ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଖାଦ୍ୟ ଏବଂ ପ୍ରସାଧନ ସାମଗ୍ରୀ ନାଁରେ ଚାଲିଥିବା ଏକ ବଡ଼ ଧରଣର ଜାଲିଆତି ଓ କଳାବଜାରୀର ପର୍ଦ୍ଦାଫାଶ ହୋଇଛି। ମିଆଦ ପୂର୍ଣ୍ଣ ହୋଇଯାଇଥିବା ସାମଗ୍ରୀରେ ନୂଆ ଲେବଲ୍ ଲଗାଇ ବଜାରରେ ବିକ୍ରି କରୁଥିବା ଅଭିଯୋଗରେ ପୋଲିସ ଏକ ବାପା-ପୁଅ ଯୋଡ଼ିକୁ ଗିରଫ କରିଛି। ସାଧାରଣ ଲୋକଙ୍କ ସ୍ୱାସ୍ଥ୍ୟ ସହ ଖେଳୁଥିବା ଏହି ଅସାଧୁ ବ୍ୟବସାୟୀଙ୍କୁ ଗିରଫ କରାଯିବା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି।
ମିଳିଥିବା ସୂଚନା ଅନୁଯାୟୀ, ଗିରଫ ହୋଇଥିବା ବାପା ଏବଂ ପୁଅ ଦୀର୍ଘ ଦିନ ଧରି ଭୁବନେଶ୍ୱରର ବିଭିନ୍ନ ଛୋଟବଡ଼ ଦୋକାନକୁ ଏହି ବିଷାକ୍ତ ସାମଗ୍ରୀ ଯୋଗାଉଥିଲେ। ସେମାନେ ମୁଖ୍ୟତଃ କମ୍ ଦାମ୍ରେ ଏକ୍ସପାୟାର୍ଡ ଖାଦ୍ୟ ସାମଗ୍ରୀ, ପ୍ୟାକେଟ୍ ଫୁଡ୍ ଏବଂ ବିଭିନ୍ନ ବ୍ରାଣ୍ଡର ମିଆଦ ପୂର୍ଣ୍ଣ କସମେଟିକ୍ସ କିଣୁଥିଲେ। ଏହାପରେ ଅତି ଚତୁରତାର ସହ ସେହି ପୁରୁଣା ପ୍ୟାକେଟ୍ ଉପରେ ଏକ୍ସପାଏରୀ ଡେଟ୍ ପରିବର୍ତ୍ତନ କରି ନୂଆ ତାରିଖର ଷ୍ଟିକର୍ ଲଗାଉଥିଲେ। ଏହି ଜାଲିଆତି ପରେ ସେହି ସାମଗ୍ରୀକୁ ନୂଆ ପ୍ରଡକ୍ଟ ଭାବେ ଖୁଚୁରା ଦୋକାନୀମାନଙ୍କୁ ବିକ୍ରି କରାଯାଉଥିଲା।
ଏହି ବେଆଇନ କାରବାର ନେଇ ଏକ ନିର୍ଦ୍ଦିଷ୍ଟ ଅଭିଯୋଗ ପାଇବା ପରେ ସମ୍ପୃକ୍ତ ଟିମ୍ ଅଭିଯୁକ୍ତଙ୍କ ଠିକଣା ଉପରେ ଚଢ଼ାଉ କରିଥିଲେ। ଚଢ଼ାଉ ବେଳେ ବିପୁଳ ପରିମାଣର ଏକ୍ସପାୟାର୍ଡ ଏବଂ ନକଲି ସାମଗ୍ରୀ ସମେତ ତାରିଖ ପରିବର୍ତ୍ତନ କରିବା ପାଇଁ ବ୍ୟବହୃତ ମେସିନ୍ ଏବଂ ନକଲି ଲେବଲ୍ ଜବତ କରାଯାଇଛି। ବର୍ତ୍ତମାନ ଏହି ଘଟଣାରେ ପୋଲିସ ଏକ ମାମଲା ରୁଜୁ କରି ଅଧିକ ଖୋଳତାଡ଼ ଜାରି ରଖିଛି।
