ବେଙ୍ଗାଲୁରୁ: କର୍ଣ୍ଣାଟକରେ ବର୍ତ୍ତମାନ ରାଜନୈତିକ ଅସ୍ଥିରତା ଦେଖାଦେଇଛି। ମୁଖ୍ୟମନ୍ତ୍ରୀ ପରିବର୍ତ୍ତନ ନେଇ ଶାସକ କଂଗ୍ରେସ ଦଳ ମଧ୍ୟରେ ମାସ ମାସ ଧରି କଳ୍ପନାଜଳ୍ପନା ଚାଲିଥିଲା, କିନ୍ତୁ ଆଜି ମୁଖ୍ୟମନ୍ତ୍ରୀ ସିଦ୍ଧରମୈୟା ଶେଷରେ ତାଙ୍କ ଇସ୍ତଫା ଘୋଷଣା କରିଛନ୍ତି। ଗତକାଲି ସିଦ୍ଧରମୈୟାଙ୍କ ନିକଟତମ ସୂତ୍ର ରିପୋର୍ଟ କରିଥିଲା ଯେ ସେ ଗୁରୁବାର ରାଜ୍ୟପାଳ ଥାୱରଚାନ୍ଦ ଗେହଲଟଙ୍କ ସହ ସାକ୍ଷାତ ପାଇଁ ଅନୁରୋଧ କରିଥିଲେ। ତଥାପି, ଆଜି ଲୋକଭବନ କହିଛି ଯେ ମୁଖ୍ୟମନ୍ତ୍ରୀ ଏପର୍ଯ୍ୟନ୍ତ ରାଜ୍ୟପାଳଙ୍କ ସହ ସାକ୍ଷାତ ପାଇଁ ଅନୁରୋଧ କରିନାହାଁନ୍ତି।
ରାଜନୈତିକ କଳ୍ପନାଜଳ୍ପନା ମଧ୍ୟରେ, ସିଦ୍ଧରମୈୟା ଗୁରୁବାର ଏକ କ୍ୟାବିନେଟ ବୈଠକ ଡାକିଥିଲେ, ଯେଉଁଠାରେ ସେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଘୋଷଣା କରିଥିଲେ। ଏହି ଘୋଷଣା ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କ ମୁଖ୍ୟମନ୍ତ୍ରୀ ହେବା ପାଇଁ ପଥ ପରିଷ୍କାର କରିଛି। କୁହାଯାଉଛି ଯେ ସିଦ୍ଧରମୈୟା ଆଜି ଅପରାହ୍ନ ୩ଟାରେ ରାଜ୍ୟପାଳଙ୍କ ନିକଟରେ ଇସ୍ତଫା ପ୍ରଦାନ କରିପାରନ୍ତି। କିନ୍ତୁ, ରାଜ୍ୟପାଳ ବର୍ତ୍ତମାନ କର୍ଣ୍ଣାଟକରେ ନଥିବାରୁ ସେ ରାଜ୍ୟପାଳଙ୍କ କାର୍ଯ୍ୟାଳୟରେ ଇସ୍ତଫା ପ୍ରଦାନ କରିପାରନ୍ତି।
ରାଜଭବନ ସୂତ୍ର ଅନୁଯାୟୀ, ରାଜ୍ୟପାଳଙ୍କୁ କୌଣସି ଜରୁରୀ କାମ ପାଇଁ ମୁମ୍ବାଇ ଯିବାକୁ ପଡିଛି। ତେବେ ଆଜି ମୁଖ୍ୟମନ୍ତ୍ରୀ ପଦରୁ ସିଦ୍ଦରମୈୟା କିପରି ଇସ୍ତଫା ଦେବେ ? ରାଜ୍ୟପାଳଙ୍କ ଅନୁପସ୍ଥିତି ଏକ ବଡ଼ ପ୍ରଶ୍ନ ଉଠାଇଛି। ଯଦି ମୁଖ୍ୟମନ୍ତ୍ରୀ ସିଦ୍ଦରମୈୟା ଇସ୍ତଫା ଦେବାକୁ ଚାହାଁନ୍ତି, ତେବେ ସେ କାହାକୁ ଏବଂ କିପରି ଇସ୍ତଫା ଦେବେ? ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (CMO) ପରିସ୍ଥିତି ସ୍ପଷ୍ଟ କରିଛି। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି, “ଆମେ ରାଜ୍ୟପାଳଙ୍କ କାର୍ଯ୍ୟାଳୟରେ ଆମର ଇସ୍ତଫାପତ୍ର ଦାଖଲ କରିବୁ। ଯଦି ରାଜ୍ୟପାଳ ଅନୁପସ୍ଥିତ ରୁହନ୍ତି, ତେବେ ଆମେ ଆମର କାର୍ଯ୍ୟ ଜାରି ରଖିବୁ। ରାଜ୍ୟପାଳଙ୍କ ଅନୁପସ୍ଥିତି ଯୋଗୁଁ ଯୋଜନାରେ କୌଣସି ପରିବର୍ତ୍ତନ ହେବ ନାହିଁ ।
ସାମ୍ବିଧାନିକ ନିୟମ ଅନୁଯାୟୀ, ଯଦି ରାଜ୍ୟପାଳ ରାଜ୍ୟ କିମ୍ବା ସହର ବାହାରେ ଥାଆନ୍ତି, ତେବେ ମୁଖ୍ୟମନ୍ତ୍ରୀ ରାଜଭବନର ସଚିବ କିମ୍ବା ଜଣେ ମନୋନୀତ ଅଧିକାରୀଙ୍କ ନିକଟକୁ ତାଙ୍କର ଇସ୍ତଫାପତ୍ର ଦାଖଲ କରିପାରିବେ। ଏହାକୁ ଆଇନଗତ ଭାବରେ ବୈଧ ବୋଲି ବିବେଚନା କରାଯାଏ ଏବଂ ରାଜ୍ୟପାଳଙ୍କ ଫେରିବା ପରେ କିମ୍ବା ତାଙ୍କ ସମ୍ମତି ପ୍ରାପ୍ତ ହେବା ପରେ ଏହାକୁ ଗ୍ରହଣ କରାଯାଏ।
ମୁଖ୍ୟମନ୍ତ୍ରୀ ସିଦ୍ଧରମୈୟା ଆଜି ସକାଳେ ରାଜ୍ୟପାଳଙ୍କ ସହ ସାକ୍ଷାତ ପାଇଁ ଅନୁରୋଧ କରିଥିଲେ। ତଥାପି, ଲୋକଭବନର ଅଧିକାରୀମାନେ ଗୁରୁବାର କହିଛନ୍ତି ଯେ ମୁଖ୍ୟମନ୍ତ୍ରୀ ଏପର୍ଯ୍ୟନ୍ତ ରାଜ୍ୟପାଳ ଗେହଲଟଙ୍କ ସହ ସାକ୍ଷାତ ପାଇଁ ଅନୁରୋଧ କରିନାହାଁନ୍ତି। ମୁଖ୍ୟମନ୍ତ୍ରୀ ରାଜ୍ୟପାଳଙ୍କ ସହ ସାକ୍ଷାତ ପାଇଁ ଅନୁରୋଧ କରିଛନ୍ତି କି ନାହିଁ ପଚରାଯିବାରୁ ଲୋକଭବନର ଜଣେ ଉଚ୍ଚ ଅଧିକାରୀ କହିଛନ୍ତି, “ରାଜ୍ୟପାଳ ଏଠାରେ ନାହାନ୍ତି। ବୈଠକ ବିଷୟରେ କୌଣସି ସୂଚନା ନାହିଁ। ଏପର୍ଯ୍ୟନ୍ତ ଏପରି କୌଣସି ବାର୍ତ୍ତା କିମ୍ବା ସୂଚନା ମିଳିନାହିଁ।” ସେମାନଙ୍କ ଅନୁଯାୟୀ, ସିଦ୍ଧରମୈୟା ରାଜ୍ୟପାଳ ଫେରିବା ପରେ ତାଙ୍କ ସହ ସାକ୍ଷାତ କରିପାରିବେ।
ମୁଖ୍ୟମନ୍ତ୍ରୀ ଲୋକଭବନର ସଚିବଙ୍କୁ ମଧ୍ୟ ତାଙ୍କର ଇସ୍ତଫାପତ୍ର ପ୍ରଦାନ କରିପାରିବେ କି ନାହିଁ ସେ ସମ୍ପର୍କରେ ଅଧିକାରୀ କହିଛନ୍ତି ଯେ ମୁଖ୍ୟମନ୍ତ୍ରୀ ସିଦ୍ଧରମୈୟା ଚାହିଁଲେ ଏହା କରିପାରିବେ। କିନ୍ତୁ ଯେତେବେଳେ ପଚରାଗଲା ଯେ ଏହା ରାଜ୍ୟପାଳଙ୍କ ନିକଟରେ ଇସ୍ତଫାପତ୍ର ଦାଖଲ କରିବା ପରି ବୈଧ ହେବ କି, ଅଧିକାରୀ ଜଣକ କହିଲେ, “ହଁ। ରାଜ୍ୟପାଳ ଫେରି ଆସିଲେ, ସେ ଏହାକୁ ନିଶ୍ଚିତ କରିବେ। ପ୍ରକ୍ରିୟା ଆଧାରରେ, ରାଜ୍ୟପାଳ ତାଙ୍କୁ (ସିଦ୍ଧାରମେୟା) ପୁଣି ଥରେ ଆସି ବ୍ୟକ୍ତିଗତ ଭାବରେ ଇସ୍ତଫାପତ୍ର ଦାଖଲ କରିବାକୁ କହିପାରିବେ।”