ମୁମ୍ବାଇ: ବଲିଉଡ ଅଭିନେତ୍ରୀ କଙ୍ଗନା ରାନାୱତ ତାଙ୍କ ବିବାଦୀୟ ମନ୍ତବ୍ୟକୁ ନେଇ ସବୁବେଳେ ଚର୍ଚ୍ଚାରେ ରହିଥାନ୍ତି । କିନ୍ତୁ ଏଥର ବଲିଉଡର ବିବାଦୀୟ ରାଣୀ ତାଙ୍କ ଆଗାମୀ କମେଡି ଫିଲ୍ମ ‘ଚନ୍ଦ୍ରମୁଖୀ ୨’କୁ ନେଇ ଖୁବ୍ ଚର୍ଚ୍ଚାରେ ଅଛନ୍ତି । ଫିଲ୍ମ ରିଲିଜ୍ ପୂର୍ବରୁ ଏବେ ସେ ଏହାର ପ୍ରଚାର କରିବାରେ ବ୍ୟସ୍ତ ଅଛନ୍ତି । ଏହି ଫିଲ୍ମରେ ଚନ୍ଦ୍ରମୁଖୀ ସାଜିଥିବା କଙ୍ଗନାଙ୍କ ଖୁବ୍ ପ୍ରଶଂସା କରିଛନ୍ତି ସାଉଥ ଅଭିନେତ୍ରୀ ଜ୍ୟୋତିକା ।
‘ଚନ୍ଦ୍ରମୁଖୀ’ର ପ୍ରଥମ ଭାଗ ୨୦୦୫ରେ ରିଲିଜ୍ ହୋଇଥିଲା । ଏବେ ଏହାର ସିକ୍ୱେଲ ନିର୍ମାଣ କରାଯାଇଛି । ଏଥିରେ ଜ୍ୟୋତିକାଙ୍କ ସ୍ଥାନ ନେଇଛନ୍ତି କଙ୍ଗନା । ଏହା ସହ ରାଘବ ଲରେନ୍ସ,ବେଟ୍ଟିୟନ ରାଜାଙ୍କ ଚରିତ୍ରରେ ନଜର ଆସି ରଜନୀକାନ୍ତଙ୍କ ସ୍ଥାନ ନେଇଛନ୍ତି । ପ୍ରଥମ ଭାଗରେ ରଜନୀକାନ୍ତ ବେଟ୍ଟିୟନ ରାଜାଙ୍କ ଚରିତ୍ରରେ ନଜର ଆସିଥିଲେ । ତେବେ ଚନ୍ଦ୍ରମୁଖୀ ଚରିତ୍ରରେ କଙ୍ଗନା କରିଥିବା ଅଭିନୟକୁ ପ୍ରଶଂସା କରି ଜ୍ୟୋତିକା କହିଛନ୍ତି, “ଭାରତୀୟ ସିନେମାର ଦକ୍ଷ ଅଭିନେତ୍ରୀମାନଙ୍କ ମଧ୍ୟରୁ ଜଣେ ଚନ୍ଦ୍ରମୁଖୀ ଭୂମିକାରେ ଅଭିନୟ କରିଥିବାରୁ ଅତ୍ୟନ୍ତ ଗର୍ବିତ । କଙ୍ଗନା ଚନ୍ଦ୍ରମୁଖୀ ଚରିତ୍ରରେ ବହୁତ ସୁନ୍ଦର ଦିଶୁଛନ୍ତି । ମୁଁ ତାଙ୍କ ଅଭିନୟର ବହୁତ ବଡ଼ ପ୍ରଶଂସକ ଏବଂ ଏହି ଫିଲ୍ମରେ କଙ୍ଗନାଙ୍କୁ ଦେଖିବା ପାଇଁ ବହୁତ ଉତ୍ସାହିତ ଅଛି । ଆଉ ଏକ ସଫଳତା ପାଇଁ ଲରେନ୍ସ ମାଷ୍ଟର ଏବଂ ପି ବାସୁ ସାରଙ୍କୁ ଶୁଭେଚ୍ଛା । ଜ୍ୟୋତିକାଙ୍କଠାରୁ ଏତେ ପ୍ରଶଂସା ଶୁଣିବା ପରେ କଙ୍ଗନା କହିଛନ୍ତି ଯେ, ‘ମୁଁ ମଧ୍ୟ ଆପଣଙ୍କର ବହୁତ ବଡ଼ ପ୍ରଶଂସକ ।
ଏହି ଫିଲ୍ମ ଆସନ୍ତା ଡ଼ିସେମ୍ବର ୧୫ ତାରିଖରେ ରିଲିଜ୍ ହେବ । ନିକଟରେ ଏହାର ଟ୍ରେଲର ରିଲିଜ୍ ହୋଇଯାଇଛି । ଏଥିରେ ସେ ରାଜାଙ୍କ ଦରବାରରେ ଜଣେ ନୃତ୍ୟଶିଳ୍ପୀ ଭୂମିକାରେ ଅଭିନୟ କରିଛନ୍ତି କଙ୍ଗନା । ଯିଏ ନିଜର ସୌନ୍ଦର୍ଯ୍ୟ ଏବଂ ନୃତ୍ୟ ଦକ୍ଷତା ପାଇଁ ରାଜ ଦରବାରରେ ପରିଚିତ । ଦର୍ଶକ କଙ୍ଗନାଙ୍କ ଚନ୍ଦ୍ରମୁଖୀ ଲୁକ୍କୁ ବହୁତ ପସନ୍ଦ କରିଥିଲେ । କଙ୍ଗନା ନିଜର ଚିତାକର୍ଷକ ଅଭିନୟ ପାଇଁ ସର୍ବଦା ସମସ୍ତଙ୍କ ହୃଦୟ ଜିତିଥାନ୍ତି । ଏଥିରେ କଙ୍ଗନାଙ୍କ ବ୍ୟତୀତ ରାଧିକା ଶରଥକୁମାର, ଭାଦିଭେଲୁ, ଲକ୍ଷ୍ମୀ ମେନନ, ମହିମା ନାମ୍ବିଆର, ସୃଷ୍ଟି ଡାଙ୍ଗେ, ରବି ମାରିଆ ଏବଂ ସୁରେଶ ମେନନ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି ।
Comments are closed.