ବେରୁଟ୍: ଇସ୍ରାଏଲ ସହ ଜାରି ରହିଥିବା ସଂଘର୍ଷରେ ବ୍ୟାପକ କ୍ଷତିଗ୍ରସ୍ତ ହୋଇଥିବା ଲେବାନନର ନାଗରିକଙ୍କ ପାଇଁ ବଡ଼ ଘୋଷଣା କରିଛନ୍ତି ହିଜବୁଲ୍ଲା ମୁଖ୍ୟ ସେଖ ନଇମ କାସେମ। ଯୁଦ୍ଧ ଯୋଗୁଁ ବାସହୀନ ହୋଇପଡ଼ିଥିବା *ହଜାର ହଜାର ବିସ୍ଥାପିତ ଲୋକଙ୍କୁ ବାସଗୃହ ଯୋଗାଇଦେବା ସହ ନଷ୍ଟ ହୋଇଯାଇଥିବା ସୀମାନ୍ତ ଗ୍ରାମଗୁଡ଼ିକର ପୁନଃନିର୍ମାଣ ପାଇଁ ହିଜବୁଲ୍ଲା ଏକ ବିଶେଷ ପ୍ରକଳ୍ପ ଆରମ୍ଭ କରିବ* ବୋଲି ସେ ପ୍ରକାଶ କରିଛନ୍ତି।
ସେଖ କାସେମ ଏକ ସାର୍ବଜନୀନ ସମ୍ବୋଧନରେ କହିଛନ୍ତି ଯେ ଲେବାନନ ସରକାର ନିଜର ଦାୟିତ୍ୱ ତୁଲାଇ ବିସ୍ଥାପିତଙ୍କୁ କ୍ଷତିପୂରଣ ଓ ରହିବା ପାଇଁ ସୁବିଧା ଯୋଗାଇଦେବା କଥା। ମାତ୍ର ବର୍ତ୍ତମାନର ସଙ୍କଟଜନକ ପରିସ୍ଥିତିକୁ ଦୃଷ୍ଟିରେ ରଖି ହିଜବୁଲ୍ଲା ନିଜସ୍ୱ ପାଣ୍ଠି, ସଂଗୃହିତ ଦାନ ଓ ସହଯୋଗୀ ସଂସ୍ଥାଗୁଡ଼ିକର ସହାୟତାରେ ଏହି ପୁନରୁଦ୍ଧାର କାର୍ଯ୍ୟ ହାତକୁ ନେବ। ବିଶେଷ କରି ସମ୍ପୂର୍ଣ୍ଣ ଧ୍ୱଂସ ହୋଇଯାଇଥିବା ଦକ୍ଷିଣ ଲେବାନନର ଗ୍ରାମଗୁଡ଼ିକରେ ବାସଗୃହ ନିର୍ମାଣ ଓ ପୁନରୁଦ୍ଧାର ପାଇଁ ଏକ ପ୍ରାରମ୍ଭିକ ଯୋଜନା ଶୀଘ୍ର ଆନୁଷ୍ଠାନିକ ଭାବେ ଉନ୍ମୋଚିତ ହେବ।
ନିଜ ଭାଷଣରେ ସରକାରଙ୍କ ଆର୍ଥିକ ନୀତି ଓ ନିଷ୍କ୍ରିୟତାକୁ କଠୋର ସମାଲୋଚନା କରିବା ସହ ସେଖ କାସେମ ସ୍ପଷ୍ଟ କରିଛନ୍ତି ଯେ ହିଜବୁଲ୍ଲାକୁ ନିରସ୍ତ୍ରୀକରଣ କରିବା ପାଇଁ ହେଉଥିବା ଚାପକୁ କଦାପି ସ୍ୱୀକାର କରାଯିବ ନାହିଁ। ଇସ୍ରାଏଲ ଯାହା ଯୁଦ୍ଧ ମାଧ୍ୟମରେ ହାସଲ କରିପାରିନାହିଁ, ତାହା ରାଜନୈତିକ ଚାପରେ ସମ୍ଭବ ହେବନାହିଁ। ଦକ୍ଷିଣ ଲେବାନନକୁ ଶତ୍ରୁମୁକ୍ତ ନକରିବା ପର୍ଯ୍ୟନ୍ତ ଏବଂ ବିସ୍ଥାପିତ ନାଗରିକମାନେ ନିଜ ଘରକୁ ନଫେରିବା ପର୍ଯ୍ୟନ୍ତ ସଶସ୍ତ୍ର ସଂଗ୍ରାମ ଜାରି ରହିବ।
ଇସ୍ରାଏଲୀ ଆକ୍ରମଣ ଯୋଗୁଁ ଲେବାନନରେ ୬୨,୦୦୦ରୁ ଉର୍ଦ୍ଧ୍ୱ ଘର ନଷ୍ଟ ହୋଇଥିବା ବେଳେ ଲକ୍ଷାଧିକ ଲୋକ ବାସହୀନ ହୋଇଛନ୍ତି। ଏହି ନିର୍ମାଣ ପ୍ରକ୍ରିୟା ଶୀଘ୍ର ଆରମ୍ଭ ହେବ ଏବଂ ପ୍ରତିଟି କ୍ଷତିଗ୍ରସ୍ତ ପରିବାରକୁ ଅସ୍ଥାୟୀ ରହିବା ସହ ନୂତନ ଘର ନିର୍ମାଣ ପର୍ଯ୍ୟନ୍ତ ଆର୍ଥିକ ସହାୟତା ମଧ୍ୟ ଯୋଗାଇ ଦିଆଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି। ଫଳରେ ସରକାରୀ ସହାୟତାକୁ ଅପେକ୍ଷା ନକରି ସଂଗଠନ ନିଜେ ପୁନରୁଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରିବାକୁ ଲକ୍ଷ୍ୟ ରଖିଛି। ଏହି ପରିପ୍ରେକ୍ଷୀରେ ହିଜବୁଲ୍ଲାର ଗୃହ ନିର୍ମାଣ ଯୋଜନା ବିସ୍ଥାପିତଙ୍କ ପାଇଁ ଏକ ବଡ଼ ଆଶ୍ୱାସନା ଭାବେ ଦେଖାଦେଇଛି।