ଜନ୍ତରମନ୍ତର ଛାତ୍ର ପ୍ରତିବାଦ ପ୍ରସଙ୍ଗରେ ସୁପ୍ରିମକୋର୍ଟଙ୍କ ପଦକ୍ଷେପ, ପୋଲିସ ବଳପ୍ରୟୋଗର ତଦନ୍ତ କରିବ ୫ ଜଣିଆ କମିଟି
ନୂଆଦିଲ୍ଲୀ: ଗତ ମାସ ଦିଲ୍ଲୀ ଜନ୍ତର-ମନ୍ତର ଛାତ୍ର ପ୍ରତିବାଦ ସମୟରେ ପୋଲିସର ଅତ୍ୟାଚାରର ତଦନ୍ତ ପାଇଁ ସୁପ୍ରିମକୋର୍ଟ ପୂର୍ବତନ ସୁପ୍ରିମକୋର୍ଟ ବିଚାରପତି ଜଷ୍ଟିସ ଆର. ସୁଭାଷ ରେଡ୍ଡୀଙ୍କ ନେତୃତ୍ୱରେ ଏକ ଉଚ୍ଚ କ୍ଷମତାସମ୍ପନ୍ନ କମିଟି ଗଠନ କରିଛନ୍ତି। ଅନ୍ୟାନ୍ୟ ସଦସ୍ୟଙ୍କ ମଧ୍ୟରେ ପଞ୍ଜାବ ଏବଂ ହରିୟାଣା ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ରବି ଶଙ୍କର ଝା, ଦିଲ୍ଲୀ ହାଇକୋର୍ଟର ପୂର୍ବତନ ବିଚାରପତି ଜଷ୍ଟିସ ଶାଲିନ୍ଦର କୌର, ପୂର୍ବତନ ସିବିଆଇ ନିର୍ଦ୍ଦେଶକ ରିଷି କୁମାର ଶୁକ୍ଳା ଏବଂ ପୂର୍ବତନ ମେଘାଳୟ ଡିଜିପି ଏଲ.ଆର. ବିଷ୍ଣୋଇ ଅଛନ୍ତି।
କମିଟି ପ୍ରତିବାଦକାରୀଙ୍କ ବିରୁଦ୍ଧରେ ଅତ୍ୟଧିକ ବଳ ପ୍ରୟୋଗ, ପେଲେଟ୍ ଗନ୍ ବ୍ୟବହାର, ପୋଲିସ କାର୍ଯ୍ୟାନୁଷ୍ଠାନ ପାଇଁ ଉତ୍ତରଦାୟିତ୍ୱ, ପ୍ରତିବାଦକାରୀଙ୍କ ଉପରେ ନଜର ରଖିବା, ମହିଳା ପ୍ରତିବାଦକାରୀଙ୍କ ବିରୁଦ୍ଧରେ ହିଂସା ଏବଂ ଉତ୍ପୀଡ଼ନର ଅଭିଯୋଗ, ଚିକିତ୍ସା ସହାୟତା ଏବଂ ପୀଡିତଙ୍କ ପାଇଁ କ୍ଷତିପୂରଣ ଭଳି ପ୍ରସଙ୍ଗଗୁଡ଼ିକର ତଦନ୍ତ କରିବ। ଶାନ୍ତିପୂର୍ଣ୍ଣ ପ୍ରତିବାଦର ଅଧିକାର ଏବଂ ଆଇନ ଶୃଙ୍ଖଳା ବଜାୟ ରଖିବା ମଧ୍ୟରେ କିପରି ଉପଯୁକ୍ତ ସନ୍ତୁଳନ ରକ୍ଷା କରାଯିବ ତାହା ମଧ୍ୟ କମିଟି ଯାଞ୍ଚ କରିବ।
ତଦନ୍ତ ପ୍ରକ୍ରିୟାକୁ ସୁଗମ କରିବା ପାଇଁ ପୋଲିସ ଓ ସୁରକ୍ଷା ଏଜେନ୍ସିଗୁଡ଼ିକୁ ସମସ୍ତ ସିସିଟିଭି ଫୁଟେଜ୍, ଡ୍ରୋନ୍ ଭିଡିଓ ଏବଂ ଓୟାରଲେସ କଲ୍ ରେକର୍ଡ ସୁରକ୍ଷିତ ରଖି କମିଟିକୁ ହସ୍ତାନ୍ତର କରିବାକୁ କୁହାଯାଇଛି। ସାକ୍ଷୀ ଓ ଆବେଦନକାରୀମାନେ ନିଜର ପରିଚୟ ଗୋପନ ରଖି ମଧ୍ୟ କମିଟି ନିକଟରେ ପ୍ରମାଣ ଦାଖଲ କରିପାରିବେ ବୋଲି ସ୍ପଷ୍ଟ କରାଯାଇଛି। କମିଟିକୁ ଯଥାଶୀଘ୍ର ନିଜର ପ୍ରଥମ ଅନ୍ତରୀଣ ରିପୋର୍ଟ ଦାଖଲ କରିବାକୁ ସର୍ବୋଚ୍ଚ ଅଦାଲତ ଅନୁରୋଧ କରିଛନ୍ତି।
ସୂଚନା ଥାଉକି ଚଳିତବର୍ଷ ଜୁଲାଇ ୨୦ରେ ହୋଇଥିବା ପାର୍ଲାମେଣ୍ଟ ଘେରାଉ ଆନ୍ଦୋଳନ ବେଳେ ଛାତ୍ରୀଛାତ୍ର ଏବଂ ଯୁବବର୍ଗଙ୍କ ଉପରେ ପୋଲିସ ମାତ୍ରାଧିକ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ପରବର୍ତ୍ତୀ ସମୟରେ ଧର୍ମେନ୍ଦ୍ର ପ୍ରଧାନ କେନ୍ଦ୍ର ଶିକ୍ଷାମନ୍ତ୍ରୀ ପଦରୁ ଇସ୍ତଫା ଦେବା ପରେ ଜୁଲାଇ ୨୫ରେ ଆନ୍ଦୋଳନ ସ୍ଥଗିତ ରହିଥିଲା।