ପ୍ରଧାନମନ୍ତ୍ରୀଙ୍କ ନିବେଦନ ସତ୍ତ୍ୱେ ବଢ଼ୁଛି ସୁନା ଚାହିଦା: ପାର୍ବଣ ଋତୁରେ ପୁରୁଣା ଗହଣା ବଦଳାଇ ନୂଆ କିଣୁଛନ୍ତି ଗ୍ରାହକ

ନୂଆଦିଲ୍ଲୀ: ପାର୍ବଣ ଋତୁ ପାଖେଇ ଆସୁଥିବା ବେଳେ ଦେଶରେ ସୁନା ଚାହିଦା ପୁଣି ଥରେ ବୃଦ୍ଧି ପାଇବାରେ ଲାଗିଛି । ଦେଶର ବିଦେଶୀ ମୁଦ୍ରା ଭଣ୍ଡାରକୁ ସୁରକ୍ଷିତ ରଖିବା ଉଦ୍ଦେଶ୍ୟରେ ଅତିକମରେ ଗୋଟିଏ ବର୍ଷ ପାଇଁ ସୁନା ନ କିଣିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିକଟରେ ଦେଶବାସୀଙ୍କୁ ନିବେଦନ କରିଥିଲେ । ଏହା ସତ୍ତ୍ୱେ ଭାରତୀୟଙ୍କ ସୁନା ପ୍ରୀତି କମିବାର ନାଁ ନେଉନାହିଁ ।

ତେବେ ମହଙ୍ଗା ଦର ଏବଂ ନୀତିଗତ କଟକଣା ମଧ୍ୟରେ ଚଳିତ ବର୍ଷ ଗ୍ରାହକମାନେ ଏକ ନୂଆ ବିକଳ୍ପ ଆପଣାଇଛନ୍ତି । ନୂଆ ସୁନା କିଣିବା ବଦଳରେ ଲୋକେ ନିଜର ପୁରୁଣା ଗହଣା ଦେଇ ନୂଆ ଡିଜାଇନର ଆଭୂଷଣ ଘରକୁ ଆଣିବାକୁ ଅଧିକ ପସନ୍ଦ କରୁଛନ୍ତି ।

ସୁନା ଆମଦାନୀ ହ୍ରାସ କରିବା ଲକ୍ଷ୍ୟରେ କେନ୍ଦ୍ର ସରକାର ଆମଦାନୀ ଶୁଳ୍କରେ ମଧ୍ୟ ବୃଦ୍ଧି କରିଥିଲେ । କିନ୍ତୁ ଭାରତୀୟ ସଂସ୍କୃତି ଓ ପରମ୍ପରାରେ ସୁନାର ଏକ ସ୍ୱତନ୍ତ୍ର ସ୍ଥାନ ଥିବାରୁ, ଏହାକୁ କିଣିବାରୁ ସମ୍ପୂର୍ଣ୍ଣ ବିରତ ରହିବା ସାଧାରଣ ଲୋକଙ୍କ ପାଇଁ କଷ୍ଟକର ହୋଇପଡ଼ୁଛି ।

ବିଶେଷକରି ନବରାତ୍ରି, ଦଶହରା, ଧନତେରସ୍ ଏବଂ ଦୀପାବଳି ଭଳି ପବିତ୍ର ପର୍ବ ସମୟରେ ଘରକୁ ସୁନା ଆଣିବା ଅତ୍ୟନ୍ତ ଶୁଭ ବୋଲି ବିବେଚନା କରାଯାଏ । ଏହାକୁ ଦୃଷ୍ଟିରେ ରଖି ‘ଗୋଲ୍ଡ ଏକ୍ସଚେଞ୍ଜ’ ବା ପୁରୁଣା ସୁନା ବଦଳାଇବା ପ୍ରକ୍ରିୟା ବର୍ତ୍ତମାନ ବଜାରରେ ଏକ ନୂଆ ଟ୍ରେଣ୍ଡ୍ ପାଲଟିଛି । ଏହି ପଦ୍ଧତି ଦ୍ୱାରା ଲୋକଙ୍କୁ ଏକାଥରକେ ଅଧିକ ନଗଦ ଟଙ୍କା ଖର୍ଚ୍ଚ କରିବାକୁ ପଡ଼ୁନାହିଁ, ଯାହାକି ମଧ୍ୟବିତ୍ତ ପରିବାର ପାଇଁ ଏକ ବଡ଼ ଆଶ୍ୱସ୍ତି ଆଣିଦେଇଛି । ଏଥିସହିତ ପାର୍ବଣରେ ନୂଆ ଗହଣା ପିନ୍ଧିବାର ସଉକ ମଧ୍ୟ ପୂରଣ ହୋଇପାରୁଛି ।

ଗତ କିଛି ଦିନ ହେବ ଅନ୍ତର୍ଜାତୀୟ ତଥା ଘରୋଇ ବଜାରରେ ସୁନା ଦରରେ ସାମାନ୍ୟ ହ୍ରାସ ଦେଖିବାକୁ ମିଳିଛି । ଏହି ଦର ହ୍ରାସ ମଧ୍ୟ ଖାଉଟିଙ୍କୁ ବେଶ୍ ଆକୃଷ୍ଟ କରିଛି । ଏହି କାରଣରୁ ଦେଶର ବିଭିନ୍ନ ପ୍ରାନ୍ତରେ ଥିବା ପ୍ରମୁଖ ଅଳଙ୍କାର ଦୋକାନଗୁଡ଼ିକରେ ଗ୍ରାହକଙ୍କ ପ୍ରବଳ ଭିଡ଼ ଜମୁଥିବା ବ୍ୟବସାୟୀମାନେ ପ୍ରକାଶ କରିଛନ୍ତି । ବଜାର ବିଶେଷଜ୍ଞଙ୍କ ମତରେ, ନିଜ ପାଖରେ ପଡ଼ିରହିଥିବା ବା ବ୍ୟବହାର ହେଉନଥିବା ପୁରୁଣା ଡିଜାଇନର ସୁନା ଗହଣାକୁ ଦେଇ ଲୋକେ ଏବେ ଆକର୍ଷଣୀୟ ତଥା ଆଧୁନିକ ଡିଜାଇନର ଅଳଙ୍କାର ନେଉଛନ୍ତି । ଏହା ଫଳରେ ସୁନା ଦୋକାନୀମାନଙ୍କର ବିକ୍ରି ବୃଦ୍ଧି ପାଇବା ସହ ରିଟେଲ ମାର୍କେଟରେ ଏକ ଭଲ ବାତାବରଣ ସୃଷ୍ଟି ହୋଇଛି ।

ଅନ୍ୟପକ୍ଷରେ, ପ୍ରଧାନମନ୍ତ୍ରୀଙ୍କ ଆହ୍ୱାନ ଏବଂ ସରକାରୀ ନୀତି ଯୋଗୁଁ ବିଦେଶରୁ ନୂଆ ସୁନା ଆମଦାନୀ ପରିମାଣରେ ସାମାନ୍ୟ ହ୍ରାସ ଘଟିପାରେ ବୋଲି ଅର୍ଥନୀତିଜ୍ଞମାନେ ଆଶା କରୁଛନ୍ତି । ତଥାପି ଘରୋଇ ବଜାରରେ ଏକ୍ସଚେଞ୍ଜ ମାଧ୍ୟମରେ ହେଉଥିବା ବ୍ୟବସାୟ ଯୋଗୁଁ ସୁନା ବଜାରର ଚମକ ଆଦୌ ଫିକା ପଡ଼ିନାହିଁ । ଭାରତରେ ସୁନା କେବଳ ଏକ ମୂଲ୍ୟବାନ ଧାତୁ ନୁହେଁ, ବରଂ ଏହା ଲୋକଙ୍କର ଆବେଗ, ଭବିଷ୍ୟତର ସଞ୍ଚୟ ଓ ସାମାଜିକ ପ୍ରତିଷ୍ଠାର ଏକ ଅବିଚ୍ଛେଦ୍ୟ ଅଙ୍ଗ ।