‘ମୁଁ ଏତେ ତଳକୁ ଖସି ଯାଇ ନାହିଁ…’ : ବିଜୟଙ୍କ ପ୍ରତି ଈର୍ଷା କରୁଥିବା ଗୁଜବକୁ ନେଇ ଅସନ୍ତୋଷ ଝାଡିଲେ ରଜନୀକାନ୍ତ
ଚେନ୍ନାଇ: ଥାଲାପତି ବିଜୟ ତାମିଲନାଡୁର ମୁଖ୍ୟମନ୍ତ୍ରୀ ହେବା ପରଠାରୁ ସୋସିଆଲ ମିଡିଆରେ ଏକ ଗୁଜବ ସୃଷ୍ଟି ହୋଇଛି। କିଛିଦିନ ତଳେ ସାଉଥ ସୁପରଷ୍ଟାର ରଜନୀକାନ୍ତ ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କୁ ଭେଟିଥିଲେ। ଯହାକୁ ନେଇ ରାଜ୍ୟରେ ନାନା ଆଲୋଚନା ପର୍ଯ୍ୟାଲୋଚନା ଆରମ୍ଭ ହୋଇଯାଇଥିଲା। ସେ ବିଜୟଙ୍କ ବିଜୟରେ ଈର୍ଷା କରୁଛନ୍ତି ବୋଲି ଏକ ଖବର ପ୍ରଚାର ହୋଇଥିଲା। ରବିବାର ଏହାର ଜବାବ ରଖିଛନ୍ତି ରଜନୀକାନ୍ତ। ସାଉଥ ଇଣ୍ଡିଆନ୍ ସୁପରଷ୍ଟାର ରଜନୀକାନ୍ତ ରବିବାର (୧୭ ମଇ) ତାଙ୍କ ଚେନ୍ନାଇ ବାସଭବନରେ ଏକ ସାମ୍ବାଦିକ ସମ୍ମିଳନୀ ଡାକି ବିଜୟଙ୍କ ପ୍ରତି ଈର୍ଷା କରୁଥିବା ଖବରକୁ ନେଇ ଅସନ୍ତୋଷ ଝାଡିଛନ୍ତି।
ସମ୍ମିଳନୀ ସମୟରେ, ସେ ତାମିଲନାଡୁ ବିଧାନସଭା ନିର୍ବାଚନ ଫଳାଫଳକୁ ନେଇ ରାଜନୈତିକ କଳ୍ପନାଜଳ୍ପନା ଉପରେ ନିଜର ନୀରବତା ଭାଙ୍ଗିଥିଲେ। ସେ ସ୍ପଷ୍ଟ ଭାବରେ କହିଥିଲେ ଯେ ତାଙ୍କର ବକ୍ତବ୍ୟ ଏବଂ ବୈଠକଗୁଡ଼ିକୁ ଭୁଲ ଭାବରେ ଉପସ୍ଥାପନ କରାଯାଉଛି। ସେ କହିଥିଲେ ଯେ ଯଦି ସେ ଏହି ଗୁଜବର ଉତ୍ତର ଦେଇ ନଥାନ୍ତେ, ତେବେ ଲୋକମାନେ ସେଗୁଡ଼ିକୁ ବିଶ୍ୱାସ କରିଥାନ୍ତେ। ଏହି ସମ୍ମିଳନୀରେ ସେ କହିଛନ୍ତି ଯେ, ତାଙ୍କ ସ୍ତର ଏତେ ତଳକୁ ଖସି ଯାଇନି କି ସେ ଏତେ ନିମ୍ନସ୍ତରର ଲୋକେ ନୁହଁନ୍ତି ଯେ କୌଣସି ବ୍ୟକ୍ତି ପ୍ରତି ଈର୍ଷା କରିବେ।
ଏମ୍କେ ଷ୍ଟାଲିନଙ୍କୁ ଭେଟିବା ନେଇ ସେ କହିଛନ୍ତି ଯେ ସେ ପୂର୍ବତନ ମୁଖ୍ୟମନ୍ତ୍ରୀ ଏବଂ ଜଣେ ବନ୍ଧୁଙ୍କୁ ଭେଟିବାକୁ ଯାଇଥିଲି। କିନ୍ତୁ ଏହାକୁ ଭୁଲ ଭାବରେ ଦେଖାଯାଉଛି ଯେ ମୁଁ ବିଜୟଙ୍କ ମୁଖ୍ୟମନ୍ତ୍ରୀ ହେବାରେ ଖୁସି ନାହିଁ। ଏହା ସମ୍ପୂର୍ଣ୍ଣ ମିଛ ବୋଲି ରଜନୀକାନ୍ତ କହିଛନ୍ତି। ଚେନ୍ନାଇ ସ୍ଥିତ ପୋଏସ ଗାର୍ଡେନରେ ଥିବା ତାଙ୍କ ବାସଭବନରେ ମିଡିଆକୁ ପ୍ରତିକ୍ରିୟା ଦେଇ ସେ ଏପରି କହିଛନ୍ତି। ଯେହେତୁ ସେ ନିଜେ ରାଜନୀତିରେ ନାହାନ୍ତି ତେଣୁ ସେ ବିଜୟଙ୍କୁ ଈର୍ଷା କରନ୍ତି ନାହିଁ ବୋଲି କହି ସେ କହିଛନ୍ତି “ମୁଁ ବିଜୟଙ୍କୁ କାହିଁକି ଈର୍ଷା କରିବି? ହୁଏତ ଯଦି କମଲ (ହାସନ) ମୁଖ୍ୟମନ୍ତ୍ରୀ ହେବେ, ତେବେ ମୁଁ ଈର୍ଷା କରିପାରେ।”
ଅଭିନେତାରୁ ରାଜନେତା ହୋଇଥିବା ବିଜୟଙ୍କ ଦଳ ଟିଭିକେ ତାମିଲନାଡୁ ବିଧାନସଭା ନିର୍ବାଚନରେ ଏକ ବଡ଼ ବିଜୟ ହାସଲ କରିଛି। ଫଳାଫଳ ପରେ, ରିପୋର୍ଟ ପ୍ରକାଶ ପାଇଲା ଯେ ରଜନୀକାନ୍ତ ଫଳାଫଳରେ ଅସନ୍ତୁଷ୍ଟ ଥିଲେ, ଯେତେବେଳେ କିଛି ଲୋକ ଦାବି କରିଥିଲେ ଯେ ସେ ଦଳଗୁଡ଼ିକୁ ମିଶ୍ରଣ କରିବାକୁ ଚେଷ୍ଟା କରୁଛନ୍ତି। ଆଜି, ସେ ଏହି ସମସ୍ତ ଗୁଜବ ଖବର ଉପରେ ସ୍ପଷ୍ଟ କରିଦେଇଛନ୍ତି।
ରଜନୀକାନ୍ତ ଆହୁରି କହିଛନ୍ତି ଯେ ନିର୍ବାଚନ ଫଳାଫଳରେ ତାଙ୍କ ଦଳ ଜିତିବା ଦେଖାଯିବା ମାତ୍ରେ ସେ ବିଜୟଙ୍କୁ ଅଭିନନ୍ଦନ ଜଣାଇଥିଲେ, ହଁ ତେବେ ବିଜୟଙ୍କର ପ୍ରଥମ ନିର୍ବାଚନରେ ସେ ମୁଖ୍ୟମନ୍ତ୍ରୀ ଦେଖି ସେ ଆଶ୍ଚର୍ଯ୍ୟ ହୋଇଯାଇଥିଲେ ବୋଲି ରଜନୀକାନ୍ତ ସ୍ୱୀକାର କରିଛନ୍ତି। ତେବେ ତାଙ୍କର ସାମ୍ବାଦିକ ସମ୍ମିଳନୀ ଡାକିବାର ଉଦ୍ଦେଶ୍ୟ ବିଷୟରେ ସ୍ପଷ୍ଟ କରି ରଜନୀକାନ୍ତ କହିଛନ୍ତି ଯେ ନିର୍ବାଚନ ସମ୍ପର୍କରେ ତାଙ୍କ ବିଷୟରେ ଅନେକ ସମାଲୋଚନା କରାଯାଉଥିବାରୁ ସେ ଏହି ସାମ୍ବାଦିକ ସମ୍ମିଳନୀ ଡକାଇଥିଲେ। ଯଦି ସେ ଏହାର ଉତ୍ତର ନ ରଖିଥାନ୍ତେ ତେବେ ସେଗୁଡ଼ିକୁ ଲୋକେ ସତ ବୋଲି ଭାବି ନେଇଥାନ୍ତେ, ତେଣୁ ମୁଁ ଉତ୍ତର ଦେବାକୁ ଉଚିତ ଭାବିଲି ବୋଲି ରଜନୀକାନ୍ତ କହିଛନ୍ତି। ଅଯଥା ବିବାଦକୁ ନେଇ ସେ କହିଛନ୍ତି “ରଜନୀ ଏତେ ଶସ୍ତା ଓ ନିମ୍ନ ସ୍ତରର ଲୋକ ନୁହେଁ ଯେ କୌଣସି ବିଷୟରେ ଅନାବଶ୍ୟକ ଆଲୋଟନା କରିବ।”
ରଜନୀକାନ୍ତ କହିଛନ୍ତି ଯେ ନିର୍ବାଚନ ଫଳାଫଳ ପରେ ସେ ଡିଏମକେ ମୁଖ୍ୟ ଏବଂ ପୂର୍ବତନ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କୁ ଭେଟିଥିଲେ, ଯାହା ବହୁଳ ଭାବରେ ଆଲୋଚନା ହୋଇଥିଲା। କଲିଉଡ୍ କିମ୍ବଦନ୍ତୀ ରଜନୀକାନ୍ତ କହିଛନ୍ତି ଯେ ଷ୍ଟାଲିନଙ୍କ ସହ ତାଙ୍କର ବନ୍ଧୁତା ରାଜନୀତିଠାରୁ ଉର୍ଦ୍ଧ୍ୱରେ। ତେବେ କୋଲାଥୁରରେ ପୂର୍ବତନ ମୁଖ୍ୟମନ୍ତ୍ରୀଙ୍କ ପରାଜୟ ପାଇଁ ସେ ଦୁଃଖିତ ଅଛନ୍ତି ବୋଲି ରଜନୀକାନ୍ତ କହିଛନ୍ତି। ଅତୀତରେ ତିନିଥର ଏହି ଆସନରୁ ପ୍ରତିନିଧିତ୍ୱ କରିଥିବା ଷ୍ଟାଲିନ ଏଥର ଟିଭିକେର ଭିଏସ ବାବୁଙ୍କଠାରୁ ପ୍ରାୟ ୯ ହଜାର ଭୋଟରେ ପରାସ୍ତ ହୋଇଥିଲେ। ରଜନୀକାନ୍ତ ଓ ନୂଆ ତାମିଲନାଡୁ ମୁଖ୍ୟମନ୍ତ୍ରୀଙ୍କ ମଧ୍ୟରେ ୨୪ ବର୍ଷର ବୟସ ବ୍ୟବଧାନକୁ ରହିଛି। ଏତେ କମ ବୟସରେ ବିଜୟ ଦୁଇଟି ପ୍ରମୁଖ ଦ୍ରାବିଡ଼ ଦଳ – DMK ଏବଂ AIADMK ବିରୁଦ୍ଧରେ ଠିଆ ହୋଇ ସ୍ୱାଧୀନ ଭାବରେ ନିଜର ପରିଚୟ ସୃଷ୍ଟି କରିପାରିଲେ ଏଥିପାଇଁ ସେ ବିଜୟଙ୍କୁ ଖୁବ୍ ପ୍ରଶଂସା କରିଛନ୍ତି।