ବଲାଙ୍ଗୀର: ନିଲମ୍ବିତ ହେଲେ ରିଜର୍ଭ ପୋଲିସ କନଷ୍ଟେବଳ ଜ୍ୟୋତି ପ୍ରଧାନ। ପତ୍ନୀଙ୍କୁ ହତ୍ୟା ଉଦ୍ୟମ କରି ନିଲମ୍ବିତ ହେଲେ ପୁଲିସ ସ୍ୱାମୀ। ବଲାଙ୍ଗିର ଏସପି ତାଙ୍କୁ ନିଲମ୍ବନ କରିଛନ୍ତି।
ସୂଚନା ଅନୁଯାୟୀ, ପୋଲିସ କନଷ୍ଟେବଳ ଥିବା ପତ୍ନୀଙ୍କୁ ହତ୍ୟା ଉଦ୍ୟମ କରିଥିଲେ ପୋଲିସ ସ୍ବାମୀ। ଗତ ୮ ତାରିଖ ସନ୍ଧ୍ୟା ସମୟରେ ତୁଷୁରା ଥାନା ଅନ୍ତର୍ଗତ ସମରା ଗାଁରୁ ଏକ ବାହାଘର କାର୍ଯ୍ୟକ୍ରମ ସାରି ଜ୍ୟୋତି ପ୍ରଧାନ ତାଙ୍କ ସ୍ତ୍ରୀ କନଷ୍ଟେବଳ ନୂପୁର ବିଶ୍ୱାଳଙ୍କ ସହିତ ବାଇକରେ ଫେରୁଥିଲେ। ଫେରିବା ସମୟରେ ବାଟରେ କୌଣସି କାରଣକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏହାପରେ ଜ୍ୟୋତି ତାଙ୍କର ଆଉ ଜଣେ ସହଯୋଗୀ ଜଗନ୍ନାଥ ପ୍ରଧାନଙ୍କ ସହିତ ମିଶି ନୂପୁରକୁ ପଥରରେ ଛେଚି ହତ୍ୟା କରିବା ଉଦ୍ୟମ କରିଥିଲେ।
ହତ୍ୟା ଉଦ୍ୟମ ସମୟରେ ସ୍ଥାନୀୟ ଲୋକେ ପାଟିତୁଣ୍ଡ କରି ଘଟଣାସ୍ଥଳକୁ ଆସିଥିଲେ। ଫଳରେ ଉଭୟ ଜ୍ୟୋତି ଓ ଜଗନ୍ନାଥ ଘଟଣାସ୍ଥଳରୁ ଫେରାର ହୋଇଯାଇଥିଲେ। ସ୍ଥାନୀୟ ଲୋକଙ୍କ ଦ୍ବାରା ନୂପୁରଙ୍କୁ ହସପିଟାଲ ପଠାଯାଇଥିଲା। ବର୍ତ୍ତମାନ ସୁଦ୍ଧା ସେ ଗୁରୁତର ଅବସ୍ଥାରେ ବଲାଙ୍ଗିରର ଏକ ଘରୋଇ ହସପିଟାଲରେ ଚିକିତ୍ସିତ ହେଉଛନ୍ତି।
ଏହି ଘଟଣା ପରେ ରିଜର୍ଭ କନଷ୍ଟେବଲ ଜ୍ୟୋତି ପ୍ରଧାନ ଫେରାର ଅଛନ୍ତି। ତାଙ୍କୁ ତୁଷୁରା ପୁଲିସ ଖୋଜୁଥିବା ବେଳେ ସହଯୋଗୀ ଜଗନ୍ନାଥକୁ ଗିରଫ କରି କୋର୍ଟଚାଲାଣ କରିଛି। ଏହି କ୍ରମରେ ଆଜି ବଲାଙ୍ଗିର ଏସପି ରିଜର୍ଭ ପୋଲିସ କନଷ୍ଟେବଳ ଜ୍ୟୋତି ପ୍ରଧାନଙ୍କୁ ନିଲମ୍ବନ କରିଛନ୍ତି।