ମୁମ୍ବାଇ: ମାଆ ହେଲେ ବଲିଉଡ୍ ଅଭିନେତ୍ରୀ ଇଲିଆନା ଡି’କ୍ରୁଜ । ଗତ ୧ ତାରିଖରେ ସେ ଏକ ପୁତ୍ର ସନ୍ତାନକୁ ଜନ୍ମ ଦେଇଛନ୍ତି । ସେ ଏକ ସ୍ୱତନ୍ତ୍ର ପୋଷ୍ଟ ମାଧ୍ୟମରେ ପ୍ରଶଂସକଙ୍କୁ ମା’ ହେବାର ଖବର ସେୟାର କରିଛନ୍ତିି । ପୁଅର ପ୍ରଥମ ଫଟୋ ସେୟାର କରିବା ସହ ତାର ନାମ କୋଆ ଫିନିକ୍ସ ଡୋଲାନ ରଖିଥିବା ଜଣାଇଛନ୍ତି । ଏହି ଖବର ପାଇବା ପରେ ଇଲିଆନାଙ୍କ ପ୍ରଶଂସକମାନେ ତାଙ୍କୁ ଶୁଭେଚ୍ଛା ଜଣାଇଛନ୍ତି । ସେହିପରି ଏହି ପୋଷ୍ଟ ସେୟାର ହେବା ମାତ୍ରେ ଆଥିଆ ଶେଟ୍ଟି, ନର୍ଗିସ୍ ଫାକ୍ରୀ ଏବଂ ଡବୁ ରତନାନୀଙ୍କ ପରି ସେଲିବ୍ରେଟିମାନେ ଶୁଭେଚ୍ଛା ଜଣେଇଛନ୍ତି ।
ଏହି ପୋଷ୍ଟରେ ପୁଅର ଏକ କଳା ଏବଂ ଧଳା ଫଟୋ ସେୟାର କରି ଇଲିଆନା ଲେଖିଛନ୍ତି, “ଆମେ ଆମର ସ୍ନେହର ପୁତ୍ରକୁ ଦୁନିଆକୁ ସ୍ୱାଗତ କରି କେତେ ଖୁସି ତାହା ଶବ୍ଦରେ ବର୍ଣ୍ଣନା କରି ହେବ ନାହିଁ । ହୃଦୟ ପୂର୍ଣ୍ଣ ହୋଇଗଲା ।’ ହେଲେ ବର୍ତ୍ତମାନ ପର୍ଯ୍ୟନ୍ତ ଇଲିଆନା ତାଙ୍କ ସାଥୀ ବିଷୟରେ କିଛି ଉଲ୍ଲେଖ କରିନାହାଁନ୍ତି । କିନ୍ତୁ କିଛି ସପ୍ତାହ ପୂର୍ବରୁ, ସେମାନଙ୍କର ଡେଟ୍ ନାଇଟ୍ର ଫଟୋ ସେୟାର କରି ସେ ପ୍ରଶଂସକଙ୍କ ସାମ୍ନାରେ ପ୍ରେମିକର ଚେହେରା ଦେଖାଇଥିଲେ । ଇଲିଆନା ଚଳିତ ବର୍ଷ ମେ ୧୩ ତାରିଖରେ ମାଇକେଲ ଡୋଲାନଙ୍କୁ ବିବାହ କରିଛନ୍ତି । ବିବାହ ଇଲିଆନାଙ୍କ ଗର୍ଭଧାରଣ ଘୋଷଣାର ଚାରି ସପ୍ତାହ ପୂର୍ବରୁ ହୋଇଛି ।
ଇଲିଆନା ବଲିଉଡର ଜଣେ ଲୋକପ୍ରିୟ ଅଭିନେତ୍ରୀ । ସେ ରୁସ୍ତମ, ମେଁ ତେରା ହିରୋ ଏବଂ ବର୍ଫି ଭଳି ଫିଲ୍ମରେ ଉଚ୍ଚକୋଟୀର ଅଭିନୟ କରିଛନ୍ତି । ଏଥିସହିତ ଇଲିଆନା ସାଉଥ ଫିଲ୍ମରେ ମଧ୍ୟ ଅଭିନୟ କରିଛନ୍ତି ।
Comments are closed.