ନୂଆଦିଲ୍ଲୀ: ଅପରେସନ ସିନ୍ଦୂର ପରେ ଭାରତ ପାକିସ୍ତାନ ଅଧିକୃତ କଶ୍ମୀର (ପିଓକେ)କୁ ନିଜ ପାଖରେ ରଖିବାକୁ ପ୍ରୟାସ କରୁଛି । ଆଉ ଖୁବଶୀଘ୍ର ପିଓକେ ନିଜର ହେବ ବୋଲି ଭାରତ କହିସାରିଛି । ଯାହା ପାକିସ୍ତାନର ରକ୍ତଚାପ ବଢାଇଛି । ଆଉ ଏବେ ଛାନିଆ ହୋଇ କଶ୍ମୀର ବିବାଦରେ ପାକିସ୍ତାନ ଚୀନକୁ ଟାଣିଛି। ପାକିସ୍ତାନ କହିଛି, ଏହି ବିବାଦରେ କେବଳ ଭାରତ ଓ ପାକିସ୍ତାନ ନୁହଁନ୍ତି, ଚୀନ ମଧ୍ୟ ଏକ ପକ୍ଷ। ଏହା ପ୍ରଥମ ଥର ପାଇଁ ପାକିସ୍ତାନ କଶ୍ମୀର ପ୍ରସଙ୍ଗରେ ଚୀନର ସମର୍ଥନ ଖୋଜିଛି।
ପାକିସ୍ତାନର ଇଣ୍ଟର-ସର୍ଭିସେସ ପବ୍ଲିକ ରିଲେସନ୍ସର ମହାନିର୍ଦ୍ଦେଶକ ଅହମଦ ଶରିଫ ଚୌଧୁରୀ ସ୍କାଏ ନ୍ୟୁଜକୁ ଏକ ସାକ୍ଷାତକାର ଦେଇଛନ୍ତି। ସେ କହିଛନ୍ତି, କଶ୍ମୀର ବିବାଦରେ ଚୀନ ମଧ୍ୟ ଏକ ପାର୍ଟି। ଏହି ବୟାନ କାହିଁକି, ଏହା ନେଇ ପ୍ରଶ୍ନ ଉଠୁଛି।
ଏପ୍ରିଲ ୨୨ରେ ପହଲଗାମରେ ଆତଙ୍କୀ ହମଲା ହୋଇଥିଲା। ୨୬ ଜଣ ପର୍ଯ୍ୟଟକ ପ୍ରାଣ ହରାଇଥିଲେ। ଏହା ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବଢ଼ିଛି। ଭାରତ ପାକିସ୍ତାନ ଅଧିକୃତ କଶ୍ମୀର (ପିଓକେ) ତୁରନ୍ତ ଖାଲି କରିବାକୁ ଦାବି କରିଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ପଷ୍ଟ କହିଛନ୍ତି, ଏବେ କେବଳ ପିଓକେ ଉପରେ କଥା ହେବ। ପ୍ରତିରକ୍ଷା ମନ୍ତ୍ରୀ ଓ ବୈଦେଶିକ ମନ୍ତ୍ରୀ ମଧ୍ୟ ପାକିସ୍ତାନକୁ ପିଓକେ ଖାଲି କରିବାକୁ କହିଛନ୍ତି। ଏଭଳି ଚାପ ପାକିସ୍ତାନ ଉପରେ ପ୍ରଥମ ଥର ପାଇଁ ପଡ଼ିଛି।
୭୩ ବର୍ଷ ଧରି ପିଓକେ ପ୍ରସଙ୍ଗ ଭାରତ ଓ ପାକିସ୍ତାନ ମଧ୍ୟରେ ଥିଲା। ଏବେ ପାକିସ୍ତାନ ଚୀନକୁ କାହିଁକି ଟାଣିଲା? ଏହା ପଛରେ ଦୁଇଟି ବଡ଼ କାରଣ ରହିଛି।
ପାକିସ୍ତାନ ଏହି ବିବାଦରେ ଚୀନର ସାହାଯ୍ୟ ଚାହୁଁଛି। ଚୀନ ପାକିସ୍ତାନର ସବୁଠାରୁ ବଡ଼ ସାଙ୍ଗ। ସାମ୍ପ୍ରତିକ ସଂଘର୍ଷରେ ଚୀନ ପାକିସ୍ତାନକୁ ଖୋଲାଖୋଲି ସମର୍ଥନ କରିଛି। ଗତ ୫ ବର୍ଷରେ ପାକିସ୍ତାନର ୮୧% ଅସ୍ତ୍ରଶସ୍ତ୍ର ଚୀନରୁ ଆସିଛି। ପାକିସ୍ତାନର ଏୟାର ଡିଫେନ୍ସ ସିଷ୍ଟମ ମଧ୍ୟ ଚୀନର। ଏହି ସହଯୋଗକୁ ଆହୁରି ମଜବୁତ କରିବା ପାଇଁ ପାକିସ୍ତାନ ଚୀନ ସମର୍ଥନରେ କହୁଛି ।
ପାକିସ୍ତାନ ଅଧିକୃତ କଶ୍ମୀରରେ ଚୀନ ୩୦୦ ମିଲିୟନ ଡଲାରର ନିବେଶ କରିଛି। ଯଦି ଭାରତ ଏଠାରେ କୌଣସି କାର୍ଯ୍ୟାନୁଷ୍ଠାନ ନିଏ, ତାହା ଚୀନର ସିଧାସିଧା କ୍ଷତି କରିବ। ଏହା ମଧ୍ୟ ଚୀନକୁ ବିବାଦରେ ଟାଣିବାର ଏକ କାରଣ।
ଭାରତ ପାକିସ୍ତାନର ଏହି ଚାଲକୁ ଗମ୍ଭୀରତାରେ ନେଇଛି। ପିଓକେ ଭାରତର ଅବିଚ୍ଛେଦ୍ୟ ଅଂଶ ବୋଲି ଭାରତ କହିଆସୁଛି। ପାକିସ୍ତାନର ଚୀନ ସହ ମେଣ୍ଟ ଭାରତ ପାଇଁ ନୂଆ ଚ୍ୟାଲେଞ୍ଜ। କିନ୍ତୁ ଭାରତ ନିଜର ଆଭିମୁଖ୍ୟରେ ଅଟଳ। ଏହି ବିବାଦ ଆଞ୍ଚଳିକ ସ୍ଥିରତା ପାଇଁ ଏକ ବଡ଼ ପରୀକ୍ଷା।
Comments are closed.