ଭୁବନେଶ୍ବର:ତେଲ ଆମ ଖାଦ୍ୟର ଏକ ଅତ୍ୟାବଶ୍ୟକୀୟ ଅଂଶ କିନ୍ତୁ ଯେତେବେଳେ ଏହାର ପରିମାଣ ସୀମିତ ନରହେ, ଏହା ଅନେକ ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିପାରେ। ଯଦି ଆମେ ଆମର ଦୈନନ୍ଦିନ ଖାଦ୍ୟରେ ତେଲର ପରିମାଣ ମାତ୍ର ୧୦% ହ୍ରାସ କରିବା, ତେବେ ଆମେ ଶରୀର ଉପରେ ଅନେକ ସକାରାତ୍ମକ ପ୍ରଭାବ ଦେଖିପାରିବା।
ଆସନ୍ତୁ ଜାଣିବା ସେହି ଲାଭଗୁଡ଼ିକ କ’ଣ?
ପ୍ରଥମତଃ,ତେଲର ପରିମାଣ ହ୍ରାସ କରିବା ଦ୍ଵାରା ଓଜନ ନିୟନ୍ତ୍ରଣରେ ସାହାଯ୍ୟ ହୁଏ। ଅତ୍ୟଧିକ ତେଲ ଖାଦ୍ୟରେ ଅନାବଶ୍ୟକ କ୍ୟାଲୋରୀ ବଢାଇଥାଏ, ଯାହା ଧୀରେ ଧୀରେ ମେଦବହୁଳତା ଆଡ଼କୁ ନେଇଯାଏ। ମେଦବହୁଳତା ହେଉଛି ଅନେକ ରୋଗର ମୂଳ କାରଣ, ଯେପରିକି ମଧୁମେହ, ଉଚ୍ଚ ରକ୍ତଚାପ ଏବଂ ହୃଦରୋଗ। ତେଲ ୧୦% ହ୍ରାସ କରିବା ଦ୍ୱାରା ଆପଣଙ୍କ ଦୈନନ୍ଦିନ ଖାଦ୍ୟରେ ଶହ ଶହ କ୍ୟାଲୋରୀ ହ୍ରାସ ପାଇପାରିବ । ଯାହା ଦୀର୍ଘକାଳୀନ ଭାବରେ ଓଜନ ହ୍ରାସ କରିବାରେ ସାହାଯ୍ୟ କରେ।
ତେଲ କମ କରିବା ଦ୍ବାରା ହୃଦୟ ସ୍ୱାସ୍ଥ୍ୟକୁ ଅଧିକ ଲାଭ ମିଳେ । ଅଧିକ ତେଲ, ବିଶେଷକରି ସାଚୁରେଟେଡ୍ ଏବଂ ଟ୍ରାନ୍ସ ଫ୍ୟାଟ୍ ଯୁକ୍ତ ତେଲ କୋଲେଷ୍ଟ୍ରଲ୍ ବୃଦ୍ଧି କରେ। ଏହା ଧମନୀରେ ଅବରୋଧ, ଉଚ୍ଚ ରକ୍ତଚାପ ଏବଂ ହୃଦଘାତର ଆଶଙ୍କା ବୃଦ୍ଧି କରେ। ଯେତେବେଳେ ଆପଣ ତେଲ କମ କରନ୍ତି, ଶରୀରରେ ଖରାପ କୋଲେଷ୍ଟ୍ରଲ (LDL) ହ୍ରାସ ପାଏ ଏବଂ ଭଲ କୋଲେଷ୍ଟ୍ରଲ (HDL) ବୃଦ୍ଧି ପାଇବାକୁ ଲାଗେ।
ଅଧିକ ତେଲ ଗ୍ୟାସ୍, ଏସିଡିଟି ଏବଂ କୋଷ୍ଠକାଠିନ୍ୟ ଭଳି ପାଚନ ସମସ୍ୟା ମଧ୍ୟ ସୃଷ୍ଟି କରିପାରେ। ତେଲ କମ କରିବା ଦ୍ୱାରା ପେଟ ହାଲୁକା ରହିଥାଏ ଏବଂ ପାଚନ କ୍ରିୟା ଭଲ ଭାବରେ କାମ କରେ। ଏହା ବ୍ୟତୀତ କମ୍ ତେଲ ଖାଇବା ଦ୍ୱାରା ତ୍ୱଚାକୁ ମଧ୍ୟ ଲାଭ ମିଳିଥାଏ ଏବଂ ବ୍ରଣ ଭଳି ସମସ୍ୟା କମିଯାଏ।
ତେଲ ୧୦% ହ୍ରାସ କରିବାର ପ୍ରଭାବ ଛୋଟ କଥା ଭାବିପାରନ୍ତି, କିନ୍ତୁ ଏହି ଅଭ୍ୟାସ ଦୀର୍ଘକାଳୀନ ଭାବରେ ମଧୁମେହ, ଫ୍ୟାଟି ଲିଭର, ଉଚ୍ଚ ରକ୍ତଚାପ ଏବଂ ହୃଦରୋଗକୁ ରୋକିବାରେ ସାହାଯ୍ୟ କରିପାରିବ।
ଖାଦ୍ୟରେ ତେଲର ପରିମାଣ ଟିକିଏ କମ କଲେ ମଧ୍ୟ ଶରୀର ଉପରେ ଏହାର ବଡ଼ ପ୍ରଭାବ ପଡ଼ିପାରେ। ଏହା କେବଳ ରୋଗକୁ ରୋକିନଥାଏ ବରଂ ଜୀବନଶୈଳୀକୁ ସୁସ୍ଥ କରିଥାଏ। ତେଣୁ, ଆଜିଠାରୁ ଆପଣଙ୍କ ଖାଦ୍ୟରେ ଟିକେ କମ ତେଲ ବ୍ୟବହାର କରିବାର ଅଭ୍ୟାସ କରନ୍ତୁ। ଏହା ଏକ ଛୋଟ ପଦକ୍ଷେପ କିନ୍ତୁ ଦୀର୍ଘକାଳୀନ ସ୍ୱାସ୍ଥ୍ୟ ଦିଗରେ ଏକ ବଡ଼ ପରିବର୍ତ୍ତନ ଆଣିପାରେ।
Comments are closed.