ନୂଆଦିଲ୍ଲୀ: ଅପରେସନ ସିନ୍ଦୂରରେ ପାକିସ୍ତାନର ଅଣ୍ଟା ଭାଙ୍ଗି ଦେଇଛି ଭାରତ । ୯ ଆତଙ୍କୀ ଅଡ୍ଡା, ୧୩ରୁ ଅଧିକ ଏୟାରବେସ୍ ସାଙ୍ଗକୁ ୧୦୦ରୁ ଅଧିକ ଆତଙ୍କୀଙ୍କ ଜୀବନକୁ ମାଟିରେ ମିଶାଇଛି ଭାରତ । ହେଲେ ପାକିସ୍ତାନ ଭାରତର ସାମରିକ ସଂସ୍ଥା, ସାଧାରଣ ନାଗରିକ କାହାରିକୁ ଛାଡିନଥିଲା । ବେଶ୍ ତିନି ଦିନର ସଂଘର୍ଷ ପରେ ମେ ୧୦ରେ ଶେଷରେ ଅସ୍ତ୍ରବିରତି ଲାଗିଲା । ହଁ, ଏହି ଅସ୍ତ୍ର ବିରତି ନେଇ ଅନେକ ପ୍ରଶ୍ନ ବି ଉଠିଛି । କେମିତି ଏତେ ଜଲଦି, ଉଭୟ ଦେଶ ଅସ୍ତ୍ରବିରତି ପାଇଁ ରାଜି ହେଲେ? ଆଉ ଏଥିରେ ଆମେରିକାର ହସ୍ତକ୍ଷେପ ସବୁକୁ ନେଇ ପ୍ରଶ୍ନ ଉଠିଛି । ଯାହାକୁ ନେଇ ଏବେ ବଡ ଖୁଲାସା ହୋଇଛି । କାଳେ ଇସଲାମାବାଦ ଦିଲ୍ଲୀକୁ ଦୁଇଥର ଯୁଦ୍ଧବିରତି ପାଇଁ ଫୋନ୍ କରିଥିଲା ।
ମିଳିଥିବା ସୂଚନା ଅନୁଯାୟୀ, ପାକିସ୍ତାନ ଯୁଦ୍ଧ ବନ୍ଦ କରିବା ପାଇଁ ଦୁଇଥର ଭାରତକୁ ଅନୁରୋଧ କରିଥିଲା । ଯେଉଁଥିରେ ଦୁଇ ଦେଶର ସାମରିକ ଅଭିଯାନ ମହାନିର୍ଦ୍ଦେଶକ (DGMO)ଙ୍କ ଆନୁଷ୍ଠାନିକ ବାର୍ତ୍ତା ମଧ୍ୟ ସାମିଲ ରହିଛି । ଏହି ବିନିମୟ ସହିତ ଜଡିତ ଲୋକଙ୍କ ଅନୁସାରେ, ଇସଲାମାବାଦର ଆନ୍ତରିକତା ସନ୍ଦେହଜନକ ଥିଲା, କାରଣ ଶାନ୍ତି ପାଇଁ ଆବେଦନ କରିବାର କିଛି ସମୟ ପରେ ଭାରତୀୟ ସାମରିକ ପ୍ରତିଷ୍ଠାନ ଉପରେ ପୁନଃ ଆକ୍ରମଣ କରାଯାଇଥିଲା।
ମେ ୬,୭ରେ ଭାରତର ଅପରେସନ ସିନ୍ଦୂର ଜାରି କରିବା ପରେ ଉଭୟ ପକ୍ଷର ତିନି ଦିନର ତୀବ୍ର ସୀମାପାର ସାମରିକ କାର୍ଯ୍ୟାନୁଷ୍ଠାନ ପରେ, ମେ ୧୦ ତାରିଖ ଦିନ ଅପରାହ୍ନ ୩:୩୫ ରେ ଏକ ଡିଜିଏମଓ ସ୍ତରୀୟ ଆଲୋଚନା ହୋଇଥିଲା । ଯେଉଁ ସମୟରେ ଭାରତ ଏବଂ ପାକିସ୍ତାନ ଯୁଦ୍ଧବିରତି ବୁଝାମଣା ପାଇଁ ଆଲୋଚନା କରିଥିଲେ। ତେବେ ଏହା ଆମେରିକାର ମଧ୍ୟସ୍ଥତା ନୁହେଁ, ପ୍ରତିଷ୍ଠିତ ସାମରିକ ଯୋଗାଯୋଗ ଚ୍ୟାନେଲ ମାଧ୍ୟମରେ ଯୁଦ୍ଧବିରତିକୁ ସିଦ୍ଧ କରାଯାଇଥିଲା ଏବଂ ଏହାର ଲକ୍ଷ୍ୟ ଦୁଇ ପରମାଣୁ-ସଶସ୍ତ୍ର ପଡ଼ୋଶୀଙ୍କ ମଧ୍ୟରେ ଉତ୍ତେଜନା ହ୍ରାସ କରିବା ଥିଲା ।
ଏନେଇ ପୂର୍ବରୁ ବୈଦେଶିକ ମନ୍ତ୍ରୀ ଜୟଶଙ୍କର ସ୍ପଷ୍ଟ ବି କରିଛନ୍ତି । ପୂର୍ବରୁ, ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ଏକ ପ୍ରେସ ବ୍ରିଫିଂରେ କହିଥିଲେ ଯେ, ପାକିସ୍ତାନୀ ଘାଟି ଉପରେ ଭାରତୀୟ ବାୟୁସେନା ଦ୍ୱାରା ପ୍ରଭାବଶାଳୀ ଆକ୍ରମଣ ଯୋଗୁଁ ପାକିସ୍ତାନର ଡିଜିଏମଓ ତାଙ୍କ ଭାରତୀୟ ପ୍ରତିପକ୍ଷଙ୍କ ସହ ଆଲୋଚନା କରିବାକୁ ଅନୁରୋଧ କରିବା ସମୟରେ ଏକ ଯୁଦ୍ଧବିରତି ପ୍ରସ୍ତାବ ଦିଆଯାଇଥିଲା ବୋଲି ସ୍ପଷ୍ଟ କରିଥିଲା ।
ସେପଟେ ଘାତକ ପହଲଗାମ ଆତଙ୍କବାଦୀ ଆକ୍ରମଣର ଜବାବରେ ଆରମ୍ଭ ହୋଇଥିବା ଅପରେସନ ସିନ୍ଦୂରର ମୃତ୍ୟୁ ସଂଖ୍ୟା ପାକିସ୍ତାନରେ ବୃଦ୍ଧି ପାଇବାରେ ଲାଗିଛି। ସୂତ୍ର ଅନୁଯାୟୀ ସୀମାପାର ସ୍ପଷ୍ଟ ଆକ୍ରମଣରେ ୧୬୦ ରୁ ଅଧିକ ବ୍ୟକ୍ତି, ଯେଉଁଥିରେ ଆତଙ୍କବାଦୀ, ସେମାନଙ୍କର ସହଯୋଗୀ ଏବଂ ପାକିସ୍ତାନୀ ସାମରିକ କର୍ମଚାରୀ ପ୍ରାଣ ହରାଇଛନ୍ତି। ଏଥିରେ ଆତଙ୍କବାଦୀ ଗୋଷ୍ଠୀ ଜୈଶ-ଏ-ମହମ୍ମଦର ଗଡ଼ ବାହାବଲପୁରରେ ୨୦ ରୁ ଅଧିକ ଲୋକ ମଧ୍ୟ ସାମିଲ ଅଛନ୍ତି। ବାହାବଲପୁରରେ ମୃତ୍ୟୁବରଣ କରିଥିବା ଅନେକ ଜୈଶ ମୁଖ୍ୟ ମାସୁଦ ଆଝାରଙ୍କ ସମ୍ପର୍କୀୟ ବୋଲି କୁହାଯାଉଛି। ପାକିସ୍ତାନୀ ସଶସ୍ତ୍ର ବାହିନୀ ମଧ୍ୟ ବହୁ କ୍ଷତି ସହିଛି, ଆକଳନ ଅନୁଯାୟୀ ୩୫ ରୁ ୪୦ ଜଣ କର୍ମଚାରୀଙ୍କ ମୃତ୍ୟୁ ହୋଇଛି। ତଥାପି, ପାକିସ୍ତାନ ସରକାରୀ ଭାବରେ କେବଳ ୧୧ ଜଣ ସାମରିକ ମୃତ୍ୟୁ ଏବଂ ୭୮ ଜଣ ଆହତ ହୋଇଥିବା ସ୍ୱୀକାର କରିଛି ।
ଭାରତ ଲଗାତାର ତୋପ ଗୁଳିମାଡ଼ ମାଧ୍ୟମରେ ପାକିସ୍ତାନ ଅଧିକୃତ କାଶ୍ମୀର (ପିଓକେ)ରେ ଆତଙ୍କବାଦୀ ଶିବିରଗୁଡ଼ିକୁ ମଧ୍ୟ ବଡ଼ କ୍ଷତି ପହଞ୍ଚାଇଛି। ଏହା ବ୍ୟତୀତ, ମେ ୧୦ ତାରିଖରେ ପ୍ରତିଶୋଧମୂଳକ ବାୟୁ ଏବଂ କ୍ଷେପଣାସ୍ତ୍ର ଆକ୍ରମଣ ସମୟରେ, ପାକିସ୍ତାନର ଅନେକ ବାୟୁସେନା ଘାଟିରେ ପ୍ରବଳ କ୍ଷତି ହୋଇଥିଲା । ତେବେ ବର୍ତ୍ତମାନ ଯୁଦ୍ଧବିରତି ଜାରି ରହିଥିବା ବେଳେ, ଭାରତୀୟ ପ୍ରତିରକ୍ଷା ଅଧିକାରୀମାନେ ପାକିସ୍ତାନର ଉଦ୍ଦେଶ୍ୟ ପ୍ରତି ସତର୍କ ରହିଛନ୍ତି।
Comments are closed.