ପ୍ରଧାନମନ୍ତ୍ରୀ ମୋଦିଙ୍କୁ ‘ଆତଙ୍କବାଦୀ’ କହିଲେ ମଲ୍ଲିକାର୍ଜୁନ ଖଡଗେ, ଦେଶବାସୀଙ୍କୁ କ୍ଷମା ମାଗିବାକୁ ଦାବି କଲା ବିଜେପି…

ନୂଆଦିଲ୍ଲୀ: ତାମିଲନାଡୁ ବିଧାନସଭା ନିର୍ବାଚନ ପାଇଁ ଭୋଟ୍ ଏପ୍ରିଲ୍ ୨୩ ତାରିଖରେ ହେବାକୁ ଯାଉଛି । ନିର୍ବାଚନ ପାଇଁ ପ୍ରଚାର ମଙ୍ଗଳବାର ଶେଷ ହେବ । ଡିଏମକେ-କଂଗ୍ରେସ ମେଣ୍ଟ ଏଆଇଏଡିଏମକେ ଏବଂ ବିଜେପି ମେଣ୍ଟ ବିରୋଧରେ ମୁହାଁମୁହିଁ ହେଉଛନ୍ତି । ସମସ୍ତ ରାଜନୈତିକ ଦଳ ନିର୍ବାଚନ ପ୍ରଚାରରେ ସେମାନଙ୍କର ପୂର୍ଣ୍ଣ ପ୍ରୟାସ କରିଛନ୍ତି । ଏହା ଭିତରେ କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମ୍ପର୍କରେ ଏକ ବିବାଦୀୟ ବୟାନ ଦେଇଛନ୍ତି । ସେ ପ୍ରଧାନମନ୍ତ୍ରୀ ମୋଦିଙ୍କୁ ଆତଙ୍କବାଦୀ ବୋଲି କହିଛନ୍ତି । ତାଙ୍କର ଏହି ବୟାନ ଏବେ ବିବାଦ ସୃଷ୍ଟି କରିଛି ।

କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ତାମିଲନାଡୁର ଚେନ୍ନାଇରେ କହିଛନ୍ତି – “ଏହି ଲୋକମାନେ (AIADMK) ମୋଦିଙ୍କ ସହିତ କିପରି ହାତ ମିଳାଇପାରିବେ? ସେ ଜଣେ ଆତଙ୍କବାଦୀ । ସେ ସମାନତାରେ ବିଶ୍ୱାସ କରନ୍ତି ନାହିଁ । ତାଙ୍କ ଦଳ ସମାନତା ଏବଂ ନ୍ୟାୟରେ ବିଶ୍ୱାସ କରେ ନାହିଁ । ଏବଂ ଏହି ଲୋକମାନେ ତାଙ୍କ ସହିତ ଯୋଗଦେବାର ଅର୍ଥ ହେଉଛି ସେମାନେ ଗଣତନ୍ତ୍ରକୁ ଦୁର୍ବଳ କରୁଛନ୍ତି।”

ପରେ ଖଡଗେ ତାଙ୍କ ବକ୍ତବ୍ୟ ଉପରେ ସ୍ପଷ୍ଟୀକରଣ ଦେଇଥିଲେ । ପ୍ରଧାନମନ୍ତ୍ରୀ ମୋଦିଙ୍କ ଉପରେ ତାଙ୍କର ‘ଆତଙ୍କବାଦୀ’ ମନ୍ତବ୍ୟ ବିଷୟରେ ପଚରାଯିବାରୁ, ସେ ସ୍ପଷ୍ଟ କରିଥିଲେ ଯେ, ସେ କହିଥିଲେ ଯେ କେନ୍ଦ୍ରୀୟ ଏଜେନ୍ସିଗୁଡ଼ିକ ବିଜେପି ସହିତ ମିଶି କାମ କରୁଥିବାରୁ ପ୍ରଧାନମନ୍ତ୍ରୀ ମୋଦି ତାଙ୍କ ବିରୋଧୀମାନଙ୍କୁ ‘ଆତଙ୍କବାଦୀ’ କରନ୍ତି ।

ନିଜର ସ୍ପଷ୍ଟୀକରଣ ଦେଇ ସେ କହିଛନ୍ତି, ” ପ୍ରଧାନମନ୍ତ୍ରୀ ମୋଦି ଲୋକଙ୍କୁ ଏବଂ ରାଜନୈତିକ ଦଳଗୁଡ଼ିକୁ ଭୟଭୀତ କରୁଛନ୍ତି । ମୁଁ କେବେ କହିନାହିଁ ଯେ ସେ ଜଣେ ଆତଙ୍କବାଦୀ । ମୁଁ ସ୍ପଷ୍ଟ କରିବାକୁ ଚାହୁଁଛି ଯେ ମୋଦି ସବୁବେଳେ ଧମକ ଦିଅନ୍ତି । ଇଡି, ଆଇଟି ଏବଂ ସିବିଆଇ ଭଳି ପ୍ରତିଷ୍ଠାନ ତାଙ୍କ ହାତରେ ଅଛି । ସେ ସୀମା ନିର୍ଦ୍ଧାରଣକୁ ମଧ୍ୟ ନିଜ ହାତରେ ନେବାକୁ ଚାହୁଁଛନ୍ତି।”

ବିଜେପି ଏହି ବକ୍ତବ୍ୟକୁ ନେଇ କଂଗ୍ରେସ ଦଳକୁ ଟାର୍ଗେଟ କରିଛି । କେନ୍ଦ୍ର ମନ୍ତ୍ରୀ ପିୟୂଷ ଗୋଏଲ କହିଛନ୍ତି ଯେ, ଆମକୁ ଲାଜ ଲାଗୁଛି ଯେ, କଂଗ୍ରେସ ଦଳ ଏହି ସ୍ତରକୁ ଖସିଯାଇଛି । ସେ ଗଣତାନ୍ତ୍ରିକ ଭାବରେ ନିର୍ବାଚିତ ପ୍ରଧାନମନ୍ତ୍ରୀଙ୍କୁ ଆତଙ୍କବାଦୀ ବୋଲି କହୁଛି । ସେ ଲୋକଙ୍କ ଦ୍ୱାରା ନିର୍ବାଚିତ ହୋଇଥିଲେ । ମୁଁ ଖଡଗେଙ୍କ ବକ୍ତବ୍ୟକୁ ଦୃଢ଼ ନିନ୍ଦା କରୁଛି ଏବଂ ପ୍ରଧାନମନ୍ତ୍ରୀ ମୋଦି ଏବଂ ଆମ ଦେଶର ଲୋକଙ୍କୁ ଅପମାନିତ କରିବା ପାଇଁ ତାଙ୍କୁ କ୍ଷମା ମାଗିବାକୁ ଦାବି କରୁଛି।”