ଭୁବନେଶ୍ୱର: ଶିକ୍ଷା ମନ୍ତ୍ରାଳୟ ଦ୍ୱାରା ପ୍ରକାଶିତ ଉଭୟ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳର ବିଦ୍ୟାଳୟମାନଙ୍କୁ ନେଇ ହୋଇଥିବା ପରଫରମାନ୍ସ ଗ୍ରେଡିଂ ଇଣ୍ଡେକ୍ସ (ପିଜିଆଇ) ତାଲିକାରେ ଓଡ଼ିଶା ୨୬ ତମ ସ୍ଥାନକୁ ଖସି ଆସିଛି। ଶୀର୍ଷରେ ଆଣ୍ଡାମାନ ନିକୋବର ଦ୍ଵିତୀୟରେ ଆନ୍ଧ୍ର ପ୍ରଦେଶ ରହିଥିବା ବେଳେ ଶେଷରେ ପଶ୍ଚିମବଙ୍ଗ ୩୬ ନମ୍ବର ସ୍ଥାନରେ ରହିଛି। ୨୦୨୦-୨୧ ଶିକ୍ଷାବର୍ଷରେ ପିଜିଆଇ ରିପୋର୍ଟରେ ୧୦ମ ସ୍ଥାନରେ ଥିବା ରାଜ୍ୟ ଚଳିତ ଶିକ୍ଷାବର୍ଷରେ ୧୬ଟି ସ୍ଥାନ ତଳକୁ ଖସି ଆସିଛି।
ପିଜିଆଇ ଭାରତୀୟ ଶିକ୍ଷା ବ୍ୟବସ୍ଥାକୁ ବିଶ୍ୱର ସର୍ବବୃହତ ଶିକ୍ଷା ବ୍ୟବସ୍ଥା ଭାବେ ଦେଖୁଛି, ଯେଉଁଥିରେ ପ୍ରାୟ ୧୪.୯ ଲକ୍ଷ ବିଦ୍ୟାଳୟ, ୯୫ ଲକ୍ଷ ଶିକ୍ଷକ ଏବଂ ବିଭିନ୍ନ ସାମାଜିକ-ଅର୍ଥନୈତିକ ପୃଷ୍ଠଭୂମିର ପ୍ରାୟ ୨୬.୫ କୋଟି ଛାତ୍ରଛାତ୍ରୀ ରହିଛନ୍ତି।
୫୨ଟି ସୂଚକାଙ୍କକୁ ନେଇ ଏହି ରାଙ୍କିଙ୍ଗ୍ ପ୍ରସ୍ତୁତ କରାଯାଇଛି, ଯାହାକୁ ଛଅଟି କ୍ଷେତ୍ରରେ ବିଭକ୍ତ କରାଯାଇଛି: ଭିତ୍ତିଭୂମି, ଶିକ୍ଷାଦାନ-ଶିକ୍ଷାଦାନ ପ୍ରକ୍ରିୟା, ଛାତ୍ରଛାତ୍ରୀଙ୍କ ଶୈକ୍ଷିକ ଉପଲବ୍ଧି, ବିଦ୍ୟାଳୟ ପରିଚାଳନା, ସମୁଦାୟ ନିଯୁକ୍ତି ଏବଂ ସାମଗ୍ରିକ ପ୍ରଦର୍ଶନ।
ପିଜିଆଇରେ ଓଡ଼ିଶାର ଖରାପ ପ୍ରଦର୍ଶନକୁ ନେଇ ରାଜ୍ୟ ରାଜନୀତି ସରଗରମ ହୋଇଛି। ବିରୋଧୀ ବିଜେପି ଓ କଂଗ୍ରେସ ରାଜ୍ୟ ସରକାରଙ୍କ ଉପରେ ଦୋଷ ଲଦିଛନ୍ତି।
ବିଜେଡି ସରକାର ନିଜର ୨୩ ବର୍ଷର ଶାସନର ବିଫଳତାକୁ ଲୁଚାଇବା ପାଇଁ ପ୍ରତିଦିନ ମିଥ୍ୟା ବୟାନ ଦେଉଛନ୍ତି। ପିଜିଆଇ ରିପୋର୍ଟରୁ ସରକାରଙ୍କ ବିଫଳତା ସ୍ପଷ୍ଟ ବାରି ହୋଇପଡୁଛି। ଦିନକୁ ଦିନ ଶିକ୍ଷାର ମାନ କମିବାରେ ଲାଗିଛି ବୋଲି ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର କହିଛନ୍ତି।
ସାମନ୍ତସିଂହାର ଅଭିଯୋଗ କରିଛନ୍ତି, “5T ପରିବର୍ତ୍ତନର ଉଦ୍ଦେଶ୍ୟ କେବେ ବି ଶିକ୍ଷାର ମାନ ବୃଦ୍ଧି ନୁହେଁ, ବରଂ ଜଣେ ସଚିବ ସ୍ତରୀୟ ସରକାରୀ ଅଧିକାରୀଙ୍କୁ ବିଜେଡିର ରାଜନୈତିକ ନେତା କରିବା।
ସେହିଭଳି କଂଗ୍ରେସର ବରିଷ୍ଠ ନେତା ସୁର ରାଉତରାୟ କହିଛନ୍ତି, 5T ପରିବର୍ତ୍ତନ କେବଳ ବିଦ୍ୟାଳୟକୁ ସବୁଜ ରଙ୍ଗରେ ରଙ୍ଗେଇ କରିବାରେ ସୀମିତ। ଶିକ୍ଷାନୁଷ୍ଠାନରେ ଶିକ୍ଷକଙ୍କ ଅଭାବ ରହିଛି। ପିଜିଆଇର ରାଙ୍କିଙ୍ଗରେ ଓଡ଼ିଶାର ମାନ ଖସିବା ଅତ୍ୟନ୍ତ ଦୁର୍ଭାଗ୍ୟଜନକ
ଅପରପକ୍ଷରେ ଶାସକ ବିଜେଡି ଏହି ଅଭିଯୋଗକୁ ଖଣ୍ଡନ କରି କହିଛି ଯେ 5T ପଦକ୍ଷେପରେ ବିଦ୍ୟାଳୟର ପରିବର୍ତ୍ତନ ଦ୍ୱାରା ଛାତ୍ରଛାତ୍ରୀମାନେ ବହୁ ମାତ୍ରାରେ ଉପକୃତ ହୋଇଛନ୍ତି।
ଅଭିଭାବକ, ଛାତ୍ରଛାତ୍ରୀ, ସ୍ଥାନୀୟ ବାସିନ୍ଦା, ସ୍କୁଲ କମିଟିର ସଦସ୍ୟଙ୍କୁ ପରିବର୍ତ୍ତନ ବିଷୟରେ ପଚାରିଲେ ଉତ୍ତର ମିଳିବ। ଏମିତି ଅନେକ ସ୍କୁଲ ଥିଲା ଯେଉଁଠି ଆବଶ୍ୟକ ଭିତ୍ତିଭୂମିର ଅଭାବ ଥିଲା। ଏବେ 5T ପଦକ୍ଷେପ ଦ୍ୱାରା ଏହି ଗ୍ରାମାଞ୍ଚଳ ବିଦ୍ୟାଳୟ ଗୁଡିକ ସହରାଞ୍ଚଳର ଅନୁଷ୍ଠାନ ସହ ସମକକ୍ଷ ହୋଇପାରିଛି ବୋଲି ବରିଷ୍ଠ ବିଜେଡି ନେତା ଦେବୀ ପ୍ରସାଦ ମିଶ୍ର କହିଛନ୍ତି।
Comments are closed.