ମୁମ୍ବାଇ: ଏବେ ସବୁ ଆଶାକୁ ପଛରେ ପକାଇଛି ପୁଷ୍ପା-୨ । ଆଶା ଠାରୁ ନିର୍ମାତାଙ୍କୁ ଅଧିକ ଲାଭ ଦେଲାଣି । ଡିସେମ୍ବର ୫ରେ ରିଲିଜ୍ ପୁଷ୍ପା ୨ ରେକର୍ଡ ପରେ ରେକର୍ଡ ଭାଙ୍ଗି ଚାଲିଥିବା ବେଳେ ଏବେ ଆଉ ଏକ ବଡ ମାଇଲଖୁଣ୍ଟ ଅତିକ୍ରମ କରିଛି । ରିଲିଜର ୬ ଦିନରେ ୧୦୦୦ କୋଟି ପାର୍ କରିଛି ସାଉଥ୍ ସୁପରଷ୍ଟାର ଅଲ୍ଲୁ ଅର୍ଜୁନଙ୍କ ଅଭିନୀତ ଫିଲ୍ମ ପୁଷ୍ପା-୨ ।
ତେବେ ସୁକୁମାରଙ୍କ ନିର୍ଦ୍ଦେଶିତ ଏହି ଫିଲ୍ମଟି ୨୦୨୧ ତେଲୁଗୁ ବ୍ଲକବଷ୍ଟର “ପୁଷ୍ପ: ଦି ରାଇଜ୍”ର ସିକ୍ୱେଲ୍ ହୋଇଥିବା ବେଳେ ପ୍ରଥମ ଭାଗ ଠାରୁ ଦ୍ବିତୀୟ ଭାଗକୁ ଢେର୍ ସାରା ଭଲ ପାଇବା ଦେଇଛନ୍ତି ଦର୍ଶକ। ଯାହା ତାର ବକ୍ସ ଅଫିସ୍ କଲେକ୍ସନରେ ପ୍ରତିଫଳିତ ହେଉଛି । ବିଶ୍ବବ୍ୟାପୀ ଉଲ୍ଲେଖନୀୟ ସଫଳତା କରି ମାତ୍ର ଛଅ ଦିନରେ ବିଶ୍ୱ ବକ୍ସ ଅଫିସରେ ୧୦୦୦ କୋଟି ଟଙ୍କା ରୋଜଗାର କରିଛି। ଏହି ସଫଳତା ହାସଲ କରି ପୁଷ୍ପା ୨ ଏବେ ଦେଶର ସବୁଠାରୁ ଦ୍ରୁତତମ ଫିଲ୍ମ ବନିଯାଇଛି । ଡିସେମ୍ବର ୫ରେ ମୁକ୍ତିଲାଭ କରିଥିବା ଏହି ଫିଲ୍ମରେ ହିନ୍ଦୀ, ତାମିଲ, କନ୍ନଡ, ବଙ୍ଗାଳୀ ଏବଂ ମାଲାୟଲମ ଭାଷାରେ ମଧ୍ୟ ହଇଚଇ ସୃଷ୍ଟି କରିଛି ।
ଏହି ପ୍ରୋଜେକ୍ଟକୁ ଆର୍ଥିକ ସହାୟତା ପ୍ରଦାନ କରିଥିବା ପ୍ରଯୋଜନା ବ୍ୟାନର ‘ମିଥ୍ରୀ ମୁଭି ମେକର୍ସ’ ସୋସିଆଲ ମିଡିଆରେ ସଦ୍ୟତମ ବକ୍ସ ଅଫିସ ରୋଜଗାର ସେୟାର କରି ସୂଚନା ଦେଇଛନ୍ତି ଯେ ପୁଷ୍ପା-୨ ଫିଲ୍ମଟି ଏବେ ବିଶ୍ବବ୍ୟାପୀ ୧୦୦୨ କୋଟି ଟଙ୍କା ରୋଜଗାର କରିସାରିଲାଣି । ଆଉ ଆଜି ଅଷ୍ଟମ ଦିନରେ ଏହା ବିଶ୍ବବ୍ୟାପୀ ୧୦୬୨ କୋଟି ଛୁଇଁଲାଣି । ଏଥିସହିତ ଦେଶବ୍ୟାପୀ ଏହା ୬୮୯.୪୪ କୋଟି ରୋଜଗାର କରିସାରିଲାଣି । ତେବେ ଆଜି ଅଷ୍ଟମ ଦିନରେ କେବଳ ଏହା ସକାଳୁ ସକାଳୁ ମନିଙ୍ଗ ଶୋରେ ୨.୪୪ କୋଟି ରୋଜଗାର କରିଛି ।