ବିରୋଧୀଙ୍କ ଅସ୍ତ୍ର ବିହାରର ମିନ୍ତା ଦେବୀ….୩୫ ଜାଗାରେ ବୟସ ପଡିଲା ୧୨୪, ଖୋଦ୍ ମିନ୍ତା କହିଲେ….

ନୂଆଦିଲ୍ଲୀ: ଏବେ ଭୋଟର ଜାଲିଆତି ନେଇ ବିରୋଧୀଙ୍କ ଗର୍ଜନରେ ଉଠୁଛି ପଡୁଛି ଦିଲ୍ଲୀରୁ ପଲ୍ଲୀ । ବିଶେଷ କରି ବିହାର ନିର୍ବାଚନରେ ଏସଆଇଆର ନେଇ ସରକାରଙ୍କୁ ଘେରିଛନ୍ତି ବିରୋଧୀ ନେତା । ବିହାରର ସିୱାନ ଜିଲ୍ଲାର ଜଣେ ବାସିନ୍ଦା ମିନ୍ତା ଦେବୀଙ୍କ ବୟସକୁ ନେଇ ରାଜନୈତିକ ହଙ୍ଗାମା ଚାଲିଛି । ଭୋଟର କାର୍ଡରେ ତାଙ୍କ ବୟସ ୧୨୪ ବର୍ଷ ଲେଖାଯାଇଛି ଏବଂ ତାଙ୍କ ଜନ୍ମ ତାରିଖ ୧୯୦୦ ଲେଖାଯାଇଛି। କଂଗ୍ରେସ ଏହାର ପ୍ରତିବାଦ କରି ତାଙ୍କ ନାମ ଲେଖାଥିବା ଏକ ଟି-ସାର୍ଟ ପିନ୍ଧି ପ୍ରତିବାଦ କରିଥିଲା । ଯାହାକୁ ନେଇ ଏବେ ଉକ୍ତ ମହିଲା ଜଣଙ୍କର ପ୍ରତିକ୍ରିୟା ସାମ୍ନାକୁ ଆସିଥିବା ବେଳେ ଏନେଇ ସେ ବିରକ୍ତି ପ୍ରକାଶ କରିଛନ୍ତି ।

ତେବେ ମଙ୍ଗଳବାର କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧୀ ଭଦ୍ରା ଏବଂ ଆର. ସୁଧା ନିର୍ବାଚନ କମିଶନଙ୍କ ଭୋଟର ତାଲିକାରେ ୧୨୪ ବର୍ଷୀୟ ଭୋଟର ଭାବରେ ତାଲିକାଭୁକ୍ତ ହୋଇଥିବା ମିନ୍ତା ଦେବୀଙ୍କ ନାମ ଥିବା ଟି-ସାର୍ଟ ପିନ୍ଧିଥିବାର ଦେଖାଯାଇଥିଲା। ୨୦୨୫ ମସିହା ଅଗଷ୍ଟ ୧୨ ତାରିଖ, ମଙ୍ଗଳବାର ଦିନ ନୂଆଦିଲ୍ଲୀରେ ସଂସଦର ମୌସୁମୀ ଅଧିବେଶନ ସମୟରେ କଥିତ ନିର୍ବାଚନ ଜାଲିଆତି ଏବଂ ଭୋଟର ତାଲିକାର ସ୍ୱତନ୍ତ୍ର ଗଭୀର ସଂଶୋଧନ ପ୍ରସଙ୍ଗ ଉପରେ ଇଣ୍ଡିଆ ବ୍ଲକ୍ ସଦସ୍ୟଙ୍କ ଦ୍ୱାରା ଏକ ପ୍ରତିବାଦ ସମୟରେ ଏହି ଘଟଣା ଘଟିଥିଲା। ଯାହାକୁ ପୂର୍ବରୁ କଂଗ୍ରେସ ସାଂସଦ ରାହୁଲ ଗାନ୍ଧୀ ନିଜ ଭୋଟର ଜାଲିଆତି ପ୍ରେସ୍ କନଫରେନ୍ସରେ ଆଗରୁ ସୂଚିତ କରିଥିଲେ । ଏନେଇ ହଙ୍ଗାମା ଜୋର ତେଜିବାରୁ ଏବେ ଏହା ସାମ୍ନାକୁ ଆସିଛି ଯେ ମିନ୍ତା ଦେବୀଙ୍କର ପ୍ରକୃତ ବୟସ ୩୫ ବର୍ଷ । ଭୋଟର କାର୍ଡରେ ତାଙ୍କ ବୟସ ୧୨୪ ବର୍ଷ ଉଲ୍ଲେଖ ଥିବାରୁ ମିନ୍ତା ଦେବୀ ଏବଂ ତାଙ୍କ ପରିବାର ବିରକ୍ତ ପ୍ରକାଶ କରିଛନ୍ତି ।  ସେ କହିଛନ୍ତି ଯେ ସେମାନେ ତାଙ୍କୁ ଦେଖି ନଥିବା ବେଳେ ସେମାନେ କିପରି ଭୋଟର ପରିଚୟପତ୍ର ତିଆରି କଲେ।

ଏନେଇ ମିନ୍ତା ଦେବୀ କହିଛନ୍ତି, ଯିଏ ତାଲିକା ତିଆରି କରୁଛନ୍ତି ସେ ମୋତେ ଦେଖି ନାହାଁନ୍ତି, ତେଣୁ ସେମାନେ ଏହାକୁ କିପରି ଏପରି କଲେ। ସେ କହିଛନ୍ତି ଯେ ମୁଁ ଭୋଟର ତାଲିକା ତିଆରି କରିବା ପାଇଁ ମୋର ଆଧାର କାର୍ଡ ବ୍ୟବହାର କରିଥିଲି। ଆଧାର କାର୍ଡରେ ମୋର ବୟସ ୧୫/୦୭/୧୯୯୦ ଲେଖାଯାଇଛି। ଏହି ସମ୍ପର୍କରେ କେହି ମୋତେ ଭେଟିବାକୁ ଆସି ନାହାଁନ୍ତି। ଲୋକମାନେ ନିଜେ ମୋର ବୟସ ଭୁଲ କରିଦେଇଛନ୍ତି, ମୁଁ କ’ଣ କରିବି?

ତେବେ ବିହାରର ବାସିନ୍ଦା ମିନ୍ତା ଦେବୀଙ୍କ ନାମ ପ୍ରଥମ ଥର ପାଇଁ ଭୋଟର ତାଲିକାରେ ଯୋଡାଯାଇଛି। ସିୱାନର ଦାରୁଣ୍ଡା ବିଧାନସଭା ନିର୍ବାଚନମଣ୍ଡଳୀର ୯୪ ନମ୍ବର ବୁଥ୍ ରେ ତାଙ୍କ ନାମ ୫୨୬ ନମ୍ବରରେ ଦେଖାଯାଉଛି। କେବଳ ବୟସ ନୁହେଁ, ଘର ନମ୍ବର ବଦଳରେ ଭୋଟର ତାଲିକାରେ ତାଙ୍କ ସ୍ୱାମୀଙ୍କ ନାମ ଲେଖାଯାଇଛି । ଭୋଟର ତାଲିକାରେ ଏଭଳି ସବୁ ତ୍ରୁଟିକୁ ନେଇ ଏବେ ବିରୋଧୀଙ୍କୁ ଭଲ ଖୋରାକ୍ ମିଳିଛି । ପୂର୍ବରୁ ଭୋଟ ଜାଲିଆତି ନେଇ ଲଗାତାର ବିରୋଧୀ ଅଭିଯୋଗ କରୁଥିବା ବେଳେ ଏବେ ଏଭଳି ସବୁ ଘଟଣା ତାଙ୍କୁ ଭଲ ସୁଯୋଗ ଦେଇଛି । ଯାହାକୁ ନେଇ ଏବେ ସରକାରଙ୍କୁ ଜବାବ ମାଗୁଛନ୍ତି ବିରୋଧୀ ।

ଅନ୍ୟପଟେ ଏହାକୁ ନେଇ ସଫେଇ ଦେଇଛନ୍ତି ନିର୍ବାଚନ କମିଶନ । ନିର୍ବାଚନ କମିଶନ ମଧ୍ୟ ସମ୍ପୂର୍ଣ୍ଣ ମାମଲା ଉପରେ ନଜର ରଖିଛନ୍ତି ଏବଂ କହିଛନ୍ତି ଯେ ଉକ୍ତ ଭୁଲ ବିଷୟରେ ମିନ୍ତା ଦେବୀଙ୍କ ସହିତ ଯୋଗାଯୋଗ କରାଯାଇଛି। ଏହା ମଧ୍ୟ କୁହାଯାଇଛି ଯେ ମିନ୍ତା ଦେବୀ ଅନଲାଇନରେ ଆବେଦନ ପୂରଣ କରିଥିଲେ। ତ୍ରୁଟି ପ୍ରତି ତାଙ୍କର ଦୃଷ୍ଟି ଆକର୍ଷଣ କରାଯାଇଛି ଏବଂ ତାଙ୍କ ପକ୍ଷରୁ ଆବେଦନକୁ ନିଆଯାଇଛି। ମିନ୍ତା ଦେବୀଙ୍କ ଶ୍ୱଶୁର ତେଜ ବାହାଦୁର ସିଂହ କହିଛନ୍ତି, ଏହା ସମ୍ପୂର୍ଣ୍ଣ ଭାବରେ ବିଏଲଓଙ୍କ ଭୁଲ।