ତୃତୀୟ ଥର ପାଇଁ ଦିଲ୍ଲୀର ଦାୟିତ୍ୱ ନେଲେ କେଜ୍ରିୱାଲ

ନୂଆଦିଲ୍ଲୀ: ତୃତୀୟ ଥର ପାଇଁ ଦିଲ୍ଲୀ ମୁଖ୍ୟମନ୍ତ୍ରୀ ଭାବେ ଶପଥ ନେଲେ ଆମ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜ୍ରିୱାଲ । ଦିଲ୍ଲୀ ବିଧାନସଭା ନିର୍ବାଚନରେ ଆପ୍‌ର ବଡ ବିଜୟ ପରେ ରାମଲୀଲା ମୈଦାନରେ ସେ ବିଧିବଦ୍ଧ ଭାବେ ଆଜି ଶପଥ ଗ୍ରହଣ କରିଛନ୍ତି । ଦିଲ୍ଲୀର ଉପରାଜ୍ୟପାଳ ଅନୀଲ ବୈଜଲ ତାଙ୍କୁ ପଦ ଏବଂ ଗୋପନୀୟତାର ଶପଥ ପାଠ କରାଇଛନ୍ତି । କେଜ୍ରିୱାଲଙ୍କ ସହ ତାଙ୍କ ମନ୍ତ୍ରୀ ପରିଷଦର ୬ ଜଣ ସଦସ୍ୟ ମଧ୍ୟ ଶପଥ ନେଇଛନ୍ତି ।
କେଜ୍ରିୱାଲଙ୍କ ଏହି ଶପଥ ସମାରୋହରେ ଦିଲ୍ଲୀ ବିକାଶ ପାଇଁ ବିଭିନ୍ନ କ୍ଷେତ୍ରରେ କାମ କରିଥିବା ୫୦ରୁ ଅଧିକ ଶିକ୍ଷକ, ଡାକ୍ତର, ପୋଲିସ, ଡ୍ରାଇଭର ଓ ଚପରାସୀଙ୍କ ଭଳି କର୍ମଚାରୀ ଅତିଥି ରୂପେ ଯୋଗ ଦେଇଥିଲେ । ଏଥିସହ ହଜାର ହଜାର ଆପ୍ ସମର୍ଥକ ରାମଲୀଲା ମୈଦାନରେ ଉପସ୍ଥିତ ରହି କେଜ୍ରିୱାଲଙ୍କ ସମର୍ଥନରେ ନାରା ଦେଇଥିଲେ । ଫଳରେ ଦିଲ୍ଲୀ ଦରବାର କେଜ୍ରିୱାଲଙ୍କ ନାରାରେ କମ୍ପି ଉଠିଥିଲା ।