ନୂଆଦିଲ୍ଲୀ: ଅପରେସନ ସିନ୍ଦୂର ବେଳେ ଭାରତ ସୀମାରେ ୩ ଶତ୍ରୁ ଦେଶ ସହ ଲଢୁଥିଲା । ଭାରତୀୟ ସେନାର ଉପ-ମୁଖ୍ୟ ସେନା କର୍ମଚାରୀ (କ୍ଷମତା ବିକାଶ ଏବଂ ନିରନ୍ତରତା) ଲେଫ୍ଟନାଣ୍ଟ ଜେନେରାଲ ରାହୁଲ ଆର ସିଂହ ଶୁକ୍ରବାର ଦିନ ନୂଆଦିଲ୍ଲୀରେ ଏଫଆଇସିସିଆଇ ଦ୍ୱାରା ଆୟୋଜିତ ‘ନ୍ୟୁ ଏଜ୍ ମିଲିଟାରୀ ଟେକ୍ନୋଲୋଜି’ କାର୍ଯ୍ୟକ୍ରମରେ ଭାରତ-ପାକିସ୍ତାନ ସୀମା ଉତ୍ତେଜନା ଏବଂ ଅପରେସନ ସିନ୍ଦୂର ସମୟରେ ସାମ୍ନା କରାଯାଇଥିବା ଚ୍ୟାଲେଞ୍ଜ ବିଷୟରେ ଖୋଲାଖୋଲି ଭାବରେ କହି କିଛି ଏପରି ବଡ ଖୁଲାସା କରିଛନ୍ତି । ସେ କହିଛନ୍ତି ଯେ ଏହି ଅପରେସନରେ କେବଳ ପାକିସ୍ତାନ ନୁହେଁ, ବରଂ ଚୀନ୍ ଏବଂ ତୁର୍କୀ ଭାରତ ପାଇଁ ବଡ ଚ୍ୟାଲେଞ୍ଜ ସାଜିଥିଲା । ଯାହା ଭାରତକୁ ଏହାର ବାୟୁ ପ୍ରତିରକ୍ଷା ବ୍ୟବସ୍ଥାକୁ ଆହୁରି ମଜବୁତ କରିବାର ଆବଶ୍ୟକତା ଅନୁଭବ କରାଇଛି।
ଅପରେସନ ସିନ୍ଦୁରରେ ଚୀନର ଭୂମିକା ନେି ଲେଫ୍ଟନାଣ୍ଟ ଜେନେରାଲ ରାହୁଲ ଆର ସିଂହ ପ୍ରକାଶ କରିଛନ୍ତି ଯେ ଅପରେସନ ସିନ୍ଦୂର ସମୟରେ ପାକିସ୍ତାନ ଚୀନ୍ ଠାରୁ ପ୍ରକୃତ-ସମୟ ଗୁପ୍ତ ସୂଚନା ପାଉଥିଲା। ସେ କହିଛନ୍ତି, ଯେତେବେଳେ ଭାରତ ଏବଂ ପାକିସ୍ତାନ ମଧ୍ୟରେ ଡିଜିଏମଓ (ସାମ୍ୟ ଅପରେସନ୍ ମହାନିର୍ଦ୍ଦେଶକ) ସ୍ତରୀୟ ଆଲୋଚନା ଚାଲିଥିଲା, ପାକିସ୍ତାନ ଆମର ଗୁରୁତ୍ୱପୂର୍ଣ୍ଣ ସାମରିକ କାର୍ଯ୍ୟକଳାପର ଲାଇଭ୍ ସୂଚନା ପାଉଥିଲା। ଏହି ସୂଚନା ଚୀନ୍ ପାକିସ୍ତାନକୁ ଦେଉଥିଲା । ଏଥିସହିତ ପାକିସ୍ତାନ ପାଖରେ ଥିବା ସାମରିକ ଉପକରଣର ୮୧ ପ୍ରତିଶତ ଚୀନର ଅଟେ ଏବଂ ଏହି ଅପରେସନ ଚୀନ୍ କୁ ତା’ର ଅସ୍ତ୍ରଶସ୍ତ୍ର ପରୀକ୍ଷା କରିବା ପାଇଁ ଏକ ‘ଲାଇଭ୍ ଲ୍ୟାବ’ ଭଳି ସୁଯୋଗ ପ୍ରଦାନ କରିଥିଲା। ଏଥିସହିତ ତୁର୍କୀର ଭୂମିକା ନେଇ ଲେଫ୍ଟନାଣ୍ଟ ଜେନେରାଲ ରାହୁଲ ଆର ସିଂହ କହିଛନ୍ତି ଯେ ତୁର୍କୀ ମଧ୍ୟ ପାକିସ୍ତାନକୁ ଡ୍ରୋନ୍ ଏବଂ ଅନ୍ୟାନ୍ୟ ସହାୟତା ଯୋଗାଇଥିଲା। ତୁର୍କୀ ଯୁଦ୍ଧ ସମୟରେ ବାୟକ୍ତର ଭଳି ଡ୍ରୋନ୍ ଏବଂ ତାଲିମପ୍ରାପ୍ତ ଲୋକଙ୍କୁ ଯୋଗାଇଥିଲା। ସେ ଜୋର ଦେଇ କହିଛନ୍ତି ଯେ ଭାରତ ଏବେ ତିନୋଟି ମୋର୍ଚ୍ଚା – ପାକିସ୍ତାନ, ଚୀନ୍ ଏବଂ ତୁର୍କୀ ସହିତ ଏକକାଳୀନ ମୁକାବିଲା କରିବାର ଚ୍ୟାଲେଞ୍ଜର ସମ୍ମୁଖୀନ ହେଉଛି।
ଏଥିସହିତ ଯୁଦ୍ଧ ବିରତି କାହିଁକି ହେଲା ବୋଲି ପ୍ରଶ୍ନରେ ଲେଫ୍ଟନାଣ୍ଟ ଜେନେରାଲ ସିଂହ କହିଛନ୍ତି ଯେ ଭାରତୀୟ ସେନା ଅପରେସନ୍ ସିନ୍ଦୁରରେ ଏତେ ସଠିକ୍ ଏବଂ ପ୍ରଭାବଶାଳୀ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା ଯେ ପାକିସ୍ତାନ ଯୁଦ୍ଧବିରାମ ମାଗିବାକୁ ବାଧ୍ୟ ହୋଇଥିଲା। ସେ କହିଛନ୍ତି, ଆମର ଆଉ ଏକ ବଡ଼ ଆକ୍ରମଣ ପ୍ରସ୍ତୁତ ଥିଲା। ପାକିସ୍ତାନ ଜାଣିପାରିଲା ଯେ ଯଦି ଏହି ଆକ୍ରମଣ ହୁଏ, ତେବେ ସେମାନଙ୍କର ପରିସ୍ଥିତି ବହୁତ ଖରାପ ହୋଇଯିବ। ତେଣୁ ସେମାନେ ଯୁଦ୍ଧବିରାମ ପାଇଁ ଆବେଦନ କଲେ। ଏହି ରଣନୈତିକ ପଦକ୍ଷେପ ଭାରତର ସାମରିକ ଶକ୍ତି ଏବଂ କୂଟନୈତିକ ଚତୁରତାକୁ ପ୍ରତିଫଳିତ କରେ।
ଲେଫ୍ଟନାଣ୍ଟ ଜେନେରାଲ ସିଂହ ଭାରତର ବାୟୁ ପ୍ରତିରକ୍ଷା ବ୍ୟବସ୍ଥାର ଶକ୍ତିକୁ ପ୍ରଶଂସା କରିଛନ୍ତି, କିନ୍ତୁ ଭବିଷ୍ୟତରେ ଅଧିକ ସତର୍କ ରହିବାକୁ ପଡିବ ବୋଲି ମଧ୍ୟ ଚେତାବନୀ ଦେଇଛନ୍ତି। ସେ କହିଛନ୍ତି, ଏଥର ଆମର ସହର ଏବଂ ଜନବହୁଳ ଅଞ୍ଚଳଗୁଡ଼ିକ ଉପରେ ଆକ୍ରମଣ ହୋଇନାହିଁ, କିନ୍ତୁ ପରବର୍ତ୍ତୀ ସମୟରେ ଆମକୁ ଏଥିପାଇଁ ପ୍ରସ୍ତୁତ ରହିବାକୁ ପଡିବ। ସେ ଜୋର ଦେଇ କହିଥିଲେ ଯେ ପାକିସ୍ତାନ, ଚୀନ୍ ଏବଂ ତୁର୍କୀ ଭଳି ଦେଶରୁ ଆସୁଥିବା ବିପଦର ମୁକାବିଲା କରିବା ପାଇଁ ଭାରତକୁ ଏକ ଦୃଢ଼ ଏବଂ ବହୁସ୍ତରୀୟ ବାୟୁ ପ୍ରତିରକ୍ଷା ପ୍ରଣାଳୀ ବିକଶିତ କରିବାକୁ ପଡିବ।
ଲେଫ୍ଟନାଣ୍ଟ ଜେନେରାଲ ରାହୁଲ ଆର ସିଂହ ମଧ୍ୟ ଯୁଦ୍ଧବିରତି ନିଷ୍ପତ୍ତି ପ୍ରସଙ୍ଗରେ ବକ୍ତବ୍ୟ ରଖିଥିଲେ। ସେ କହିଥିଲେ, ଯେତେବେଳେ ଆମେ ଏକ ସାମରିକ ଲକ୍ଷ୍ୟ ହାସଲ କରୁ, ଆମେ ଏହାକୁ ବନ୍ଦ କରିବାକୁ ଚେଷ୍ଟା କରିବା ଉଚିତ। ଯୁଦ୍ଧ ଆରମ୍ଭ କରିବା ସହଜ, କିନ୍ତୁ ଏହାକୁ ନିୟନ୍ତ୍ରଣ କରିବା ବହୁତ କଷ୍ଟକର। ତେଣୁ ମୁଁ କହିବି ଯେ ଏହା ଠିକ୍ ସମୟରେ ଯୁଦ୍ଧ ବନ୍ଦ କରିବା ପାଇଁ ନିଆଯାଇଥିବା ଏକ ଅତ୍ୟନ୍ତ ଚମତ୍କାର ପଦକ୍ଷେପ ଥିଲା।
Comments are closed.