ନୂଆଦିଲ୍ଲୀ: ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ ନ୍ୟୁୟର୍କରେ ଏପରି ଏକ ପରିସ୍ଥିତିର ସମ୍ମୁଖୀନ ହୋଇଥିଲେ ଯାହା ସେ କେବେ କଳ୍ପନା କରିପାରିନଥିବେ। ତାଙ୍କ ନିଜ ଦେଶବାସୀଙ୍କ ପକ୍ଷରୁ ତାଙ୍କୁ ପ୍ରବଳ ବିରୋଧର ସମ୍ମୁଖୀନ ହେବାକୁ ପଡ଼ିଲା।
ଶେହବାଜ ସରିଫ ଜାତିସଂଘ ସାଧାରଣ ସଭାରେ ଯୋଗଦେବା ପାଇଁ ନ୍ୟୁୟର୍କ ପହଞ୍ଚିବା ମାତ୍ରେ ଇମ୍ରାନ ଖାନଙ୍କ ଦଳ ପାକିସ୍ତାନ ତେହେରିକ୍-ଏ-ଇନସାଫ (ପିଟିଆଇ)ର ସମର୍ଥକମାନେ ପୋଷ୍ଟର ଲଗାଇ ତାଙ୍କ ରାସ୍ତାକୁ ଅବରୋଧ କରିଥିଲେ, ଯେଉଁଥିରେ ଲେଖାଥିଲା, “ଚୋର ଆସିଛି।” ପୋଷ୍ଟରରେ ଏହା ମଧ୍ୟ ଲେଖାଯାଇଥିଲା ଯେ ଚୋରଙ୍କ ସରକାର ଗ୍ରହଣୀୟ ନୁହେଁ। ଏହା ବ୍ୟତୀତ ପୋଷ୍ଟରରେ ପାକିସ୍ତାନର ପଞ୍ଜାବ ପ୍ରଦେଶର ମୁଖ୍ୟମନ୍ତ୍ରୀ ମରିୟମ ନୱାଜଙ୍କ ପାଇଁ କିଣାଯାଇଥିବା ଏକ ବିଳାସପୂର୍ଣ୍ଣ ବିମାନର ଏକ ବ୍ୟଙ୍ଗାତ୍ମକ ପ୍ରତିଛବି ମଧ୍ୟ ପ୍ରଦର୍ଶିତ ହୋଇଥିଲା।
ପିଟିଆଇ ସମର୍ଥକମାନେ ପୂର୍ବତନ ପାକିସ୍ତାନୀ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଜେଲରୁ ମୁକ୍ତ କରିବା ପାଇଁ ମଧ୍ୟ ସ୍ଲୋଗାନ ଦେଇଥିଲେ। ପୂର୍ବରୁ ଯେତେବେଳେ ଶେହବାଜ ସରିଫଙ୍କ ବିମାନ ନ୍ୟୁୟର୍କ ବିମାନବନ୍ଦରରେ ଅବତରଣ କରିଥିଲା, ତାଙ୍କୁ ସ୍ୱାଗତ କରିବା ପାଇଁ କୌଣସି ଲାଲ କାର୍ପେଟ ନଥିଲା, କିମ୍ବା ତାଙ୍କୁ ସ୍ୱାଗତ କରିବା ପାଇଁ ସେଠାରେ କୌଣସି ବରିଷ୍ଠ ଟ୍ରମ୍ପ ପ୍ରଶାସନର ଅଧିକାରୀ ନଥିଲେ। ନ୍ୟୁୟର୍କରେ ଥିବା ପାକିସ୍ତାନୀ-ଆମେରିକୀୟ ସମ୍ପ୍ରଦାୟ ପାକିସ୍ତାନର ସରକାରଙ୍କୁ ଏକ “ଫର୍ମ 47” ସରକାର ବୋଲି ଲେବଲ କରିଛନ୍ତି ଯାହା ଏକ ପ୍ରତାରଣାମୂଳକ ଜନାଦେଶ ସହିତ ଗଠିତ।
ତେବେ 81ତମ ଜାତିସଂଘ ସାଧାରଣ ପରିଷଦ ବୈଠକ ପାଇଁ ବିଶ୍ୱର ଅନେକ ପ୍ରମୁଖ ନେତା ନ୍ୟୁୟର୍କସ୍ଥିତ ଜାତିସଂଘ ମୁଖ୍ୟାଳୟରେ ପହଞ୍ଚିଛନ୍ତି। ପ୍ରାୟ ୧୩୦ ଦେଶର ରାଷ୍ଟ୍ର ଏବଂ ସରକାର ମୁଖ୍ୟ ଯୋଗଦେବେ ଏବଂ ସମସ୍ତ ୧୯୩ ସଦସ୍ୟ ରାଷ୍ଟ୍ରର ପ୍ରତିନିଧିମାନେ ଏଥିରେ ଅଂଶଗ୍ରହଣ କରିବେ। ଭାରତର ବୈଦେଶିକ ମନ୍ତ୍ରୀ ଏସ. ଜୟଶଙ୍କର ମଧ୍ୟ ଅଂଶଗ୍ରହଣ କରୁଛନ୍ତି। ଏହି କାର୍ଯ୍ୟକ୍ରମରେ ବିଭିନ୍ନ ବିଶ୍ୱସ୍ତରୀୟ ପ୍ରସଙ୍ଗ ଉପରେ ଆଲୋଚନା ହେବାର ଆଶା କରାଯାଉଛି।
ଉଲ୍ଲେଖଯୋଗ୍ୟ, ପାକିସ୍ତାନର ଆର୍ଥିକ ପରିସ୍ଥିତି ଭୟଙ୍କର ମୁଦ୍ରାସ୍ଫୀତି ଶୀର୍ଷରେ ପହଞ୍ଚିଥିବା ବେଳେ ଚଳିତ ବର୍ଷ ଫେବୃଆରୀରେ ମରିୟମ ନୱାଜଙ୍କ ପାଇଁ ୧୨ ବିଲିୟନ ପାକିସ୍ତାନୀ ଟଙ୍କା ମୂଲ୍ୟର ଏକ ବିମାନ କିଣାଯାଇଥିଲା। ଯାହାକୁ ନେଇ ହୋହାଲ୍ଲା ମଧ୍ଯ ହୋଇଥିଲା।