ଉଦଘାଟିତ ହେଲା ଆମେରିକାର ବିଶାଳ ଅକ୍ଷରଧାମ ମନ୍ଦିର; ଦିଲ୍ଲୀ ଅକ୍ଷରଧାମ ମନ୍ଦିର ବାସ୍ତୁକଳାର ଅନୁରୂପ ଏହି ମନ୍ଦିର

ନୂଆଦିଲ୍ଲୀ: ଆମେରିକାର ନ୍ୟୁ- ଜର୍ସି ସହରରେ ଉଦ୍ଘାଟିତ ହୋଇଛି ବିଶ୍ୱର ଦ୍ଵିତୀୟ ବୃହତ୍ତମ ହିନ୍ଦୁ ମନ୍ଦିର। ପାଶ୍ଚାତ୍ୟ ଗୋଲାର୍ଦ୍ଧରେ ହିନ୍ଦୁ ସଂସ୍କୃତି ଏବଂ ସ୍ଥାପତ୍ୟର ଏକ ଗୁରୁତ୍ୱପୂର୍ଣ୍ଣ ସ୍ଥାନ ବୋଲି କୁହାଯାଉଥିବା ‘ଅକ୍ଷରାଧାମ’ BAPS ଆଧ୍ୟାତ୍ମିକ ମୁଖ୍ୟ ମହନ୍ତ ସ୍ୱାମୀ ମହାରାଜଙ୍କ ନେତୃତ୍ୱରେ ଆନୁଷ୍ଠାନିକ ଭାବେ ଉଦଘାଟିତ ହୋଇଛି । ଅକ୍ଟୋବର ୧୮ରୁ ମନ୍ଦିର ପରିଦର୍ଶକମାନଙ୍କ ପାଇଁ ଖୋଲା ରହିବ ବୋଲି ସୂଚନା ମିଳିଛି | 

ଆମେରିକାର ନ୍ୟୁ- ଜର୍ସି ସହରରେ ୨୦୧୧ ମସିହାରେ ଏହି ବିଏପିଏସ ସ୍ବାମୀ ନାରାୟଣ ଅକ୍ଷରଧାମ ମନ୍ଦିର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ଏହା ନ୍ୟୁୟର୍କର ଟାଇମ୍ସ ସ୍କୋୟାରର ଦକ୍ଷିଣରୁ ପ୍ରାୟ ୬୦ ମାଇଲ (୯୦ କିଲୋମିଟର) ଓ ରାଜଧାନୀ ୱାଶିଂଟନ ଡିସିର ଉତ୍ତରରୁ ପ୍ରାୟ ୧୮୦ ମାଇଲ୍ (୨୮୯ କିଲୋମିଟର) ଦୂରରେ ଅବସ୍ଥିତ। ନ୍ୟୁ- ଜର୍ସିର ରବିନ୍ସଭିଲ୍ ଟାଉନସିପର ମଧ୍ୟଭାଗରେ ଏହାକୁ ନିର୍ମାଣ କରାଯାଇଛି।

ଦିଲ୍ଲୀର ଅକ୍ଷରଧାମ ମନ୍ଦିରର ବାସ୍ତୁକଳାର ଅନୁରୂପ ଭାବେ ନିର୍ମିତ ଏହି ଭବ୍ୟ ମନ୍ଦିରର କ୍ଷେତ୍ରଫଳ ରହିଛି ପ୍ରାୟ ୧୮୩ ଏକର ପରିମିତ ଅଞ୍ଚଳ। ଏହାର ନିର୍ମାଣରେ ପ୍ରାୟ ୧୨ ହଜାରରୁ ଅଧିକ ସ୍ୱେଚ୍ଛାସେବୀଙ୍କର ଅବଦାନ ରହିଥିବା କୁହାଯାଉଛି। କମ୍ବୋଡିଆରେ ଥିବା ବିଶ୍ବର ସର୍ବବୃହତ ହିନ୍ଦୁ ମନ୍ଦିର ଅଙ୍କୋରବଟ ମନ୍ଦିର ଏବଂ ଦିଲ୍ଲୀର ପ୍ରସିଦ୍ଧ ଅକ୍ଷରଧାମ ମନ୍ଦିରର କ୍ଷେତ୍ରଫଳ ଓ କାରିଗରୀ ଏହି ଭବ୍ୟ ମନ୍ଦିରରେ ଦେଖିବାକୁ ମିଳିବ। 

ଏହି ମନ୍ଦିରର ପ୍ରସ୍ତ ୨୫୫ ଫୁଟ ଓ ଦୈର୍ଘ୍ୟ ୩୪୫ ଫୁଟ। ଯାହାକି ପ୍ରାୟ ୧୮୩ ଏକର ପରିମିତ ଅଞ୍ଚଳରେ ରହିଛି। ସେହିପରି ଏହାର ଉଚ୍ଚତା ୧୯୧ ଫୁଟ ରହିଛି। ଏହା ପ୍ରାଚୀନ ହିନ୍ଦୁ ବାସ୍ତୁଶାସ୍ତ୍ର ଅନୁଯାୟୀ ଡିଜାଇନ୍ ହୋଇଛି। ହିନ୍ଦୁ ପୂରାଣ ବର୍ଣ୍ଣିତ ପ୍ରାୟ ୧୦,୦୦୦ ବିଭିନ୍ନ ଭାରତୀୟ ଦେବାଦେବୀଙ୍କ ମୂର୍ତ୍ତି, ଭାରତୀୟ ନୃତ୍ୟ, ସଙ୍ଗୀତ, ଲୋକକଳା ଓ ପ୍ରାଚୀନ ଭାରତୀୟ ସଂସ୍କୃତିର ଝଲକ ଏହି ମନ୍ଦିରର ପ୍ରସ୍ତର ଖୋଦିତ କାର୍ଯ୍ୟରେ ସ୍ଥାନ ପାଇଛି।