SIR in Bihar:ବିଦେଶୀ ସନ୍ଦେହରେ ୩ ଲକ୍ଷ ଭୋଟରଙ୍କୁ ECIର ନୋଟିସ ; କୁହାଗଲା ‘ନାଗରିକତା ପ୍ରମାଣ କରିବାକୁ’

ପାଟନା:ବିହାରରେ ଚାଲିଥିବା ସ୍ପେଶାଲ ଇଣ୍ଟେନସିଭ ରିଭିଜନ (SIR) ମଧ୍ୟରେ, ପ୍ରାୟ ତିନି ଲକ୍ଷ ଭୋଟରଙ୍କୁ ନୋଟିସ ପଠାଯାଇଛି ଯାହାଙ୍କ ନାଗରିକତା “ସନ୍ଦିଗ୍ଧ” ବୋଲି ସନ୍ଦେହ କରାଯାଉଛି। ନିର୍ବାଚନ କମିଶନଙ୍କ ସୂଚନା ଅନୁଯାୟୀ, ବିହାରରେ ଚୂଡ଼ାନ୍ତ ଭୋଟର ତାଲିକା ସେପ୍ଟେମ୍ବର ୩୦ ତାରିଖରେ ପ୍ରକାଶିତ ହେବ। ଏହା ପୂର୍ବରୁ ତିନି ଲକ୍ଷରୁ ଅଧିକ ‘ସନ୍ଦିଗ୍ଧ’ ଭୋଟରଙ୍କ ନାମ ବାଦ ଦିଆଯାଇପାରେ।

ସୂଚନାଥାଉକି, ନୋଟିସ ଜାରି ହୋଇଥିବା ଭୋଟରମାନେ ସେମାନଙ୍କର ଭାରତୀୟ ନାଗରିକତା ପ୍ରମାଣିତ କରିବା ପାଇଁ କାଗଜପତ୍ର ଦାଖଲ କରିବାରେ ବିଫଳ ହୁଅନ୍ତି, ତେବେ ସେମାନଙ୍କ ନାମ ଚୂଡ଼ାନ୍ତ ଭୋଟର ତାଲିକାରେ ଅନ୍ତର୍ଭୁକ୍ତ ହେବ ନାହିଁ। ଚୂଡ଼ାନ୍ତ ଭୋଟର ତାଲିକା ସେପ୍ଟେମ୍ବର ୩୦ ରେ ପ୍ରକାଶିତ ହେବ।

ଏସଡିଏମଙ୍କ ତଦନ୍ତ ରିପୋର୍ଟ ଆଧାରରେ, କିଶନଗଞ୍ଜ, ପୂର୍ଣ୍ଣିଆ, ପଶ୍ଚିମ ଚମ୍ପାରଣ, ପୂର୍ବ ଚମ୍ପାରଣ, ଅରାରିଆ, ସହରସା, ମଧୁବନୀ ଏବଂ ସୁପୌଲ ଜିଲ୍ଲାର ଭୋଟରମାନଙ୍କୁ ନୋଟିସ ଦିଆଯାଇଛି। ଅର୍ଥାତ୍, ନେପାଳ ଏବଂ ବାଂଲାଦେଶ ସୀମାନ୍ତ ସୀମାଞ୍ଚଳରେ ଏପରି ଅନେକ ମାମଲା ରହିଛି। ଏହି ୩ ଲକ୍ଷ ଲୋକ ବାଂଲାଦେଶ, ନେପାଳ, ମିଆଁମାର ଏବଂ ଆଫଗାନିସ୍ତାନରୁ ବେଆଇନ ଭାବରେ ଭାରତରେ ପ୍ରବେଶ କରିଥିବା ଏବଂ ନକଲି କାଗଜପତ୍ର ଆଧାରରେ ଭୋଟର ହୋଇପାରନ୍ତି ।

ସେମାନେ କିପରି ସେମାନଙ୍କର ଆଧାର ଏବଂ ଅନ୍ୟାନ୍ୟ କାଗଜପତ୍ର ତିଆରି କଲେ ତାହାର ମଧ୍ୟ ତଦନ୍ତ କରାଯିବ। ଏହି ଭୋଟରମାନେ ଏପର୍ଯ୍ୟନ୍ତ ସେମାନଙ୍କର ପରିଚୟ ଯାଞ୍ଚ କରିବା ପାଇଁ ନିର୍ବାଚନ କମିଶନଙ୍କ ନିକଟରେ କୌଣସି କାଗଜପତ୍ର ଦାଖଲ କରିନାହାଁନ୍ତି ।

ଉଲ୍ଲେଖନୀୟ ଯେ ବିହାରରେ SIR ପ୍ରକ୍ରିୟା ଅଧୀନରେ, ୬୫ ଲକ୍ଷ ଏପରି ଲୋକଙ୍କୁ ଚିହ୍ନଟ କରାଯାଇସାରିଛି, ଯାହାଙ୍କ ନାମ ଚୂଡ଼ାନ୍ତ ଭୋଟର ତାଲିକାରୁ ବାଦ ଦିଆଯିବ । ଏମାନେ ଏପରି ଲୋକ ଯେଉଁମାନେ ମୃତ୍ୟୁବରଣ କରିଛନ୍ତି କିମ୍ବା ବିହାର ଛାଡି ଦେଶର ଅନ୍ୟ କୌଣସି ସ୍ଥାନରେ ସ୍ଥାୟୀ ଭାବରେ ରହିବା ଆରମ୍ଭ କରିଛନ୍ତି, କିମ୍ବା ଭୋଟର ତାଲିକାରେ ସେମାନଙ୍କର ନାମ ଦୁଇଟି ସ୍ଥାନରେ ଅଛି । ନିର୍ବାଚନ କମିଶନ ଯେଉଁ ଭୋଟରମାନଙ୍କୁ ନୋଟିସ ପଠାଉଛି ସେମାନଙ୍କୁ ସେମାନଙ୍କର ନାଗରିକତା ପରିଚୟ ପ୍ରଦାନ ଏବଂ ଯାଞ୍ଚ କରିବାକୁ କୁହାଯାଉଛି।