ନୂଆଦିଲ୍ଲୀ: ଯଦି ଆପଣ ଜଣେ ଚାକିରିଆ କିମ୍ବା ବ୍ୟବସାୟୀ ଏବଂ ଚଳିତ ଆର୍ଥିକ ବର୍ଷ ପାଇଁ ଆୟକର ରିଟର୍ଣ୍ଣ, ITR ଦାଖଲ କରିବାକୁ ପ୍ରସ୍ତୁତ ହେଉଛନ୍ତି, ତେବେ ଏହି ଖବର ଆପଣଙ୍କ ପାଇଁ ଅତ୍ୟନ୍ତ ଜରୁରୀ । ଆୟକର ବିଭାଗ ପକ୍ଷରୁ ପୋର୍ଟାଲ୍ ଲାଇଭ୍ ହୋଇସାରିଥିଲେ ମଧ୍ୟ ଏବେ ଆଇଟିଆର୍ ଫାଇଲ୍ କରିବା ଆପଣଙ୍କୁ ମହଙ୍ଗା ପଡ଼ିପାରେ । ଟ୍ୟାକ୍ସ ବିଶେଷଜ୍ଞଙ୍କ ଅନୁସାରେ, ଜୁନ୍ ୧୫ ତାରିଖ ପୂର୍ବରୁ ଆଦୌ ITR ଦାଖଲ କରନ୍ତୁ ନାହିଁ, ନଚେତ୍ ଆପଣଙ୍କ ପାଖକୁ ଆସିପାରେ ଆୟକର ବିଭାଗର ନୋଟିସ୍।
କାହିଁକି ଜୁନ୍ ୧୫ ପର୍ଯ୍ୟନ୍ତ ଅପେକ୍ଷା କରିବା ଜରୁରୀ ?
ଆୟକର ବିଭାଗ ପକ୍ଷରୁ ଆସେସମେଣ୍ଟ ଇୟର (୨୦୨୬-୨୭) ପାଇଁ ରିଟର୍ଣ୍ଣ ଦାଖଲ ପ୍ରକ୍ରିୟା ଆରମ୍ଭ ହୋଇ ପ୍ରାୟ ଦୁଇ ସପ୍ତାହରୁ ଅଧିକ ସମୟ ହେଲାଣି। କିନ୍ତୁ ପୋର୍ଟାଲ୍ ପ୍ରସ୍ତୁତ ହେବାର ଅର୍ଥ ଏହା ନୁହେଁ ଯେ ଆପଣଙ୍କର ସମସ୍ତ ଡାଟା ପ୍ରସ୍ତୁତ ଅଛି। ବିଶେଷଜ୍ଞଙ୍କ ମତରେ, ବ୍ୟାଙ୍କ, ମ୍ୟୁଚୁଆଲ୍ ଫଣ୍ଡ ଏବଂ ବଡ଼ ବଡ଼ କମ୍ପାନୀଗୁଡ଼ିକ ସେମାନଙ୍କର ବାର୍ଷିକ ଆର୍ଥିକ ବିବରଣୀ ବା SFT ମେ ୩୧ ସୁଦ୍ଧା ଦାଖଲ କରିଥାନ୍ତି। ଏହି ଡାଟା ଆପଣଙ୍କର ଆନୁଆଲ୍ ଇନଫରମେସନ ଷ୍ଟେଟମେଣ୍ଟ ବା AIS ରେ ଅପଡେଟ୍ ହେବା ପାଇଁ ଜୁନ୍ ମଧ୍ୟଭାଗ ପର୍ଯ୍ୟନ୍ତ ସମୟ ଲାଗିଥାଏ। ସେହିପରି ଚାକିରିଆଙ୍କ ପାଇଁ ସବୁଠାରୁ ଗୁରୁତ୍ବପୂର୍ଣ୍ଣ ଦସ୍ତାବିଜ୍ ‘ଫର୍ମ ୧୬’ (Form 16) ମଧ୍ୟ କମ୍ପାନୀଗୁଡ଼ିକ ପ୍ରାୟତଃ ଜୁନ୍ ୧୫ ତାରିଖ ଆଡ଼କୁ ଜାରି କରିଥାନ୍ତି। ତେଣୁ ଏହା ପୂର୍ବରୁ ତରବରିଆ ଭାବେ ITR ଫାଇଲ୍ କଲେ ବଡ଼ ଭୁଲ୍ ହେବାର ଆଶଙ୍କା ରହିଛି।
କେଉଁମାନେ ଜୁନ୍ ୧୫ ପୂର୍ବରୁ ଆଦୌ ITR ଫାଇଲ୍ କରିବା ଉଚିତ୍ ନୁହେଁ ?
ପ୍ରଥମତଃ: ସମସ୍ତ ସାଲାରୀ ପ୍ରାପ୍ତ କର୍ମଚାରୀ, ଯେଉଁମାନଙ୍କର ଫର୍ମ ୧୬ ଆସିନାହିଁ।
ଦ୍ବିତୀୟତଃ: ଯେଉଁମାନେ ଶେୟାର ବଜାର କିମ୍ବା ମ୍ୟୁଚୁଆଲ୍ ଫଣ୍ଡରୁ କ୍ୟାପିଟାଲ୍ ଗେନ୍ ବା ଲାଭ ପାଇଛନ୍ତି।
ତୃତୀୟତଃ: ବ୍ୟାଙ୍କ ଡିପୋଜିଟର ଏବଂ ବରିଷ୍ଠ ନାଗରିକ, ଯେଉଁମାନଙ୍କର ସୁଧ ଆଦାୟ ଏବଂ ଟିଡିଏସ୍ (TDS) ବିବରଣୀ ବ୍ୟାଙ୍କ ଦ୍ବାରା ଅପଡେଟ୍ ହେବା ବାକି ଅଛି।
ଏହାଛଡ଼ା ବଡ଼ ଆକାରର ନଗଦ କାରବାର, କ୍ରେଡିଟ୍ କାର୍ଡ ଖର୍ଚ୍ଚ କିମ୍ବା ସମ୍ପତ୍ତି କ୍ରୟ କରିଥିବା ବ୍ୟକ୍ତି ମଧ୍ୟ ଜୁନ୍ ୧୫ ପର୍ଯ୍ୟନ୍ତ ଅପେକ୍ଷା କରିବା ଆବଶ୍ୟକ, ଯେପରି ସେମାନଙ୍କର ଆୟ ୨୬AS ଏବଂ AIS ସହ ସମ୍ପୂର୍ଣ୍ଣ ମେଳ ଖାଇବ।
ଯଦି ଆପଣ ତରବରିଆ ଭାବେ ଭୁଲ୍ ତଥ୍ୟ ଦେଇ ଆଗୁଆ ଆଇଟିଆର୍ ଦାଖଲ କରନ୍ତି, ତେବେ ଏହାର ପରିଣାମ ଭୟଙ୍କର ହୋଇପାରେ। ଆପଣଙ୍କ ଦ୍ବାରା ଦାଖଲ ହୋଇଥିବା ରିଟର୍ଣ୍ଣ ଏବଂ ଆୟକର ବିଭାଗର ରେକର୍ଡ ମଧ୍ୟରେ ଯଦି କୌଣସି ବିସଙ୍ଗତି ବା ମିସ୍ମାଚ୍ ଦେଖାଯାଏ, ତେବେ ଧାରା ୧୪୩(୧)(a) ଅନୁସାରେ ଆପଣଙ୍କୁ ନୋଟିସ୍ ଆସିବ। କେବଳ ସେତିକି ନୁହେଁ, ଆୟ ଲୁଚାଇବା କିମ୍ବା ଭୁଲ୍ ତଥ୍ୟ ଦେବା ଅଭିଯୋଗରେ ଧାରା ୨୭୦A ଅନୁସାରେ ୫୦% ରୁ ନେଇ ୨୦୦% ପର୍ଯ୍ୟନ୍ତ ଜରିମାନା ମଧ୍ୟ ଦେବାକୁ ପଡ଼ିପାରେ। ଏହା ସହିତ ପୁଣି ଥରେ ସଂଶୋଧିତ ରିଟର୍ଣ୍ଣ ବା ରିଭାଇଜ୍ଡ୍ ଆଇଟିଆର୍ ଦାଖଲ କରିବାର ଅଯଥା ହଇରାଣ ହେବାକୁ ପଡ଼ିବ।
ସେଥିପାଇଁ ଟ୍ୟାକ୍ସ ବିଶେଷଜ୍ଞମାନେ ପରାମର୍ଶ ଦେଇଛନ୍ତି ଯେ, ଜୁନ୍ ଦ୍ବିତୀୟ ସପ୍ତାହ ପରେ ନିଜର ଫର୍ମ ୧୬, ୨୬AS ଏବଂ AIS କୁ ଭଲଭାବେ ଯାଞ୍ଚ କରନ୍ତୁ। ସବୁ ତଥ୍ୟ ସ୍ଥିର ଏବଂ ସଠିକ୍ ହେବା ପରେ, ଅର୍ଥାତ୍ ଜୁଲାଇ ପ୍ରଥମ ସପ୍ତାହରୁ ଆଇଟିଆର୍ ଦାଖଲ କରିବା ହେଉଛି ସବୁଠାରୁ ସୁରକ୍ଷିତ ଏବଂ ବୁଦ୍ଧିମାନର କାମ।