ପ୍ୟାରିସ୍ : ଫ୍ରାନ୍ସର ବିଭିନ୍ନ ସ୍ଥାନରେ ବିଭିନ୍ନ ପ୍ରସଙ୍ଗକୁ ନେଇ ପ୍ରଦର୍ଶନକାରୀ ଓ ଛାତ୍ରମାନଙ୍କ ଦ୍ୱାରା ଅନୁଷ୍ଠିତ ବିଶାଳ ସମାବେଶ ସମୟରେ ଉତ୍ତେଜନା ଏବଂ ହିଂସାକାଣ୍ଡ ଦେଖିବାକୁ ମିଳିଛି। ଏହି ବିକ୍ଷୋଭ ପ୍ରଦର୍ଶନ ବେଳେ ସୁରକ୍ଷାକର୍ମୀ ଓ ପ୍ରଦର୍ଶନକାରୀଙ୍କ ମଧ୍ୟରେ ଜୋରଦାର ସଂଘର୍ଷ ଘଟିବା ସହ ବିଭିନ୍ନ ସ୍ଥାନରେ ବ୍ୟାପକ ଅଗ୍ନିକାଣ୍ଡ ଓ ଭଙ୍ଗାରୁଜା ହୋଇଥିବା ନେଇ ଖବର ମିଳିଛି।
ସୂଚନା ଅନୁଯାୟୀ, ରାଜଧାନୀ ପ୍ୟାରିସ୍ ସମେତ ମାର୍ସେଲ, ରେନ୍, ଟୁଲୁଜ୍ ଏବଂ ଆଞ୍ଜର୍ସ ଆଦି ସହରଗୁଡ଼ିକରେ ମୁଖା ପିନ୍ଧିଥିବା କିଛି ଉପଦ୍ରବୀଙ୍କ ଦ୍ୱାରା ବ୍ୟାପକ ହିଂସାକାଣ୍ଡ ଘଟିଛି। ପ୍ୟାରିସ୍ର ପ୍ରସିଦ୍ଧ ‘ପ୍ଲେସ୍ ଡେ ଲା ରିପବ୍ଲିକ୍’ ଠାରେ ଚାଲିଥିବା ପ୍ରଦର୍ଶନ ସମୟରେ ଏକ କାରରେ ନିଆଁ ଲଗାଇ ଦିଆଯାଇଥିଲା। ଗୃହ ମନ୍ତ୍ରଣାଳୟର ସୂଚନା ମୁତାବକ, ପ୍ୟାରିସ୍ ଅଞ୍ଚଳ ବାହାରେ ମଧ୍ୟାହ୍ନ ସୁଦ୍ଧା ୧୪୦ରୁ ଅଧିକ ପ୍ରଦର୍ଶନ କାର୍ଯ୍ୟାନୁଷ୍ଠାନ ରେକର୍ଡ କରାଯାଇଛି* , ଯେଉଁଥିରେ ୩୦,୦୦୦ରୁ ଅଧିକ ଜନସାଧାରଣ ଓ ଛାତ୍ରମାନେ ସାମିଲ ହୋଇଥିଲେ।
ଦେଶରେ ବଢ଼ୁଥିବା ଅଶାନ୍ତି ଏବଂ ହିଂସାକୁ ଦୃଷ୍ଟିରେ ରଖି ଫ୍ରାନ୍ସର ପ୍ରଧାନମନ୍ତ୍ରୀ ଏବଂ ରାଷ୍ଟ୍ରପତି ଏମାନୁଏଲ୍ ମାକ୍ରୋନ୍ ଶାନ୍ତି ବଜାୟ ରଖିବା ପାଇଁ ଗଭୀର ଅପିଲ୍ କରିଛନ୍ତି। ବ୍ରୁସେଲ୍ସରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ରାଷ୍ଟ୍ରପତି ମାକ୍ରୋନ୍ କହିଛନ୍ତି ଯେ, ସମ୍ବିଧାନ ଅନୁଯାୟୀ ପ୍ରତ୍ୟେକ ନାଗରିକଙ୍କର ଶାନ୍ତିପୂର୍ଣ୍ଣ ପ୍ରଦର୍ଶନ ଏବଂ ନିଜର ମତ ରଖିବାର ଅଧିକାର ରହିଛି, କିନ୍ତୁ ଏହି ଅଧିକାର ସହିତ ସାଧାରଣ ଜନତା, ସର୍ବସାଧାରଣ ସମ୍ପତ୍ତି ଏବଂ ଆଇନର ସମ୍ମାନ ରକ୍ଷା କରିବା ମଧ୍ୟ ଅତ୍ୟନ୍ତ ଜରୁରୀ। ହିଂସା ଏବଂ ଅଗ୍ନିକାଣ୍ଡ କୁ କୌଣସି ପରିସ୍ଥିତିରେ ପ୍ରଶ୍ରୟ ଦିଆଯିବ ନାହିଁ ବୋଲି ସେ କଡ଼ା ଚେତାବନୀ ଦେଇଛନ୍ତି।
ଏହି ଆନ୍ଦୋଳନରେ ସାମିଲ ଥିବା ଛାତ୍ରମାନେ ବିଦ୍ୟାଳୟଗୁଡ଼ିକରେ ଉନ୍ନତ ଶିକ୍ଷାଗତ ସୁବିଧା, ପାଠପଢ଼ା ପାଇଁ ପର୍ଯ୍ୟାପ୍ତ ପାଣ୍ଠି ଏବଂ ଭିତ୍ତିଭୂମିରେ ସୁଧାର ଆଣିବା ଭଳି ପ୍ରମୁଖ ଦାବିଗୁଡ଼ିକୁ ନେଇ କ୍ରମାଗତ ଭାବେ ବିକ୍ଷୋଭ ଜାରି ରଖିଛନ୍ତି। ଅନେକ ସ୍ଥାନରେ ଛାତ୍ରମାନେ ସ୍କୁଲ ବନ୍ଦ ରଖିବା ସହ ବ୍ୟାରିକେଡ୍ ସୃଷ୍ଟି କରିଛନ୍ତି। ପରିସ୍ଥିତିକୁ ନିୟନ୍ତ୍ରଣକୁ ଆଣିବା ପାଇଁ ପୋଲିସକୁ ବଳ ପ୍ରୟୋଗ କରିବାକୁ ପଡ଼ିଥିବା ବେଳେ ବହୁ ସ୍ଥାନରେ ଲୁହବୁହା ଗ୍ୟାସ ଏବଂ ଜଳକା ପ୍ରୟୋଗ କରାଯାଇଛି।
ପ୍ରଶାସନ ପକ୍ଷରୁ ସ୍ଥିତି ଉପରେ କଡ଼ା ନଜର ରଖାଯାଇଥିବା ବେଳେ ଆଗାମୀ ଦିନରେ ଆନ୍ଦୋଳନକୁ ନେଇ ସରକାର କୌଣସି ନୂତନ ପଦକ୍ଷେପ ନେବେ କି ନାହିଁ, ସେ ନେଇ ସମଗ୍ର ଦେଶରେ ଚର୍ଚ୍ଚା ଜାରି ରହିଛି।