କେବିକେ ଅଞ୍ଚଳର ଭିତ୍ତିଭୂମି ବିକାଶ ପାଇଁ ୧୩୦ କୋଟି
ଜଳସେଚନ, ରାସ୍ତା, ପାନୀୟଜଳ ଓ ଏସ୍ଟି/ଏସ୍ସି ଶିକ୍ଷାନୁଷ୍ଠାନକୁ ଗୁରୁତ୍ୱ
ଭୁବନେଶ୍ୱର: କେବିକେ ଅଞ୍ଚଳରେ ଭିତ୍ତିଭୂମି ବିକାଶ ପାଇଁ ରାଜ୍ୟ ସରକାର ୨୦୨୬-୨୭ ଆର୍ଥିକ ବର୍ଷ ପାଇଁ ଭିତ୍ତିଭୂମି ବିକାଶ ପାଣ୍ଠି (ଇନ୍ଫ୍ରାଷ୍ଟ୍ରକ୍ଚର ଡେଭେଲପମେଣ୍ଟ ଫଣ୍ଡ-ଆଇଡିଏଫ୍)ରେ ୧୩୦ କୋଟି ଟଙ୍କା ବ୍ୟୟବରାଦ କରିଛନ୍ତି।
ଏହି ପାଣ୍ଠିରେ ଜଳସେଚନ, ଆନ୍ତଃଜିଲ୍ଲା ରାସ୍ତା, ଗୁରୁତ୍ୱପୂର୍ଣ୍ଣ ଗ୍ରାମ୍ୟ ରାସ୍ତା, ପାନୀୟଜଳ ଯୋଗାଣ ଏବଂ ଏସ୍ଟି/ଏସ୍ସି ସ୍କୁଲ୍ କୋଠା ଓ ଛାତ୍ରାବାସର ବିକାଶ କରାଯିବ। ଏନେଇ ଯୋଜନା ଓ ସଂଯୋଜନ ବିଭାଗ ପକ୍ଷରୁ ପୂର୍ତ୍ତ, ଜଳ ସମ୍ପଦ, ପଞ୍ଚାୟତିରାଜ ଓ ପାନୀୟଜଳ, ମହିଳା ଓ ଶିଶୁ ବିକାଶ, ଗ୍ରାମ୍ୟ ଉନ୍ନୟନ, ଅନୁସୂଚିତ ଜନଜାତି ଓ ଅନୁସୂଚିତ ଜାତି ବିକାଶ ଏବଂ ମିଶନ୍ ଶକ୍ତି ବିଭାଗକୁ ପ୍ରକଳ୍ପ ପ୍ରସ୍ତାବ ଦାଖଲ ପାଇଁ ଚିଠି ହୋଇଛି।
ତେବେ ନିର୍ଦ୍ଧାରିତ ନିୟମାବଳୀ ଅନୁଯାୟୀ ସେପ୍ଟେମ୍ବର ୫ ସୁଦ୍ଧା ପ୍ରସ୍ତାବ ଦାଖଲ କରିବାକୁ କୁହାଯାଇଛି। ହାର୍ଡ କପି ସହ ସଫ୍ଟ କପି ମଧ୍ୟ ଦାଖଲ କରିବାକୁ ହେବ। ପ୍ରସ୍ତାବର ବିଚାର ଓ ଅନୁମୋଦନ ପରେ ପାଣ୍ଠି ମୁକ୍ତ କରାଯିବ।
କେବିକେ ଅଞ୍ଚଳର ଆଠଟି ଜିଲ୍ଲାରେ ଏହି ଯୋଜନା କାର୍ଯ୍ୟକାରୀ ହେବ। ଅବିଭକ୍ତ କଳାହାଣ୍ଡିରୁ କଳାହାଣ୍ଡି ଓ ନୂଆପଡ଼ା, ଅବିଭକ୍ତ ବଲାଙ୍ଗିରରୁ ବଲାଙ୍ଗିର ଓ ସୁବର୍ଣ୍ଣପୁର ଏବଂ ଅବିଭକ୍ତ କୋରାପୁଟରୁ କୋରାପୁଟ, ନବରଙ୍ଗପୁର, ମାଲକାନଗିରି ଓ ରାୟଗଡ଼ା ଏହି ଅଞ୍ଚଳରେ ସାମିଲ। ଏହି ଅଞ୍ଚଳରେ ଭିତ୍ତିଭୂମିର ଅଭାବ ଦୂର କରି ଆର୍ଥିକ ଓ ସାମାଜିକ ବିକାଶକୁ ତ୍ୱରାନ୍ୱିତ କରିବା ଯୋଜନାର ମୁଖ୍ୟ ଲକ୍ଷ୍ୟ।
ଯୋଜନା ଅଧୀନରେ ଗୁରୁତ୍ୱପୂର୍ଣ୍ଣ ରାସ୍ତା ଓ ସେତୁ, କ୍ଷୁଦ୍ର ଜଳସେଚନ ପ୍ରକଳ୍ପ, ଏସ୍ଟି/ଏସ୍ସି ସ୍କୁଲ୍ ଓ ଛାତ୍ରାବାସର ଭିତ୍ତିଭୂମି ଏବଂ ନିରାପଦ ପାନୀୟଜଳ ଯୋଗାଣକୁ ପ୍ରାଥମିକତା ମିଳିବ। ଏହାଦ୍ୱାରା ସ୍ଥାନୀୟ ଲୋକଙ୍କ ଜୀବନଧାରଣର ମାନ ବଢ଼ାଇବା ସହ ଅଞ୍ଚଳକୁ ଅନ୍ୟ ବିକଶିତ ଅଞ୍ଚଳ ସହ ସମକକ୍ଷ କରିବା ଲକ୍ଷ୍ୟ ରହିଛି।
ସେହିପରି ପ୍ରତ୍ୟେକ ଜିଲ୍ଲାରେ ଥିବା ବ୍ଲକ୍ ସଂଖ୍ୟାକୁ ଆଧାର କରି ଆନୁପାତିକ ଭାବେ ପାଣ୍ଠି ବଣ୍ଟନ କରାଯିବ। ପ୍ରତିବର୍ଷ ସରକାର ନିର୍ଦ୍ଧାରଣ କରୁଥିବା ପ୍ରାଥମିକତା ଅନୁଯାୟୀ ବିଭିନ୍ନ କ୍ଷେତ୍ରରେ ପାଣ୍ଠି ଖର୍ଚ୍ଚ ହେବ।
ପ୍ରକଳ୍ପ ଚୟନ ସମୟରେ ଗୁରୁତର ଭିତ୍ତିଭୂମି ଅଭାବ ଓ ତୁରନ୍ତ ଆବଶ୍ୟକତା ଥିବା ପ୍ରକଳ୍ପକୁ ଗୁରୁତ୍ୱ ଦିଆଯିବ। କେବିକେ ଜିଲ୍ଲାପାଳ ଓ ଲୋକପ୍ରତିନିଧିଙ୍କ ପ୍ରସ୍ତାବକୁ ମଧ୍ୟ ସମ୍ଭାବ୍ୟତା ଏବଂ ଉପଲବ୍ଧ ବଜେଟ୍ ଆଧାରରେ ବିଚାର କରାଯାଇପାରିବ।
ଅନ୍ୟ ରାଜ୍ୟ ଯୋଜନା, କେନ୍ଦ୍ରୀୟ ପ୍ରାୟୋଜିତ ଯୋଜନା, କେନ୍ଦ୍ରୀୟ ଯୋଜନା କିମ୍ବା ଅନ୍ୟ ଉତ୍ସରୁ ପାଣ୍ଠି ମିଳୁନଥିବା ବା ଅପର୍ଯ୍ୟାପ୍ତ ଥିବା ପ୍ରକଳ୍ପରେ ଆଇଡିଏଫ୍ ପାଣ୍ଠି ବ୍ୟବହାର କରାଯିବ। ସେହିପରି ପ୍ରତ୍ୟେକ ପ୍ରକଳ୍ପର ଖର୍ଚ୍ଚ ଓ ଉପଯୋଗିତାକୁ ମଧ୍ୟ ଯାଞ୍ଚ କରାଯିବ।
ପ୍ରକଳ୍ପ ଚୟନ ଓ ସ୍ଥାନ ନିର୍ଦ୍ଧାରଣରେ ସ୍ୱଚ୍ଛତା ରକ୍ଷା କରିବାକୁ ନିର୍ଦ୍ଦେଶ ରହିଛି। ସମ୍ପୃକ୍ତ ବିଭାଗଗୁଡ଼ିକୁ ପ୍ରତିମାସର ୧୦ ତାରିଖ ସୁଦ୍ଧା ପୂର୍ବମାସର ଆର୍ଥିକ ଓ ଭୌତିକ ପ୍ରଗତିର ମାସିକ ରିପୋର୍ଟ ଦାଖଲ କରିବାକୁ ହେବ। ଜିଲ୍ଲାପାଳ ଓ ବିଭାଗୀୟ ଅଧିକାରୀ ମାନେ ମଧ୍ୟ ନିୟମିତ ପ୍ରକଳ୍ପ ପରିଦର୍ଶନ କରି କାମର ଗୁଣବତ୍ତା ଯାଞ୍ଚ କରିବେ।
ଏଥିସହ ପ୍ରତ୍ୟେକ ବିଭାଗକୁ ପ୍ରକଳ୍ପ ଡାଇରେକ୍ଟୋରି ପ୍ରସ୍ତୁତ କରି ସମୟ ସମୟରେ ବିଭାଗୀୟ ୱେବ୍ସାଇଟ୍ରେ ଅପଲୋଡ୍ କରିବାକୁ ନିର୍ଦ୍ଦେଶ ରହିଛି। ଏହା ଦ୍ୱାରା ପ୍ରକଳ୍ପ ଚୟନ, କାର୍ଯ୍ୟାନ୍ୱୟନ ଓ ପାଣ୍ଠି ବ୍ୟବହାରରେ ସ୍ୱଚ୍ଛତା ଆହୁରି ବଢ଼ିବ ବୋଲି କୁହାଯାଇଛି।