ୍ଧି ପାଇଛି । ଫିଲ୍ମଟି ଦ୍ୱିତୀୟ ସପ୍ତାହରେ ୧୦୦ କୋଟିରୁ ଅଧିକ ରୋଜଗାର କରିଛି ।
ଫିଲ୍ମର ଚତୁର୍ଥ ଦିନର କଲେକ୍ସନ ନିକଟରେ ରିଲିଜ୍ ହୋଇଥିବା ସଲମାନ ଖାନ୍ଙ୍କ ‘କିସି କା ଭାଇ କିସି କି ଜାନ’କୁ ମଧ୍ୟ ପଛରେ ପକାଇ ଦେଇଥିଲା । ଧର୍ମ ପରିବର୍ତ୍ତନକୁ ନେଇ ନିର୍ମାଣ କରାଯାଇଥିବା ଏହି ଫିଲ୍ମ ‘ଦ କେରଲା ଷ୍ଟୋରି’ର ଟ୍ରେଲର ରିଲିଜ ହେବା ପରଠାରୁ ହିଁ ବିରୋଧ ଆରମ୍ଭ ହୋଇଯାଇଛି । ଫିଲ୍ମକୁ ପଶ୍ଚିମବଙ୍ଗ ଓ ତାମିଲନାଡ଼ୁରେ ବ୍ୟାନ କରାଯାଇଥିବା ବେଳେ ଉତ୍ତର ପ୍ରଦେଶ ଓ ମଧ୍ୟ ପ୍ରଦେଶରେ ଏହାକୁ ଟ୍ୟାକ୍ସ ଫ୍ରି କରି ଦିଆଯାଇଛି ।
ଫିଲ୍ମରେ ଅଦା ଶର୍ମା ମୁଖ୍ୟ ଭୂମିକାରେ ଅଭିନୟ କରିଛନ୍ତି । ସୁଦିପ୍ତୋ ସେନଙ୍କ ନିର୍ଦ୍ଦେଶନାରେ ନିର୍ମିତ ଏହି ଫିଲ୍ମ ସିନେମା ହଲରେ ରେକର୍ଡ କରିବା ପଥରେ ଅଗ୍ରସର ହେଉଛି ।
Comments are closed.