Satellite Internet Rules: ଏଲନ୍ ମସ୍କଙ୍କୁ ଭାରତ ସରକାରଙ୍କ ସିଧାସଳଖ ଜବାବ, “ନିୟମ ସମସ୍ତଙ୍କ ପାଇଁ ସମାନ”
ନୂଆଦିଲ୍ଲୀ:ଇଣ୍ଟରନେଟ୍ ଏବଂ ମୋବାଇଲ୍ ବ୍ୟବହାରକାରୀଙ୍କ ସଂଖ୍ୟା ଦୃଷ୍ଟିରୁ ଭାରତ ହେଉଛି ସବୁଠାରୁ ବଡ଼ ବଜାର।ସେଥିପାଇଁ ପ୍ରମୁଖ ବିଶ୍ୱସ୍ତରୀୟ କମ୍ପାନୀଗୁଡ଼ିକ ଭାରତୀୟ ବଜାରରେ ପ୍ରବେଶ କରିବାକୁ ଚାହୁଁଛନ୍ତି। ତଥାପି, ଭାରତ ସରକାର ଦୁଇଟି ସର୍ତ୍ତ ରଖିଛନ୍ତି। ପ୍ରଥମତଃ, ଆନ୍ତର୍ଜାତୀୟ କମ୍ପାନୀଗୁଡ଼ିକୁ ଭାରତୀୟ ଆଇନ ଅନୁଯାୟୀ ବ୍ୟବସାୟ କରିବାକୁ ପଡ଼ିବ। ଦ୍ୱିତୀୟତଃ, ଭାରତୀୟ ଲୋକଙ୍କ ତଥ୍ୟ ଭାରତ ମଧ୍ୟରେ ହିଁ ସଂରକ୍ଷିତ ହୋଇ ରହିବା ଆବଶ୍ୟକ। ତଥ୍ୟ ସୁରକ୍ଷା ଏବଂ ଜାତୀୟ ସୁରକ୍ଷା ଦୃଷ୍ଟିକୋଣରୁ ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କିନ୍ତୁ ଷ୍ଟାରଲିଙ୍କ୍ର ମାଲିକ ଏଲନ୍ ମସ୍କ ଏହାକୁ ନେଇ ଆପତ୍ତି ପ୍ରକାଶ କରିଛନ୍ତି।
ଭାରତରେ ସାଟେଲାଇଟ୍ ଇଣ୍ଟରନେଟ୍ ସେବା ଆରମ୍ଭ କରିବା ପାଇଁ ନିୟାମକ ପ୍ରକ୍ରିୟାକୁ ନେଇ ଷ୍ଟାରଲିଙ୍କ୍ (Starlink) ଏବଂ ସରକାରଙ୍କ ମଧ୍ୟରେ ବିବାଦ ତୀବ୍ର ହୋଇଛି। ଭାରତରେ ସାଟେଲାଇଟ୍ ଯୋଗାଯୋଗ ସେବାକୁ ନିୟନ୍ତ୍ରଣ କରୁଥିବା ନିୟମାବଳୀର ନିରପେକ୍ଷତା ସମ୍ବନ୍ଧୀୟ ପ୍ରଶ୍ନଗୁଡ଼ିକ ଏକ ସୋସିଆଲ୍ ମିଡିଆ ପୋଷ୍ଟ ମାଧ୍ୟମରେ ଉଠାଯାଇଥିଲା। ଏଥିରେ ଦାବି କରାଯାଇଥିଲା ଯେ ଭାରତରେ ନିଜର ସେବା ଆରମ୍ଭ କରିବା ପାଇଁ ଷ୍ଟାରଲିଙ୍କ୍ (Starlink) କୁ ଅନୁମୋଦନ ପ୍ରଦାନ ପ୍ରକ୍ରିୟାରେ ବାଧା ସୃଷ୍ଟି କରାଯାଉଛି।
ଏହାର ଉତ୍ତରରେ, ଯୋଗାଯୋଗ ମନ୍ତ୍ରଣାଳୟ ସ୍ପଷ୍ଟ କରିଛି ଯେ ଭାରତ ସରକାର ସାଟେଲାଇଟ୍ ଯୋଗାଯୋଗ ସେବା ସମେତ ସମସ୍ତ ଟେଲିକମ୍ ସେବା ପାଇଁ ଏକ ନିରପେକ୍ଷ ଏବଂ ଭେଦଭାବହୀନ ଲାଇସେନ୍ସ ବ୍ୟବସ୍ଥା କାର୍ଯ୍ୟକାରୀ କରିଛନ୍ତି। ମନ୍ତ୍ରଣାଳୟ କହିଛି ଯେ ଷ୍ଟାରଲିଙ୍କ୍ (Starlink) ସମେତ ସମସ୍ତ ସମ୍ପୃକ୍ତ କମ୍ପାନୀ ପାଇଁ ସମାନ ନିୟମ ଲାଗୁ ହୁଏ ଏବଂ କାହା ପ୍ରତି କୌଣସି ଭେଦଭାବ କରାଯାଏ ନାହିଁ।
ସୂଚନାଥାଉକି,ଷ୍ଟାରଲିଙ୍କ୍ର ମାଲିକ ଏଲନ୍ ମସ୍କ ସୋସିଆଲ୍ ମିଡିଆ ପ୍ଲାଟଫର୍ମ ‘X’ ରେ ଲେଖିଛନ୍ତି, “ଭାରତର କିଛି ନିର୍ଦ୍ଦିଷ୍ଟ ଶିଳ୍ପପତି ଇଣ୍ଟରନେଟ୍ କ୍ଷେତ୍ରରେ ଏକଚାଟିଆ ଅଧିକାର ହାସଲ କରିବାକୁ ଚାହୁଁଛନ୍ତି। ଏହି ଲୋକମାନେ ଷ୍ଟାରଲିଙ୍କ୍ର ଶୁଭାରମ୍ଭକୁ ବାଧା ଦେବାକୁ ଚେଷ୍ଟା କରୁଛନ୍ତି। ଏହା ହେବା ଉଚିତ୍ ନୁହେଁ। ଭାରତରେ ଷ୍ଟାରଲିଙ୍କ୍କୁ କାର୍ଯ୍ୟକ୍ଷମ ହେବାରୁ ଅଟକାଇବା ଭାରତର ଜନସାଧାରଣଙ୍କ ବିରୁଦ୍ଧରେ ଏକ ଅପରାଧ ଅଟେ।” ଏଲନ୍ ମସ୍କଙ୍କ ଏହି ଅଭିଯୋଗର ତୁରନ୍ତ ଜବାବ ଦେଇଥିଲା ଦୂରସଞ୍ଚାର ମନ୍ତ୍ରଣାଳୟ।
ସରକାର କହିଛନ୍ତି ଯେ ଭାରତରେ ଟେଲିକମ୍ ଅପରେଟରମାନଙ୍କ ପାଇଁ ଥିବା ନିୟମାବଳୀ ସମସ୍ତଙ୍କ କ୍ଷେତ୍ରରେ ସମାନ ଭାବେ ଲାଗୁ ହୁଏ। ଏହି କ୍ଷେତ୍ରରେ ପ୍ରବେଶ କରିବାକୁ ଇଚ୍ଛୁକ ଯେକୌଣସି ସଂସ୍ଥାକୁ ମୌଳିକ ଆବଶ୍ୟକତାଗୁଡ଼ିକ ପୂରଣ କରିବାକୁ ପଡ଼ିବ। ଟେଲିକମ୍ ମନ୍ତ୍ରଣାଳୟ ସ୍ପଷ୍ଟ ଭାବେ କହିଛି ଯେ, “ଲାଇସେନ୍ସ ପାଇବାକୁ ଚାହୁଁଥିବା ଯେକୌଣସି ସାଟ୍କମ୍ (ଉପଗ୍ରହ ଯୋଗାଯୋଗ) ସେବା ପ୍ରଦାନକାରୀଙ୍କୁ ତଥ୍ୟ ସୁରକ୍ଷା ମାନକଗୁଡ଼ିକ ପାଳନ କରିବାକୁ ପଡ଼ିବ। ସମସ୍ତଙ୍କ ପାଇଁ ନିୟମ ସମାନ ଅଟେ; ଲାଇସେନ୍ସ ପ୍ରଦାନ କରିବା ସମୟରେ ଭାରତ ସରକାର କୌଣସି କମ୍ପାନୀ ପ୍ରତି ଭେଦଭାବ କରନ୍ତି ନାହିଁ।”
ଗୁରୁବାର ଦିନ ଦିଲ୍ଲୀରେ ଅନୁଷ୍ଠିତ ‘ମୋବାଇଲ୍ କଂଗ୍ରେସ’ରେ ଏଲନ୍ ମସ୍କଙ୍କ କମ୍ପାନୀର ପ୍ରତିନିଧିମାନେ ଉପସ୍ଥିତ ଥିଲେ। ଭାରତୀୟ ସରକାର ଏକ ଦୃଢ଼ ଆଭିମୁଖ୍ୟ ଗ୍ରହଣ କରିବା ମାତ୍ରେ ଷ୍ଟାରଲିଙ୍କ୍ (Starlink) ନିଜର ଆଭିମୁଖ୍ୟ ବଦଳାଇ ଦେଇଥିଲା; କମ୍ପାନୀର ପ୍ରତିନିଧି କହିଛନ୍ତି ଯେ ସେମାନେ ଭାରତୀୟ ଟେଲିକମ୍ ଅପରେଟରମାନଙ୍କ ସହ ମିଳିତ ଭାବେ କାର୍ଯ୍ୟ କରିବାକୁ ଚାହାଁନ୍ତି ଏବଂ ଭାରତୀୟ ବ୍ୟବହାରକାରୀଙ୍କ ତଥ୍ୟକୁ ଦେଶ ମଧ୍ୟରେ ହିଁ ସୁରକ୍ଷିତ ରଖିବାକୁ ରାଜି ଅଛନ୍ତି।
ଷ୍ଟାରଲିଙ୍କ୍ ବିଜନେସ୍ ଅପରେସନ୍ସର ଉପ-ସଭାପତି ଲରେନ୍ ଡ୍ରେୟର୍ କହିଛନ୍ତି ଯେ ଷ୍ଟାରଲିଙ୍କ୍ ୧୬୫ଟି ଦେଶରେ କାର୍ଯ୍ୟକ୍ଷମ ରହିଛି ଏବଂ ସେହି ପ୍ରତ୍ୟେକ ଦେଶରେ ନିର୍ଭରଯୋଗ୍ୟ ସଂଯୋଗ ସେବା ଯୋଗାଉଛି। କମ୍ପାନୀ ଭାରତରେ ମଧ୍ୟ ନିଜର ସେବା ଆରମ୍ଭ କରିବାକୁ ପ୍ରସ୍ତୁତ ଥିବାବେଳେ ଏଥିପାଇଁ ଏୟାରଟେଲ୍ (Airtel) ଓ ଜିଓ (Jio) ସମେତ ଅନେକ କମ୍ପାନୀ ସହିତ ବୁଝାମଣା ପତ୍ର (MoU) ସ୍ୱାକ୍ଷର କରିଛି। ଡ୍ରେୟର୍ ଆହୁରି ମଧ୍ୟ କହିଛନ୍ତି ଯେ ଭାରତର ଆବଶ୍ୟକତାକୁ ପୂରଣ କରିବା ଲାଗି ସେମାନେ ଷ୍ଟାରଲିଙ୍କ୍ର କାର୍ଯ୍ୟକଳାପକୁ ସ୍ୱତନ୍ତ୍ର ଭାବେ ପ୍ରସ୍ତୁତ କରିଛନ୍ତି। ଏହି କାର୍ଯ୍ୟକଳାପର ପ୍ରତ୍ୟେକ ସ୍ତରରେ ନିୟନ୍ତ୍ରଣ ବ୍ୟବସ୍ଥା ଲାଗୁ କରାଯାଇଛି। ଏହା ମଧ୍ୟ ସୁନିଶ୍ଚିତ କରିବ ଯେ ଭାରତୀୟ ବ୍ୟବହାରକାରୀଙ୍କ ତଥ୍ୟ ଯେପରି ଭାରତ ବାହାରକୁ ନ ଯାଏ।