ଭୁବନେଶ୍ୱର: ରାଜ୍ୟ ସରକାର ଯଦି ଏକ ମାସ ମଧ୍ୟରେ ଡିଏସିପି ଲାଗୁ କରିବା ସହିତ ୭ ଦଫା ଦାବି ପୂରଣ ନ କରନ୍ତି ତେବେ ଓଡ଼ିଶା ମେଡିକାଲ୍ ସର୍ଭିସ୍ ଆସୋସିଏସନ୍ (ଓଏମଏସଏ) ସମୂହ ଇସ୍ତଫା ଦେବାକୁ ଧମକ ଦେଇଛି।
ଭୁବନେଶ୍ୱରରେ ଅନୁଷ୍ଠିତ ଏକ ସାଧାରଣ ପରିଷଦ ବୈଠକ ପରେ ଡାକ୍ତର ସଂଘ ସେମାନଙ୍କର ଦାବି ପାଇଁ ଚାପ ପକାଇବା ଲାଗି କାର୍ଯ୍ୟ ବନ୍ଦ କରିବାକୁ ଧମକ ଦେଇଛି।
ଓଏମଏସଏ ସଦସ୍ୟମାନେ ରାଜ୍ୟରେ ଡାଇନାମିକ୍ ଆସୁର୍ଡ କ୍ୟାରିଅର୍ ପ୍ରୋଗ୍ରେସନ୍ (ଡିଏସିପି) କାର୍ଯ୍ୟକାରୀ କରିବା ପାଇଁ ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି। ଯେତେବେଳେ କି ଅତି କମରେ ଦେଶର ୧୮ଟି ରାଜ୍ୟ ସରକାରୀ ହସ୍ପିଟାଲରେ ସେବା କରୁଥିବା ଡାକ୍ତରମାନଙ୍କ ପାଇଁ ଡିଏସିପି ଲାଗୁ କରିସାରିଛନ୍ତି ସରକାର।
ଡିଏସିପି ଲାଗୁ କରିବା ସମୟରେ ଆଡ-ହକ୍ ଡାକ୍ତରଙ୍କ ଚୁକ୍ତିଭିତ୍ତିକ ଅବଧି ବିଚାରକୁ ନେବାକୁ ମଧ୍ୟ ସଂଘ ସରକାରଙ୍କୁ ଅନୁରୋଧ କରିଛି। ଏହା ବ୍ୟତୀତ ସଂଘ କ୍ୟାଡର ପୁନର୍ଗଠନ କରିବାକୁ ଚାହୁଁଛି ଯାହା ଗତ ସାତ ବର୍ଷ ଧରି ଓଡ଼ିଶାରେ କରାଯାଇନାହିଁ। ସେହିପରି ସ୍ନାତକୋତ୍ତର ପାଇଁ ପ୍ରୋତ୍ସାହନ ଏବଂ ଦନ୍ତ ଚିକିତ୍ସକମାନଙ୍କୁ ଅନ୍ୟାନ୍ୟ ସୁବିଧା ପାଇଁ ମଧ୍ୟ ଦାବି କରାଯାଇଛି।
ଡାକ୍ତରମାନଙ୍କୁ ସ୍ଥାନାନ୍ତର, ସ୍ୱାସ୍ଥ୍ୟ ବୀମା ସମୟରେ ସ୍ୱଚ୍ଛତା ସୁନିଶ୍ଚିତ କରିବା ପାଇଁ ପଦକ୍ଷେପ ନେବାକୁ ଓଏମଏସଏ ସଦସ୍ୟମାନେ ଦାବି କରିଛନ୍ତି।
Comments are closed.