ମୁମ୍ବାଇ: ପାକିସ୍ତାନର ଘନିଷ୍ଠ ରଣନୈତିକ ସହଯୋଗୀ ଦେଶ ତୁର୍କୀ, ଅଗଷ୍ଟ ୨୦୨୬ରେ ଭାରତରୁ ରେକର୍ଡ ପରିମାଣର ଡିଜେଲ ଆମଦାନୀ କରିଛି। କମୋଡିଟି ଡାଟା ଫର୍ମ ‘କେପଲର’ ର ତଥ୍ୟ ଅନୁଯାୟୀ, ତୁର୍କୀ ଅଗଷ୍ଟ ମାସରେ ଭାରତରୁ ଦୈନିକ ୧ ଲକ୍ଷ ୨୦ ହଜାର ବ୍ୟାରେଲରୁ ଅଧିକ ଡିଜେଲ କିଣିଛି। ୨୦୧୭ ପରଠାରୁ ଭାରତରୁ ତୁର୍କୀ କରିଥିବା ଡିଜେଲ ଆମଦାନୀ ମଧ୍ୟରେ ଏହା ସବୁଠାରୁ ବଡ଼ ସ୍ତର ଅଟେ। ଗୋଟିଏ ବର୍ଷ ମଧ୍ୟରେ ଭାରତରୁ ତୁର୍କୀକୁ ପେଟ୍ରୋଲିୟମ୍ ଦ୍ରବ୍ୟ ରପ୍ତାନି ପ୍ରାୟ ୫ ଗୁଣ ବୃଦ୍ଧି ପାଇଛି, ଯେଉଁଥିରେ ଭାରତୀୟ ସଂସ୍ଥା ରିଲାଏନ୍ସର ପ୍ରମୁଖ ଯୋଗଦାନ ରହିଛି।
ସାଧାରଣତଃ ତୁର୍କୀ ନିଜର ଡିଜେଲ ଆବଶ୍ୟକତା ପାଇଁ ସମ୍ପୂର୍ଣ୍ଣ ଭାବେ ରୁଷ ଉପରେ ନିର୍ଭରଶୀଳ ଥିଲା। ୨୦୨୫ ମସିହାରେ ତୁର୍କୀର ମୋଟ ଡିଜେଲ ଆମଦାନୀର ପ୍ରାୟ ୮୫% ରୁଷରୁ ଆସୁଥିଲା। ମାତ୍ର ୨୦୨୬ ଅଗଷ୍ଟରେ ରୁଷରୁ ଆମଦାନୀ ହ୍ରାସ ପାଇ ମାତ୍ର ଦୈନିକ ୮୦ ହଜାର ବ୍ୟାରେଲ ରେ ପହଞ୍ଚିଛି। ଫଳରେ ତୁର୍କୀ ନିଜର ଇନ୍ଧନ ସଙ୍କଟ ଦୂର କରିବା ପାଇଁ ଭାରତ ଆଡ଼କୁ ମୁହାଁଇଛି। ଭାରତ ନିଜର ବିଶାଳ ତୈଳ ଶୋଧନାଗାର ସାମର୍ଥ୍ୟ ବଳରେ ବିଶ୍ୱ ବଜାରରେ ଏକ ନିର୍ଭରଯୋଗ୍ୟ ଇନ୍ଧନ ଯୋଗାଣକାରୀ ଭାବେ ଉଭା ହୋଇଛି, ଯାହା ଭାରତୀୟ ଅର୍ଥନୀତି ଓ ରପ୍ତାନି ବାଣିଜ୍ୟକୁ ଏକ ନୂଆ ଦିଗ ଦେଖାଇଛି।
